حتى القرقيعان كان غير

في صغري
اروع ايام في رمضان هي القرقيعان
مثل ما هي بالظبط اروع ما في حياتي طفولتي
بس كان قرقيعان غير
له لون له طعم و له طقوس تختلف تمام الاختلاف
و بما اني كنت مشروع صبي
فكان القرقيعان ينقسم الي قسمين
شوي ويا الصبيان ((ربعي )) و ياويلي اذا شافوا ربعهم بالصف تبروا مني و خشوني !!
و الا اذا قرقعنا على ناس يعرفونهم الطعوني برا
هاو ليش مقرقعه وياكم
و اخر شي ياخذون نص قرقيعاني

و يا زين القرقيعان في شويخ
يه يه يه
عيال خير
عادي نص البيوت يعطينا ابوهم فلوس
و اخر شي نطلع من القرقيعان محصلين لنا خمس دنانير او اكثر
نروح نشتري فيهم اكل و نسوي شروكه
انا وربعي و نقعد في الحديقه ناكل

طبعا مو حديقه المنصور لانه يصير فيها لعب كره
نقعد في الحديقه الي قبال المدرسه

و من احلى ما في القرقيعان الحنطور الي يأجرونه بيت الجناعات يفتر في شويخ

و بالنسبه لاغلب اطفال شويخ
احلى شي هو اليوم الي توديهم المرحومه (( نحن و الاطفال )) احدى سيدات الخير
تركب اليهال باص و توديهم نحن و الاطفال

و اذا الناس معترضه على حفلات القرقيعان فيتراولي ماكو احلى من حفلات القرقيعان الي كنت احضرها
صج صج من اونس و احلى الايام و هذي الحفلات اكون فيها ليدي قصبن علي
ملبستيني امي سوق الذهب كله و يا هالنفنوف و العفسه
و حزه القرقيعان نلبس البخانق
واي صج ايام
خلوني اقولكم قصتي الغريبه
لما كنت ياهل ما اعرف و لا كنت افهم مثل الحين طبعا
فكنت وايد اسمع خالد المرزوق و خالد المرزوق و عندي هذا الانسان شخصيه خياليه
او مثل ما في المسلسلات شاه بندر التجار الي نسمع فيه و لا نشوفه

كان عندي هذا اسطوره بس ما اعرفه و لا شفته
المهم في حفله القرقيعان و اثناء السوالف
تقول دلال : انا اذا كبرت بتزوج خالد المرزوق عشان عنده طياره خاصه
و كنت اسمعهم و لا حتى افهم شي
و بكل غرور تقول دلال اي عادي انا اقدر اتزوج خالد المرزوق لانه احنا جخ!!
و انا ماني فاهمه و متعقده و مندقره
فقيره اانا ومن باجر اروح حق يدي عقب الفطور و اهو قاعد يطالع الطنطاوي الله يرحمه
اقوله و كلي أسى و تساؤل : يبا يبا احنا جخ؟؟؟
يبتسم يدي الله يرحمه و دائما كان مبتسم
و ما يرد علي عشان استرسل في الكلام
و اقعد اقص له قصه خالد المرزوق و دلال بتزوجه لانهم جخ و اترجى يدي و احن عليه يجاوبني احنا جخ !!؟؟
ترد علي بصراخ : اذيتي ابووووووي يالله وخري بس شالحجي وتلزق عند ابوها و تحبه و تقول احنا جخ اي حدنا بس انتي لألأ

واندقر و يطيب يدي خاطري و يقولي الغنى غنى النفس

و اروح حق يدتي الله يرحمها و اقولها يما يما احنا جخ ؟؟

ترد علي في كل ثقه : اسم الله علينااااااااا اي جخ و نص ربي مغنيناااااااا و كاسينا و يالله لك الحمد
و اطير من الفرحه
و الله يا فرحتي يومهاااااااا و اطلع حق ربعي
احنا جخ احنا جخ
و صرت اضحوكه خوالي و قصتهم و كان خالي يقولي سمعي السالفه حق ربعي
و اخليج تتمشين وياانا في السياره العجيبه

طبعا للشباب الي اعمارهم الحين 37-39 يذكرون السياره الورديه بالاصفر مالت ثمووووور الحلو
الي ياامااااااااااا قعدت ورا فيها كنا 3 سيايير نمشي جيب كشف و سيارتين جولف مادري كولت مدري شسمهم
و هم كشف و ايام الكشيش و السلاسل الذهب و مايكل جاكسووون يرنع في شويخ
و قاااااام احدهم يزااااااااااااه الله يخير
((ماساوا فيني خير و دلاني بيت خالد المزوق )) و كان يمنا

و ارووووووووووح بكل براءه حق ربعي
لحقو لحقوا
دليت قلعه خالد المرزوق
و بنسوي خطه نقتحم الكنز !!
و ناخذ القواري و اوريهم البيت
و تروح فيني احلامي و خيالاتي و جنوني في اني بسوي خطه اقتحم فيها القلعه لاحرر الفقراء من الاعداء و مدري شنو
و باءت كل احلامي بالفشل من يوم ما سمعت نباح الكلاب

و عقبها بفتره بسيطه و في الجمعيه العصر اشتري اغراض ويا يدي

و يشوف خالد المرزوق و يرفع ايده يسلمون بطريقه الريايل الشياب

ساك الله بالخير

واحن يبا يبا هذا منو: يقولي خالد المرزوق !

و بشهقه يسمعهاااا القاصي و الداني أأأأأأأأأأأأأأأأأأأأأأأأأأأأأأأأأأأأححححححححححححح

يبا هذا مثلناااااااااااااااااااا !!

ببراءه لايعرفها اطفال اليوم الا ما ندر

اكتب هذا البوست و كلي اسى على ايامي الحلوه و طفولتي
الي جيل هالوقت ما عاشها و لا عرفها
وناسه
قرقيعان
جراقي رمضان
قواري
نحن و الاطفال
مطاره البينتو الي اسويها بعد التراويح
و حتى يدي و الطنطاوي ولهت عليهم
الله يرحم ايام زمان