Monday, April 13, 2009

Grosvenor House part 2



ادخل الاسنسير ولا احط عيني في عينه
ولا كأنه موجود
اهو يمي و اهي قبالي و معانا شايب و عيوز
الشايب و العيوز اعتقد انهم فرنسين من اللهجه
لوحه الارقام مضغوط عليها رقمين الدور الثاني و الدور الخامس
ومدري اي دور فيهم دوره ..


فجأه ماحس في نفسي و قلبي يرقع اكثر من اي احد
وجني انا الي وياي واحد مو اهو الي وياه وحده..


اول ما تسكر الاسنسير ..اتعبث في جنطتي كأني بطلع مفتاح الغرفه و تذكرت ان مفاتيح اوتيلي غير .. واهني كارت ممغنط..


عطيتها نظره و قلت لها : الريال الي معاك زوجي
والغرفه الي بتدخلينها غرفتي .. واعتقد ان الي قاعد يصير
جريمه خيانه



وقف فينا الاسنسير في الدور الثاني و نزل الشايب و العيوز..


بوعبدالعزيز ساكت
واهي بكل ربكه تطالعه تنطره يقول شي او تنطره يرد علي


ردت علي : سوري معليش بس هو ماقالي..


انا: مايمديه يقولج شي ..مسرع ماشافج في بوتيك ارمي و طلعتاي وياه..


اهو نزل راسه وقمت ابتسامه..


انا اطالعه و احط عيني بعينه اقوله :صارلي اكثر من ست شهور و انا متردده في موضوع انفصالنا و قبل لا انام يومياا اقول يمكن انا ظالمتك في شي اويمكن انا غلطانه في شي بس دامي شفت بعيني ..فانا الحين مرتاحه..


ينفتح الاسنسير ..
البنت تطلع ..وتتعتذر عند الباب انها ابد ماتدري انه متزوج
وانا اقولها مالا داعي تعتذرين انتي ماتدرين..


تمشي البنت بكل سرعه واعتقد انها ودها الارض تنشق و تبلعها


وظلينا انا وياه نشوف البنت تمشي بالممر .. و عرفت بعدين انها ساكنه في الدور الخامس..معاه في نفس الدور..



بصراحه اول مره اخاف منه لهذي الدرجه
او في الاحرى اخاف من رده فعله
مدري اذا كان وقتها بيسكت او بروح ورا البنت و بخليني مدري اذا بزفني جدامها او برد عليها .. كل هذا ماحسبت حسابه
لان رده فعلي اصلا يت عفويه..

هو: اندش الدار وايد احسن بلا فضايح جدام الناس..


انا: مابيني وبينك شي انتكلم فيه عشان ندش الدار..احنا متفقين على الانفصال و خالصين..اصلا انا ادري انك كلش مو معصب على سالفه البنت ..اهي اصلا مو تايبك ..ولا انت تعبان فيها..


هو: من متى انتي وراي؟



عرفت الحين ان راح يفتح وياي حوار طويل عريض.. وبيعطيني ويهه انه بتفاهم وياي .. و انا من داخلي ادري انه راح يفجر علي يومي كله بالغضب و ماراح يطوفلي السالفه ابد..
اهني اختلطت علي المشاعر.. احتريت من نفسي و احتريت على عمري
واحتريت منه اكثر.. حره المنظر الي شفته وياها .. شي كان يقتل
اشلون انا من داخلي رفضت و تبعته و تصيد له حرني اكثر
تخيلت لو اني ما دخلت الاسنسير .. وقته يكون وياها الحين..
لاشعوريا دموعي بدت تنزل و اكابر ..


انا: من يوم كنت تحت في البار ..كنت واقفه اشوفك لانه بدر قالي انه توه شايفك و مسلم عليك..
فييت اشوفك من بعيد..شوي والا تطلب الشيك.ماقدرت اروح ولا قدرت اكلمك. و مشيت وراك لي الوطني و بعدها محل ارميه........وكاني واقفه الحين وياك و ياريتني لا مشيت و لا ييت وياريتني ماشفتك اصلا.. لاني انا الي بتعب مثل كل مره
وانت الي مرتاح ..



هو: حصه ..الممر ما ينفع ..
انا : و انا اشوف جذي بعد ..



نمشي بالممر انا جدامه و اهو وراي ..
وانا اكلمه ..


انا: والله تعبت من هالاحساس الي متعلقه بين السما و الارض
تعبت من تناقضك و تعبت من تصرفاتك
طول عمري ادري انك تخوني و كنت اطوف و اسكت و اقول ادري يحبني ..
طول عمري ...



يقاطعني : هذي غرفتي ..يفتح الباب..


التفت عليه: علي !! طول عمري اسافر معاك .. طول عمرك ماعندك اي انترست في السويت و كلا انا الي اعصب و اسوي ابقريد و نسكن في سويت !! يوم سكنت بروحك حاجز بسويت !!!


يهز راسه ..مستنكر سؤالي في هالوقت..


هو: مو انا الي حاجز لا الاوتيل و لا التذكره و لا اي شي .. الديوان مسويلي كل شي .. ..


جسمي كله يرجف من الحره .. دموعي تتسابق مع بعض..
واثار جروح لم تندمل فقط تغطت بملح حارق..


مرات من القهر و الحره الانسان ما يقدر يتكلم لانه ما يقدر يقول الي في باله و لو تكلم بجى اكثر و انا مابي ابجي اكثر ابي اطلع من هالدار راسيه على بر


امساك بمعروف او تسريح باحسان...



التفت عليه و انا امسح باجي دموعي و اقوله : والله العظيم و انا ادش الدار قاعد افكر في شي واحد اشكثر كنت مرتاحه في الست الشهور الي افترقنا فيها ..ليش مو راضي تقتنع اني طاقه و انك هلكتني خلاص ماعاد فيني لا الحب و التحمل الي انت تحتاجه..



اقعد على طرف الفراش و اكمل و اهو قاعد قبالي..


انا : بس خلاص .. مابي ارد اعيد العشر سنوات الي وياك مثل اول


تخيل اني مو موجوده قبل ساعه جان في وحده مكاني في هالفراش الحين..
ولا ابي اسألك و لا ابي اعرف شي عنها و منو اهي ..


هو يقاطعني : لا تسألين لاني فعلا ما اعرفها و لا اعرف حتى اسمها..


قولي الي في قلبج و بعدين اقولج قصتها..


انا : قلبي فيه سؤال واحد؟ دامك متعلق في الحريم و المشروب ليش متسمك فيني؟
شنو سبب وجودي معلقه في حياتك و لا تبي تطلقني اذا انت مثل ما انت ..
تعبت اعيش و انت تشرب و انا احس ان ربي يلعني كل ساعه لاني وياك
وتعبت اعيش يوم و ثاني بالخيانات



انا وياك شهر زينين و 6 شهور عذاب..
عطيتك من عمري 10 سنين و قبلها سنه مو كافي؟؟
ما يصير اروح اعيش باجي عمري مرتاحه..؟؟
اشباجي من العمر بصير عمري 40 بعد جم سنه..
وانت قزر عمرك و لا عقلت .. متى بتعقل .. ؟؟


متى بتحس ان الدنيا خلاص مو كلها وناسه و لعب و بنات و خيانات
متى اتحط راسك على المخده و تقرر قبل لا تنام ان بسك لعب وانك عندك عيال و انت مسؤل جدام الله فيني و فيهم
كلكم راعي و كلكم مسؤل عن رعيته .. و انت راعي ناسي رعيتك..
معذبهم .. انانيتك ذابحتك ..
عبالك الدنيا فلوس و دام انا مو مقصر وياج في شي خلاص ..
انت مقصر ويا نفسك وويا ربك لما تعرف ربك عدل بتخاف الله فيني..
بيصحى ضميرك يوم ولكن انا بكون وقتها مو عندك
صج الكل ضد طلاقنا و لكن لو توصل السالفه المحكمه يمكن ادشها بس ارتاح ..


اقوم من مكاني ادش اغسل ويهي لاني صج تعبت ..


يدش الحمام يغسل الغلايه .. و يترسها ماي بارد..
و يغلي الماي .. يسويلي كوب شاي .. ويسويله بلاك كوفي
وانا ساكته اطالع الارض ..
يمسك كوب القهوه و يطالعني ..


هو : اعطيج اياها من الاخر؟؟
اطالعه ..
هو: والله يا حصه لو على رقبتي .. طلاق ما راح اطلقج ..
بتحطين محامي بتحطين اهلي بتحطين الي تحطينه .. طلاق موعندي ..
يسألني .. خلصتي الي عندج ؟ تسمعيني بس ما تقاطعين
اسأله باستنكار .. اشبتقول ؟؟ شنو ممكن شي يعطيك سبب انك ما تقدر تريحني لا في وجودك ولا في بعدك..
هو: حصه حصه؟؟ سمعيني ..
الحين شنو سبب انفصالنا من ست شهور والي خلاج خلاص بتطلقين؟؟


اسكت ما ارد لان مالي خلق افج السالفه من اول ويديد لاني ادري ان هذا المخلوق ماعنده مانع ان يقعد 3 ايام يعيد و يزيد في سالفه وحده بس عشان يطلعني انا غلطانه بالنهايه...


شوفاي حصه محد بهد هالبيت الا انتي .. ولا احد عفس حياتج وحياتي الا انتي ..
من يوم ما غيرتاي ربعج و من يوم ما اذيتينا في سالفه تشرب ما تشرب..

تعاليي قوليلي .. فجأه عقب عشر سنين يايتني طلقني .. ليش؟ لاني ما احس اني حققت هدف حق نفسي !!
اي دكتور مينون داشه دورته قاص عليج بيهدم حياتج عشان شنو ما احس اني حققت هدفي !!
يوم صار عمرج 35 سنه يايه تقولي هالشي !!
من 15 سنه كان كل حلمج انتزوج و كانت كل اهدافج الزواج ..
تزوجتاي و يبتاي عيال و احسن بيت عندج و احسن وظيفه احسن سفر
احسن عيشه عايشتها.. بسسسس عشان رحتيلي دورات و خرابيط و اهداف و مااهدف
انتي الانانيه يوم مليتاي من البيت و الريل و العيال و صار كل شي عندج خلاص حسيتي انج ما حققتاي شي !!


كل يوم و الثاني مسويتلي صيحه انت تشرب انت تشرب..
انا اشرب قبل لا اعرفج
ليش خذيتيني ..؟ والا قبل عادي بس اهم شي اتحققين الي في بالج و تاخذين الي تبيه و بعدين يصير خير
انتي مزاجيه كل يوم افكارج اتغيير و تعال يا علي جاري افكاري
انا من عرفتيني من 15 سنه وهذا انا ما تغير فيني شي
انتي الي كل يوم تبين اتغيرين .. وتغيريني معاج ..
وتدرين اني ما راح اتغير..


غيرتاي دوامج جابلتي هالبنات الي خربوج .. يايتلي كل يوم تصيحين لعن الله جالسه و لعن الله جالسه .. الحين الله بيلعنج ليش صابره على ريلج ؟ بس قبل مو ملعونه على انج تبين تاخذين ريل يشرب؟؟
انزين قبل لا تحاسبيني انا حاسبي روحج .. والا الدين على انا بس


و قعدنا اكثر من اربع ساعات كل واحد فينا قال الي بقلبه
ولا وصلنا لحل ابد..
اهو في قناعه نفسه انه على حق ..
وانا على يقين اني على حق لاني تعبت من الصبر على زوج و ان كان اب زين و ريال زين بس معاي انا زوج متعب..



انا: علي انا تعبت وراسي يعورني..

والله والله ادري و اعرفك عدل لو بقعد لي باجر وياك بتعيد و بتزيد بنفس السالفه و انا كل مره ينهد حيلي منك و ارد اصير طبيعيه وعادي بس لاني اقتنعت انك مظلوم و توهمني اني انا الغلط وانت الصح و لان في كل مره تسويلي فيلم انك بتسنع و انك ما تلجأ للغلط الا هروبا مني و اتشككني بروووحي اصلا.. و اصدقك


بس الحين طراقات عشر سنين اعتقد خلاص تعلمت منها و اي شي بتقوله ماني متحمله اسمعه ولا عندي استعداد خلاص
انا واضحه .. انت موناوي تتغير و انا مابي اعيش وياك بطبعك الي بالنسبه لي عيب .. في نظرك ان انت واو و انك عطيتني بيت و عيال و حياه وايد زينه
بس في النهايه كل الي عطيتني اياه ماسببلي لا السعاده و لا الاستقرار
يكفيني انام مرتاحه بدون تأنيب ضمير و محاتات لك..



هو: انتي تغيرتاي وايد و مو انتي حصه الي اعرفها..
انا : الحمدلله اني تغيرت ..انت ما تتصور اشكثر اجاهد نفسي على اني اتغير
واذا الدنيا نجاحها بس انت فانا راضيه بالخساره ...



استعد للخروج واهو يحاول يفتح معاي اكثر من موضوع
و يسألني اكثر من سؤال بس عشان يعرف شنو نهايه المطاف؟



انا: علي الله يخليك اذا اتحبني صج خلني اعيش باجي عمري مرتاحه
ابي استقر مع عيالي عشان اربيهم صح ..انا ادري ان في حسابات خلق الله بكون خسرانه لو تركتك بس انا حسبتي مع ربي .. وعندي ثقه بالله دامي تركتك عشانه ولا رضيت بالحرام.. بعوضني ربي خير..



اسكر الباب وراي و اخليه


اطلع اروح اشرب قهوه في جيمس ستريت
ارجع الاوتيل
اخذ شاور .. اريح
انسدح لي موعد السبا ..وبعدها اسوي ريلاكس مساج و اكل بندول نايت وانام..
اقوم الفير .. على مسج من علي


يا ناعـس الطـرف خـل مواصلك منـا
واعرف حالات الهـوى وصـل بلا منـا
لا تقـول منـا وانا قـول الـدرب منـا
أخاف حسـودي يفـرق شملـنا وهلـك
تشمت بنا الناس خلق الله وهلـي وهلـك
مـا دام وهلتنـي واجـب انـا وهلـك
ليما يدور الفلـك نقضـي الوطـر منـا



ابتسم و اقوم اغسل ..
ارد الاقي التلفون يرن
ما ارد .. لان المتصل بوعبدالعزيز..


ادري فكر بالكلام و ادري ضاق خلقه و حس ان الفراق اهو الي بيننا واجب..


اقعد في الغرفه باجي اليومين يادوبك انزل تحت اللوبي

وفي التي روم استرجع شريط حياتي معاه و في هالفندق في الذات
في هذا الاوتيل تعرفنا
تصادفنا..
و في هذا الاوتيل قضينا شهر عسلنا
وفي هذا الاوتيل كنا دايما نختلف
في هذا الاوتيل عشنا احلى الخطايا و سرقنا من وقتنا الذ المتع
كانت اهدافنا بسيطه .. نلتقى في الطلعه و الدخله و نركب الاسنسير مع بعض
كنا نعيش احلى حب بالعيون
وكنا ننطر بعض عند الباب..
كنت اخلص السوق من اهلي بسرعه عشان ارد الاقيه ينطرني..
كنت اقصى ما اتمنى ابتسامه..اتحسسني في رغبه هذا الانسان فيني..
كانت اهدافي بريئه .. وكان اهو سعيد في تحقيقها لي..
اصحي من ذكرياتي.. و اتذكر ان من سنين خلفت وراي هني شابه كانت تحلم بالسعاده مع انسان .. و ردت بعد عشر سنين واهي تحلم بان تتخلص من هذا الانسان

اكمل كوب الشاي الي بديته و لا نهيته لانه برد..
اطلب تغيير الشاي..
يرن تلفوني ..
" بوعبدالعزيز "
انا : الو
هو: وينج؟
انا : الاوتيل ..
هو: ايييج؟؟
انا : لأ ماله داعي الحين ماشيه برجع الكويت..
هو: انزين اوصلج المطار.؟
انا : وياي البنات.. ماله داعي
هو: على راحتج..مابي اضايقج..بس بقولج اني فكرت في كلامج..
الي تبينه بسويه .. بس على شرط.. عطيني فرصه اخيره
رداي البيت عيشي في بيتج ويا العيال وانا بروح اسكن في شيك
قعداي في البيت .. البيت لج انتي و العيال و كل شي لج .. بس من غير طلاق
واوعدج لا بتشوفيني ولا بطب عليكم ولا راح اييكم والبيت لج
وعيالي طرشيهم لي مع السايق العصاري او في الويك اند لي الله يهديج
واخذاي وقتج.. سنه
ست شهور
سنتين.. ماراح امل .. وكل الي تبينه بسويه.. بس طلاق مستحيل
انا ما اقدر اعيش بدونج.. ولا اتخيل حيات انتي مو فيها..
انت يا حصه... الدنيا .. احد يشبع من الدنيا ..




رجعت الكويت
رجعت بيتي بدون علي..
وقعدت افكر جم شهر
لتحقيق اهداف دنيويه عاقني علي بتحقيقها
واكتشفت بعد جم شهر ان اهدافي متحققه وخالصه
وعرفت حقيقه وحده ان ليس كل ما نسمعه يمكن تحقيقه بحياتنا
وان احنا فقط الي انحدد شنو نبي..
واكتشفت ان اهدافي الباجيه في الحياه لا يمكن ان تتحقق بدون علي..
وان مهما كان زوجي به من عيوب.. فيكفيني انه يحبني و يكفيه بعدي عنه سنه
واني اذا ابي علي يترك الي يتركه و اغيره .. لابد اني اكون معاه لان البعد مامنه فايده
وقررت الرجوع الى بوعبدالعزيز...



انا : عزيز ..
عزيز: يس ماما..
انا : و صمه .. قول نعم يما..
عزيز: و صمه نعم يما..
انا: منو يايب هذا البوكيه؟
عزيز: بابا
انا : ليش ؟
عزيز: حقج يقول توداي يور بيرثداي .. وانا قلت له حرام
انا: وانت شكو !
عزيز: يما انتي تقولين حرام..
انا: اي مو شغلك .. ...
عصب عزيز و راح..
اناديه...
انا: عزيز..
عزيز: صمه نعم يمه

انا: دق على ابوك خيينا على العشا..

:)




50 comments:

The Simper said...

i read the first 10 lines.. then the last 10 lines o bas :)

yala nabi the next stuff :P

lawyer said...

سمبر

لوووووووووووووووول

لوووووووووووووووول


والله والله اول ما شفت تعليقك ياني في الامييل قلت هذااااااااا سمبروووووووو اشكره اشكره ماقرا شي

لان مامداااااااااااااتي مامدااك قرييييييييييت سطرررررررررررر


واااااااااااااااااااااااي عياااااااااااار

لووووووووووووول


مت مت ضحك


اشوه انك قلت الصج

اشك حتى انك قريت عشر اسسسسسسسسسسسطر

lawyer said...

قراااااائي الاعزاااء ادري في وايد اسأله ما جاوبت عليها في البوست .. وان كل واحد فيكم قاعد يسأل نفسه الف سؤااااااااال


بس انا تعمدت هالشي في هذي القصه بالذات .. لانها علاقه زوجيه و علاقه بين اثنييييين ما يعرف تفاصيلها الا اهم

فحبيييييييت اخلي وايد شغلات مفتوووووحه فقط عشان اسسسسسسمح لخياالكم ان يجاوب هالاسأله عشااااان تكون اكثر واقعيه...

chandal/danchal!! said...

simper looooooooooooooooool


كنت بعلق ونسيت تعليقي

:(



الله يهداها ... يا كره اللي يكتشف روحه عل 35 بجم دورة!

مسكينة ما عندها مبدأ و

air/head! o el IQ malha below level!

.... بيو بيو بيرو بيرو


خل تحمد ربها على هالريل اللي صابر على عراتها!

اشونها عقلت وردت

يختي ولدها خف طينة عل بابا!

بعد ماخذته على خماله!!!
.
.
.
.

جني بحول اوراقي على الديوان

lawyer said...

جندل

لحظه خنلحق عليييييييج


ترا مووووديوان الخدمه بس عشان ما اتظيعين


الحجز على الديوان الاميري


;)



تبين تضحكين.. رفيجتي تقولي كرهت ريلها في البدايه
وبعدين كرهتها اهي


بعدين كرررررررهتهم كلهم وسكرت لابتوبي

هههههههه

chandal/danchal!! said...

ديوان الخدمة المدنية ما وراهم الا المغثة


مبينة الديوان الاميري

وابي لجنه شئون الاسرى والمرتهنين ورعاية اسر الشهداء!

Nikon 8 said...

الله أموت على النهايات السعيدة
إستمتعت جدا بالقصة
أثاري الدورات وتغيير الذات وتحقيق الأهداف هم سبب خراب البيوت
!!!
الله يهني حصة بهالريل اللي يحبها
:)
شكرا لوير
:)

مَـــــعْــــمَــــعَـــــه said...

في البداية ما ادري اقول الله يهنيج والا الله يعينج

ويا اختي ما بني على باطل فهو باطل وفي وحده مع احترامي لج ترضى تتزوج واحد يشرب وسكير واشكره فاضح نفسه وللاسف غلبتي العاطفه على العقل وبأمور مثل الزواج يجب ان يكون الاختيار عقلاني وبعيد عن العواطف

في حجي اكثر بس مابي اطول ومو عيب واحد يعيد ترتيب اوراقه حتى لو وصل عمره 60

المقوع الشرقي said...

متأكدة قالها قعدى بالبيت وانا برة؟؟
ما ظنيت من القصص الواقعية اللى نشوفها
عموما
بتكمل حياتهامعاه تعيسة
نفس على اللى عرفته وحبته وتزوجته وعاشت مزربل معاه وانفصلت
رد
شنو بيتغير بحياتها ولا شى
انذر داى سيم شت

Love Moments said...

على اخر جمله بالبوست ابتسمت ابتسامه عريضه هاااااااااااااااااااالكبور
:p

انزين ما عرفنا سالفت البنيه اللي كانت معاه !!

Sn3a said...

ماكو فايده
خذت خربان
معناته اهيا اختيارها من الاول غلط
فشي طبيعي انها بهالاحداث تضعف وتقول مالي الا زوجي وبوعيالي السكير


ماحب هالنوع من البنات
ينرفزووني!

Hashemy said...

لووووووووووووير كيفج كملي القصه لاتقولين نهايات مفتوحه وتصيريلي فجر السعيد ترى ماحب هالاسلوب ;pppppp


ولو ان براييي هذا مو حل قصة ان انخلي مشاكلنا جذي والايام كفيله

الايام تخلي الاحباب تشتاق لكن الشوق مايحل مشاكل وانا اتكلم من واقع وايد مبتلش فيه ;p

يعطيج العافيه

صبا said...

الله

بالمباااارك
بالمبااااارك

صباحيه مباركه يا عرووووسه

بالمبارك

منو قده بو عزوز

ونااااسه

ردت المياه الي مجاريها
فطيم

مااااحب الفراااق

والحمدلله النهايه سعيده
امبي فطيم
مادري ليش اكتب وانا شااااقه
الحلج الحمدلله والشكر

بس خوووش قصه
تميل الي الوااااقع واااايد

انتي اخصائيه اجتماعيه
؟؟

:***

Doctor said...

مساء الخير

سبحان الله نفس القصة ونفس الكلام ماتغيرتي من 2006

نفس الاسلوب والكلام الارستقراطي بس ناقص اتقوليين انهم ساكنين في البدع او شويخ علشان تكمل السالفة

Doctor said...

بالمناسبة كثري من سوالف الهاي كلاس

ولد الديرة said...

انزين وهالمسكينة اللي بالأصنصير شصار معاها؟

lawyer said...

صباح الخير

اليوم ليش غبااااااااار


:/


جندل
مااااااااسكرت هاللجنه
لووووووووووول







نيكووووون
لألألأ مو كل الدورات
بس مرات الانسان ما يعرف يطبقها عدل على حياته..

او مرااااات الانسان يكون اصلى بني سلسله من الاخطار ما ينسفها مره وحده..


على حساب حيات ناس وايد

الفكره الي بوصلها ان الوحده بعد الزواج حتى و ان كانت بتغير ماراح تقدر وايد لانه برقبتها عيال و بيت و حياه

انانيه كبيره منها لو بتفكر في نفسها..

وهذي قرارتها من البدايه


:))







معمعه

صبااااااحك ورد

لا قووووووووول الي في خاطرك كله..
صح فعلا
الي ترضى تتزوج رياااااال يشرب و تمشي وياه عادي بعدين فجأه تحضرلها جم دوره و درس و اتيي تتفلسف على راسه حرام و حرام

الريال ما يتغير بهالطريقه

ماكو ريال يشرب مايدري انه حرام بس مو هذي طريقه تصحيح الغلط..

واهي من البدايه رضت ختحمل

كنت اقدر انهي القصه بانه اصابه مرض او تاب و بلا بلا بس بتكون مو واقعيه يا اخوي لان للاسف نص حريم الكويت قاعدين في بيوتهم ويا ريياييل تشرب ..


المهم ان يوصل لي عمر الستين و ناوي يتغير و يغير صح..


اشكر ك :))






المقوع

ثواني بس اتبخر و اردلج



اي متأكده مو عشان بس يحبها عشان مايبيهاااا تطلع بره البيت.. ما يبيها تتعود على مكان ثاني غير بيتها بعدين ما تردله ...

احلى شي قلتيييييه انذر داي سيم شيت

صاااااجه والله ...




فيوليتا

صصصصصصصصج كويتين

راضي ريلج
دقيه عليه تشكراي على الورد


ماكووووووووو

حتى ما دقت

قالت حق الولد خي ابوووووك على العشا
ههههههههههههه




البنت انتي ركبي القصه الي تبين
وحده وياه في نفس الدور ..
نفس الاوتيل
شافهااااا في محل ثاني .. كملاي انتي

مابي اقول الي كنت بكتبه بخليكم انتو تحطون الي تبيونه

:)))))))






سنعه
اناااااااا اقول يوم انها صبرت سنه
ختكمل باجي العمر

بس القطو ما يحب الا خناقه الظاهر
هههههههههه






هاشمي
خلاص ردتله
قالت حق الولد يدق على ابوووووووه

ههههههههههه

انزين شنو الواقع الي انت مبتلش فيه
انت ولهان على منو؟؟


:pPP






صبااااا

هههههههههههه
ههههههههههه


اي ادري ليش شااااااقه الحلج


لانج صبحتي عليهم و قلتاي صبااااحيه مباركه

لوووووووووووول

هذا الواقع الي الكل يهرب منه و يدور على المثاليااااات


مشكلتنا مو راضين نصدق ان الواقع شي ثاني عن المثل..






دكتوووووووووووور

!!!!!!!!!

i attraaaaaaact u !

قوووووول ليش والله والله هذاك اليوم قاعد اقرا بوست قدييييم و لقيت تعليقك فيه
قلت الدكتووووووور شخبااااااره شالدنيا فيه

تحديدا تحديدا من عشر ايااااام يمكن

سبحاااااااااااان الله و الا انت معلق

لوووووونج تايم

:))))))


مو نفس الاسلووب لان الانسان كل جم سنه يغير من كلامه
نفس الروووووح
ونفس كل شي لان اانا الي اكتبهااااا


انت متابع قصصي القديمه؟
شهر واحد كتبت بالفصحى و قصه مذكرات مغربيه باعو و شروا فيها..

ليششششششششش وقتها ماقلت اشكرج على الاسلووووووب اليديد


انتووووووو الريااااايل بس تحبووووووووون التدقر..







ولد الديره

هههههههههههههههههه

انت فج خيالك وياااااي شوي..
وحده وواحد في نفس الاوتيل و نفس الدور صاعدين نازلي ويا بعض

يمكن كانت معجبه فيه و اهووووو حاس

فلما تقلقست عنده بالمحل ظبطهاااااا


مدري مدري اتوقع جذي

:pPppPp


ولد الديره مداوم الساعه 7 الصبح؟؟

ماشاء الله اشوه انك مو مديري

ARTFUL said...

والله الحريم تملكهم بورده بكلمه
بوكيه خلاج تردينه

تبين الصج الغلط على الاثنين

وهو امبين من القصه

وبعدين شهالحجارة الماصخة

حتى عيد الميلاد ما يصير

!!!!!!!

عزوز السانه طويل

لوووول

يععطيج العافيه

ترا نص الحجي ما قريته امشي واخطر امشي اخطر بعرف النهاية

;D

ARTFUL said...

كانت تراقبه عن كثب، وهو يلاعب طفلته الصغيرة، ويداعبها حتى تضحك، وتقهقه ببراءة وعذوبة، كان مغرما بطفلته سعيدا بها، يحتضنها ويلاعبها، ويحملها ويغليها، وهي تراقب بهدوء، ......... ثم اقتربت منه وسألته: إلى أي حد تحبها..؟؟



فأجاب متحمسا وهو لا زال يلاعبها: إلى حد الجنون، إني أحبها بجنون، طفلتي غاليتي حبيبة قلبي، ماستي الثمينة




فاقتربت منه أكثر، وقالت له مازحة: غدا تكبر وتتزوج، ...... ترى ماذا ستفعل إن أساء زوجها معاملتها؟؟




فقال بحماس وجدية: سأقتله،
فنظرت للأسفل، وقالت: كنت طفلة في سنها ذات يوم، وكان أبي مغرما بي، سعيد بضحكتي وبراءة عمري، وكان حريصا على سعادتي، واجتهد في تربيتي، ومن المؤكد أنه تمنى لي الخير طوال حياتي، عندما جئت لخطبتي وافق عليك، لأنه اعتقد أنك الرجل الذي يستحق ثقته، والذي سيصون ابنته الحبيبة، ويسعدها، ..... أبي أيضا، كان ذات يوم أب مثلك، أحب ابنته التي هي أنا، وخاف علي وطواني في تلابيب قلبه، ليحميني من لفحات النسيم، اجتهد في تدليلي، وعز عليه رؤية الدمعة في عيني، وصارع الهوان ليطعمني، ويسقيني، ...... ثم بعد جهاده لأجلي ولرغبته في أن تكتمل سعادتي، زوجني بك، فالمرأة لا تكون سعيدة بلا زواج، ......... واختارك وحدك، أنت بالذات، لأنه وجد فيك الشهم الذي سيصون درته النادرة، وماسته الثمينة،



وصلني بالايميل وكدرني وبنفس الوقت حمسني احسن حق مرتي اكثر

;)

شفتي شباب الديرة ليلحين فيهم خير

;p

الزين said...

عزيزتي لوير


القصه جدا واقعية

وتعيشيها الكثيرات حولنا


عجبتني طريقة السرد والحوار

بس شويه حسيت انج تركضين فيها وتبين تخلصينها بجزئين

:)


اختزلتي الكثير من التفاصيل وهذا ترك فراغات بالقصة


ليتج مكملة لأن القصه وايد عجبتني

كان ممكن تضيفين لها احداث وتفاصيل تجعلها اكثر عمقا



ومع هذا عجبتني حيل

حوارها مع ولدها عزيز عجييييب

حبيته هالعزيز ياخذ القلب

واللي ضحكت عليه حيل لما قالت له طول عمرك ما تحجز سويتات انا اللي اسوي اب جريد

:))))))))))))



عجبه


تحلطم زوجة كويتية على اصوله




قرارها انها ترجع لها وتعمل على اصلاحه كان صائب




ويالله اللي بعده

:**

I7na 3shagnaha said...

تصدقين مشكلة هالدورات وايد خربت بيوت

انا اعرف وحدة اكتشفت روحها على عمر ال 48

بسبة الدورات!!

دقت بريلها و فركشت عشرة 28 سنة

ضاع البيت و العيال و الريل

و قعدت بشقة طرق الخدامة

وتقول انها جدا سعيدة

!!

fatto said...

اهم شي ان النهايه كانت سعيده :) خووش قصه كثري من القصص الحلوه الي نفسج :)

ARTFUL said...

ايي تعالي كنت بعلق على سالفة الدورات والكتب وهالسوالف

اول ما تزوجت قالت لي مرتي اقرا الكتاب الفلاني زين

المهم انا كنت بقلب الكتاب قبل لا تقولي عنه

قلتلها سمعيني يا بنت الحلال

الكتب والدورات والمواضيع الزوجية

زينه ،، بس

يظل هذا راي الكاتب او ملقي الدورة

راح يقول رايه بالحالات اللي مرت عليه

وبالتجربة اللي مر فيها ومن خلال قراءاته وبحثه اللي خذا فيه سنييين هذا اذا كان شخص مجتهد

بس أصابعج ماهي سوا

التجارب اللي شافها جدام عينه مهم انا وانتي

يمكن المره اللي شافها كان فيها بعض صفاتج وكان ريلها فيه بعض صفاتي

فممكن نستفيد منه بالشغلات الزينه وما نسقط جميع كلامه على حياتنا

فلما يقولج اذا ريلج سوه جذي فهو يعني هالشي فردي عليه جذي!!

هذا غلط

محد راح يعرفني كثرج

مع العشرة راح تعرفين ان آرتفل اذا طالع هالصوب فهو يقصد هالشي

واذا عطس بهالطريقه فهو يقصد شي واذا مشى بسرعه فهو يبي هالشي

!!!!

المشاعر والحب والحياة الانسانية ماهي آله

1+1=2

القبلة على الجبين عند فلانه مذله وعند اختها احترام وتقدير للزوج

مسك اليد عند فلان مهين جدام الناس ، وعند اخوه قمت الفرح حيث تظهر مرته حبها له جدام الناس

!!!!! وغيره أمثله كثيرة

ادري قرقت وايد

تحياتي لج ستووو فاطمه

:)

Pearl said...

يعطيج العافية ..
خوش قصة جدا استمتعت .. و عجبني حوار الأم و ولدها :) احس انه صجي
و حسيت النهاية صح و واقعية .. و
يمكن هالرجعة تكون اهيه البداية
والي الامام دايما :) ..

Super Woman said...

اوووووووووووف واخيرا

خيووس حرني بالبدايه

بس ترا يحبهاااااااا
لا تفرقينهم

Fahad Al Askr said...

بوستج علشان الواحد يقراه مثل ما كتبتيه، لازم ينام الظهر وعقبها ياخذ شاور ناعم يهدي أعصابه ويحلق، ولازم ينلبس له بدلة بوس رمادية مع قميص أزرق هادي وكرفتة حمرة، وساعة بولغاري مع بزمات جوميه، وجوتي أسود من غوتشي بس شرط يكون مو مبوز

وهذا كله ما يصير تمام إلا في يوم تهل علينا فيه ديمه، على شوية بريدات تشهي الواحد يدخن سيجار

الصراحة كلامج وايد وايد كلاس، كلش مو مال الكويت، ولا العالم اللي يقرونه هني، حسيت أبي الشتا ما يروح

الزين said...

اقول فطيم



اكو حجوة قالها فهد ما عجبتني



شفيهم العالم اللي يقرون البوست هني

!!!

Dalal Arch said...

One shouldn't marry someone and spend their entire life with the goal of changing that person. Here in Kuwait, we have a certain perception of what a marriage is and what a wife and a husband should be like. And we try to fit this person in the mold that the society created.
The differences between two people could range from habits and life style to beliefs and principles, some of them are obvious from the start and some take time to notice. If you love someone you should allow them to be the person that they are and not push them into an uncomfortable zone.

Anonymous said...

اصحي من ذكرياتي.. و اتذكر ان من سنين خلفت وراي هني شابه كانت تحلم بالسعاده مع انسان .. و ردت بعد عشر سنين واهي تحلم بان تتخلص من هذا الانسان

حبيت هالجملة فيها تناقض عجيب تعور القلب :(

:

القصة اكثر من روعة
واقعية جدا..
وانتي مشروع روائية لوير، بدعتي :)

Keep Up

monshg | مُنْشَق said...

صراحه يا لوير
لا أعلم كيف ابتدعتي هذه الحادثه
الله يهنيج على خيالج و بنات أفكارج
لأنه الصراحه الشخصيات
و الأماكن و الأحداث حدها
( ما ترهم ) ويا بعض كللللش

إما أن

(أن) الأبطال فيهم عرج مصري
أو) انتي متأثر بفلم مصري)

:D

daggero said...

لوير

الحين اللى فهمته أن علي طلع أهوه نفسه أبو عبد العزيز
ريلها

وأنا كنت أفكر أن علي أهو السبير اللى راحت تشوفه فى لندن
فى فندق الخطايا

الواحد فعلا لازم يصفى النية

ولد الديرة said...

لول

افا عليج

الله يا هي دعاوي علي

موضوع قعدة الصبح بروحه يبيله 7 بوستات

الله يسلمج انا انام الصبح واقعد العصر

هذي الحكاية لكن فيها قمندة طبعا

:)

تصدقين على كثر روحاتي لندن ما اعرف وين هالبويت
!!!

lawyer said...

الرتفل
لووووووووووول

اهم شيانك نص الحجي ما رقيته

انا راح ارد كل الكومنت ملوتك هني...

بالنسبه لطول البوست كل ما تمييت اقرا فقره في شغلات راح تلاقيها تعجبك

و عزووووووز رمز لعيال هالوقت لسانهم هالطوووول







وااااااي والله امس يوم قريت الكومنت مالك على قصه الاميل دمعت عيوووووني


والله جد لازم الريال يتذكر في كل مره قبل لا يغلط في حق زوجته او يتعامل وياها
انها كانت في بيت ابوهاااا معززه مكرمه مدلله


حتى لما المره تقعد بروحها و تذكر عزها في بيت اهلها و ريلها يصعب عليهااااا حالها و يكسر شي في قلبهاا

ويطيح من عينها ريلهااا الي ماقدر يصونها..







صاج والله في سالفه الدورات قووووول ليش لان مو كل شي ينطبق علينا
يعني في محاضر انجليزي يتكلم عن الذات و بلا بلا

عيششششته غير
تجاربه غير
حيااااته و اولوياته غير..

واحنا بالحياه عشان انتعلم و العلم ما يخلص بس مو معناته علمنا ناخذه من مصدر واحد ..


مو عيب نقرا بس لازم نقرا و نفكر و انفلتر ..

بقولك الصراحه سالفه و هذي السالفه يمكن كانت متعبتني وايد و بغيرها في حياتي بس حسيت عقب هالعمر ماراح اتغير عشااان دوره والا كلمتين سمعتهم
انا انسانه وايد وايد امي متعلقه فيني و انا علاقتي وايد كلووووز وياها و جدول حياتها مرتبط فيني

يعني تخيل ارد البيت الظهر اتغدا وياها .. نشرب شاي العصر ويا بعض و بعدين تسألني يالله وين بنروح اليوم.. او وديني او خنروح و من هالكلام..

رفيجاتي وايد ينتقدون هالشي
24 ساعه مجابله امج
24 ساعه تعطين من نفسج على حساب امج

واهما يدرون انا ماتهمني الطلعات بس يهمني اكمل تعليمي
فكلا يقولي 24 ساعه مجابله امج روحاي عيشي بره كملاي دراستج شوفاي دنيتج حياتج

حبيلي واحد جابليه هالطاقه الي تصرفينها على امج لو تصرفينها صح جان عيالج طولج..

بس اطلاقا ماسمعت كلام احد مو عشان انا وايد زينه..
عشان انا قلت مو معقوله ان البني ادم يكون اناني جداا ,, انا سافرت اكمل دراستي وخذيت دبلوما بعد الجامعه سافرت 3 شهور رديت لقيتها حايشها الضغط و السكر من الخوف و المحاتاات

فليش اخليها الحين عقب هالعمر عشااان بس انا بحقق شي كبير ..

الشاهد في الموضوع مو اني 24 ساعه لازقه في امي بس انا اولوياتي في الحياه والديني امي و ابوي و كل الي بعدهم طااف..

مع ان يالدورات دايما يقولون لي لا عادي وبلا بلا بلا

بس انااا طبقت الي انا بطبقه


قرقت على راسك اليوم..



:)





زيونااااا

سماااااااارت احبج لما تكونييين سمااااارت

فعلا اختصرت وايد تفاصيل
لاني حسيت اني طولت

شفتاي هالعزووووووز زوقه.. ابي مثله ..
هههههههههه




حيييييلج في فهووووود العكسر

تطنزززززززززززز علي لين قال بسسسس

بعدين يقول مو مال الي يقرون

مدري اشقصده يعني في الكويت والا في الحر و الخيسسسسسسسسه

بو لسااااان هالفهد ..

هههههههههههههه








احنا عشقناها
ويييييييييييي الحمدلله الذي عافانا
سعاده ويا خدامه و بشقه
و تلاقينها مصدقه روحها و بتقولج بحثت عن ذااااااتي و لقيت نفسي و اقوم الصبح اروح الجم و اعيش الحياه و بلا بلا بلا ...


الله يعينهااااا







فاتووووووو
تسلميييييييين


سكتاي الله يا اجرج عند الله اشكبرررررررررره

اليوم ريووووقي كلاب ساندويش ههههههه

دشيت عرض ادري بس كلا اذكرج






بيرررررررل

بيييييييييييييييييرل
هااااااااااااااي

لووووووووووووووونج تايم

اشلوووووووووونهج :***


شفتااااااي هالولد الي كان كومباااارس في القصه طلع اهو البطل
ياااااااحلو هالطله يا بيييييييرل

:)))


دوم مستمتعه انشاء الله







شلالاااااات

اي الفاشلين في علاقتهم مع حريمهم و فاشلين مع نفسهم و فاشلين بالدنيا من خيانه لي خيانه و من ضياع لي ضياع
اهما الي يتعلقون في حريمهم جذيه و لا يواجهون حقيقه عيوبهم

هذي بالنسسسسسبه له مو حب بالنسبه له كوفر بلانكت ..







فهد
لووووووووووووووووول

عرفت الي وقفت و تخصرتلك و طقيت بريلي و عطييييييييييتك نظره

اشتقصدددددد بالكشششششششششه

مو قلت لك انااااااااااا اعرفك عدل
مسويلي فيها شعبي و انت من كوباااااا سيجار
لي بدله..

عييييييييل بزمااااااااتك شومييييييه !!

يما يما يما
قالوها البنات تمووووووووت على التفاصيل ..


اقوووول بوستي كان ينفع الويك الي فات بالمطررررررره




لحظه لحظه

ياوييييلك من زيوونااا
تقووووووول شنو يعني قصدك مووووووووووو ماااااااااال العالم الي يقرووووووووونه

افا ليششششششش كويتين و قاعديييييييييين بالحرررررررر


الله يساااااااامحك

مبين اصلا من تعليقك انك مساااااافر
وين مسعسع؟؟

ARTFUL said...

اهم شي انك نص الحجي ما رقيته
------------------------

اكو حجي ينرق الله يهداااج

;p


المهم السعاده مرات الناس يشفقون عليج او ينظرون لج بنظرة المسكينه

شوفيها مجابله امها 24 ساعه ما تقدر تطلع وتحقق اهدافها!!!

انتي مرتاحه؟

مستانسه ؟؟

سعيده؟؟
حاسه انج بتحقيق رضى امج ملكتي الدنيا كلها؟؟

الواحد يسعى ويشقى ويتعب روحه علشان يحقق ما يشعره بالسعاده


فيلسوف زماني
آرتفل

;p

lawyer said...

دلااال

صاجه فعلا هذا الي حاصل في الكويت ان الوحده ما ايوزلها شخص الادمي فتموت عشان تغير من شخصيتيه ليش مدري

الاختلاف شي وارد و طبيعي و عادي ولكن مع الوقت كل شي بتجانس مع العشره مو اني اقرر اغير الادمي ..


خليني اقولج شي مره كنت اسمع دكتور ياي مقابلته اوبرا يقول عشان تنجح العلاقه الزوجيه لازم يكون جزء من السينجل لايف ماخذهااا الزوج او الزوجه في حياته الزوجيه ..

هوايته
او ربعه
واهني نقول جزء مو الكل ..




ليدي ريييين

شكراااااااا حياتي مشكوووره
واي ترا اكتشفت اني احب المدح :))))))





منشق
مدري اذا انت تعرف بلوقي من زمان او تقرالي من زمان لكن اذا عندك وقت افتح الارشيف و شوف قصصي المكتوبه في 2006 و 2007 و2008
اقرا جزء منها اذا عندك وقت بتلاقي ان البدايه غير النهايه

يمكن متأثره في الافلام المصريه او فوووزيه دريع ههههههه

بس على قوله وحده من رفيجاتي
في اليدايه تخليني اكره الريال
بعدين اكره المره
وبعدين اكرهم اهم الاثنين و اكرهج انتي وياااااااهم ههههههه








داجيرووو
هههههههههههههه
هههههههههههههههههه

مت مت مت من الضحك
لاااااااا بعلها بعلهاااا

كانت لها ويااااااه سوالف في هالفندق خطاياااا و غرامياااات و حب و عشششششششق

شسوووووووووووووي في مخك الي مركب على الاوربي ههههههههه


صف النيه







ولد الديره
ههههههههههههههه


انا ناطره ال 7 بوستااااات اشلووون الحين؟


ويييييه هالبويت في بارك ليييين

انت انوي ترووووووووح لندن ويا الاهل بسسسسسس و ادلييييكم اياااااااه








ارتفل
لووووووووووووووووووووول

ابيه غشيييييييت من الضحك
بسسسسسسسسسسسسس عاد لا تقعدلي على الوحده

تراااااااا شكل الادمي بايخ في الدوام و اهو غشيان من الضحك على كومنت و الناس كلها اطالعه عبالهم مينووووووووون


ههههههههههههه


اي الفلسفه اتيييييين اصلا

بس فييييه ملك الفلسفه عندنا بالبلوقاااااااااااات


سمبررررر هذا فيلسووووووووف

Hasan.B said...

Yeshrab!?

Fouzan said...

عوده موفقه ,,مشالله عليج ,, نبي القصه اليايه في ربوع سوق المباركيه وسوق السمج وتكون فيها عيوز تشوف شايب كانت تحبه قبل ستين سنه على ايام جبله :)

كاكاووه said...

لوير

ابدعتي وتدرين انا اقري القصه منصدمه

لانه فيه بالواقع حصه وعلي

حصه لها اسلوبها بالحياه وفيها دين وماترضي اتعيش غلط

وعلي صايع وعادي عنده كل شي ولا يحب المسؤليه

طبعا ماكان في بينهم حب
بس زواج عائلي
يربط العائليتين بمصلحه مستقبليه
دام 6 شهور مع بعض
وسنتين واهي معلقه
اهي تبي الطلاق واهو يرفض هالشي
وطبعا مابينهم عيال
ولا حياة زوجيه
حتى الاسماء صج
تبين الصج انصدمت واناااقري اقول اشعرفها فيهم

انا اتابع قصصج من سنه 2006 لج اسلوب واقعي ويعجبني
الله يعطيج العافيه
:)

monshg | مُنْشَق said...

للأسف توني أفتح عيني
على البلوقات عموماً و من ظمنهم بلوقتج

خلال إلقائي نظره خاطفه و سريعه
ما شاء الله ,, عامر بالحكاوي الخاثره

و إن شاء الله
ما أكره نفسي عقب ما أتابع مواضيعج
إذا تسلسلت بمنطق صاحبتج ,سالفة الذكر

:p

lawyer said...

صبااااااااااااحكم ياسمين
فجأه الصببببببح اشتهيت اشم ريحه الياسميييييين بس ماكو..





حسسسسسسسن


اي




فوزااان

شخباااااااااارك
؟؟
انت لووووونج تايم

ابيه من اشوف صورتك هذي اموووووت ضحك.. ياربي الريال معجب في عممممممره عاد الصج الصج انت مزيوووووووووووون ..

خرعتك مو؟








كاكاوه

وووووووووووالله وووووووووالله ما اعرف حصه و علي الي تقولين عنهم
بسسسسسسسسس صدمتيني انا اكثر قمت اضضضضضضحك


الحين بتشيييييييييحط على روحي !!


روحاااااي وراي حصه القصه بس قوليلها انا مااعرفهم موووووووووو ترفعون قضيه علي او شي

هههههههههههه


الله يحفظج و يجبر بخاطرج


صبااااحج كاكاوه لذيذه










منشششششق
انت لا تندمج في القصه وايد عشان ما تكررررررررررهني

هههههههههههههههههههه


تشرفت في مروووورك الخاطف :))

عــــــابره said...

اولا عندي وااااااااايد تعليقات على بوستات القديمه ..


سالفه الدوام ..
انا مثلح اعاني من سالفه فطور او ريوق الدوام مو عارفه شنو اكل
لاني اكلت وجربت كل شي

بالاخير هالايام اخذ ريوقي من البيت وسلامتج تعيشين

وانا مثلج حيييييييييل خاطري اقعد الصبح اتريق مثل العالم والناس و اروق واطالع تلفزيون واشيك على ايميلي
بس وييييييييين ياحسره بسرعه بسرعه

+++

اما سالفه القصه

جزء الاول قريتها للاخير وانقهرررررررت لانج عرفتي شلون تقطعين علينا
وانا كنت نايمه واقراها من الموبايل ترا

والجزء الثاني بعد قريته من الموبايل
بس بطوا جبدي هم الاثنين

هو شالاحب الجبااااااااار الخرافي عند الرجل الشرقي مااعتقد واحد يسوي جذيه مع مرته

يوم انه يحبها كل هذا الحب وراااااه مايحافظ على شرف حبها في قلبها

ليه يدنس حبها في قلبها بعلاقات عابره سخيفه

بس انقهرت منه
انا بدالها كان مريت يمه وقعدت بالبار اوريه اني عايشه حياتي مثل ماهو عايش بدون مايسال عنييي

وادوووووووووووس على قلبي

تراني حيل متحمسه على الرد
ولايفوتج قمت احفظ صفحتج بموبايل علشان اقراها بالدوام من الزهق واستانس

بعد شتبييييييييين

:)

Hashemy said...

لوير انا قلبي مع احبابي ولا يرضى يخليهم ;PPP

Fouzan said...

اي اوف حدج خرعتيني..وانا موجود على طول واتابع الاخوان دايم بس نادر مااعلق

sologa-bologa said...

دايما الرياييل مساكين
:)

ترا الزهيرية حق
فهد بورسلي

هذا للعلم فقط

mowa6en said...

تحياتي لعزيز وليخسأ بوعزيز .

فاطمه القصة جميلة ولكن مستوى الخيانه الي فيها يكدر الي ما يتكدر ، الحين أنا مار هني قلت أقرى تحلطم الانتخابات ورايك بالمرشحين والمرشحات الاحياء منهم والاموات ، بس ما حصل

تحاتي

Expatriate said...

اكثر شغلة عجبتني بالموضوع كله هي كلمة
" أسنسير"
زين لقيت احد يقولها بالسين نفسي مو بالصاد .. الحين الكل ينطقها بالصاد ولما انطقها بالسين يضحكون على ابو انها بدلية

ما دروا ان اصل الكلمة فرنسية وبالسين

باجر ان حاجاني عليها احد بقوله روح كلم لوير

NewQ8 Bride said...

اصعب شعور تعيشه المراة انها تتحمل مساوئ زوجها
حبيت اصرارها و بعد قلبي كسرت خاطري لو انا منها انهار الصراحة

بس اختلف معاها بشي

النهاية

شفايدة الحب ؟؟؟؟؟

القصة تينن و روعه و انا مشتطه هاليومين و حدها اثرت فيني :)

Yin مدام said...

واقع

أغلب الحريم تتحمل لين اييها يوم وتنفجر وبعدين تعاني من أمور عدة

والله يا لوير جنج تتكلمين عن حريم أعرفهم وقابلتهم بحياتي

أبدعتي في مقطع الأوتيل وطباع بعض الرجال في قلب المسألة على المرأة لإعتقادهم التام بأنهم مظلومين وما سووا شي وإن المرأة تغيرت فجأة !!

يعطيج العافية
وكملي متابعين
:)))

lawyer said...

صبااااااحكم

ورد

اليوووووووم غيم وناااسه



عابره
حي الله من ياااااااااااانه

هلا و غلااااا فيج


على الريوووووق زين تسوين انا مثلج بعد


وعلى القصه ابييييييه اعرف الحاله الي اتييج و تقرين من الموبايل شي متعب للعيييين و النفس


يا هلا وغلا فييييييييج






هاشمي
يااااااااااااا زين هالقلب
اي خلك جذي

:)))))))





فوزان

افا عليييييييك عن لوير الخبر اليقين
لا تخاف كل شي اعرف

:))))))






سلوقاااااااا

ياااااااااااهلا وغلا

واي بعد قلبي الله الله يجبر في خاطرك

اتصدق كل ما قريت تعليق اقوول ياربي ليششششش محد يااب طاري الزهيريه معنها معرووووفه


اشووووووووووووووووه انت بردت قلبي


اشرايك فيني وانا منقيتها نقوه؟؟







مواطن
هههههههههههههههههه

اهم شي الاموات

مليييييت لاعت جبدي من التحلطم والسيااااسه

وبعديييييين عيزنا نلبح في الوطنيه و الاوادم ركضه ورا الي يبوووووونه


يكفيني اني اقرالك واحس ان الدنيا اشوه فيها سيااااااسيين لي الحين يعرفون يكتبون و الدنيا السياسيه بخير..


شي طبيعي بتحلطم بس لي الحين ماحمى الوطيسسس ههههه









اكسبااااا

ياهلا وغلاااااااا

اصلاااااااا اهي اسااااااسهاااااااا بالسييييين

ماعلي من الكويتين الي يغيرون الحجي و سوهاااااا صااد


لااااااااا لاااااا بالسييييين

وبعدين اي اي احد يحاججك خينييييييي
اقنعه بالخزززز و التنزر

هههههههه




ها تزوجت والا بعدك؟


;PPpp




نيو برايد
حياااااااج الله
هلا فييييج


واي حدي اعرف شعور الواحد لما يعيششش القصه و يشتط و يعيش احداثها

اي والله صاجه مو كل شي الحب

الحب اصلا مفهومه الراحه والاستقرار بس اذا انتفى هذا الشي ما يكون حب يكون تعذيييييييب







مدااااااام ين

اهلا اهلا

ايييييي الريااااااااال كلا في النهايه يطلعج انتي الغلطانه وكلا منج
وانتيييييي الي سويتاي و خليتيني اسووووي

وانتي لو كنتاي عاقله ما سويتاااي جذي


يركنوووووووووووون عيوبهم و يفندوون عيبج و يشككون برووووحج



الله يساااامحهم


تحيااااااااتي لج :))

Ansam said...

yalla mita part III? hehehe