Sunday, June 11, 2006

مرت سنه وياكم ....


من جم يوم جيكت على تاريخ بدايتي في عالم البلوجرز


اكتشفت ان يصادف يوم 12يونيو


حطيت مسج ريمايندر


عشان اتذكرني


يوم اليمعه العصر رن المنبه ...سكرته و قررت ان يوم الاحد اعتكف


لا اطلع ولا اروح العصر اي مكان


ارتاح في البيت بس عشان شي واحد


اكتب بوست


احتفل بنفسي في هذا اليوم


صار العصر شفت فيلم رومنسي


ترا هذي احدى طقوسي للكتابه


يا اسمع اغنيه


او اشوف فيلم


والله مو مودرتنا الا هالرومانسه الزايده


الي عاد كلش ما اتبين علي لا شكلا و قالبا


المهم خلوني من التحلطم على نفسي


ما طلعت اليوم بس عشان استريح و اكتب عدل


سوري شوشو ما رديت عليج


سوري مرامي حقرتج


بس ما ابي اخلي احد يشوش افكاري


و لا عندي فلوس عشان اطلع ارووح السوق فليش اشيل التلفون و تطلعلي شوشو امشي

وديني السووق


ابيييييييه اشفيني بس اتحلطم


فطيم بلييييييييز


ركزي في بوست الاحتفال الاول و مسكي المكرفون و تحجي عدل


بلا شغل عيايز و تحلطم


حمدلله و الشكر هذا يزا رفيجاتج داقين يسؤلون عنج!!!



بصراحه خواتي و اخواني


فتحت بوستي الاول


ضحكت على نفسي وايد


طريقه الترتيب


طريقه الكتابه


كنت صج وقتها اجهل وايد شغلات


لكن الي كنت متأكده منه


هو رغبتي في الكتابه


دخل التدوين حياتي بمحض الصدفه


تسألوني اشلون


كنت اكلم رفيجتي فجر


قالتلي انها اتابع شي اسمه بلوج


قلت لها شنو يعني


عطتني الموقع و ادمنته


و كان بلوج الاخت حناحينو


و صرت اتابعه كل يوم


لين قررت اني افتحلي انا بعد بلوج


و يكون خاص لي بس محد يعرفه غيري انا و فجر


و فعلا كونت لي صداقات و ربع


و ناس افتخر في معرفتهم وايد


و ناس وايد ازعلت مني......



استمتعت في التدوين وايد وايد


و الكتابه كانت متنفسي الوحيد


كلش ما كنت ابي يكون لي ربع وايد او طريق للتعارف


كثر ما ابي يكون عندي متنفس


محد يعرفني فيه....


فضفضه .. تحلطم



الي اهو ..


سنه كامله شفت فيها وايد شغلات


ناس غالبا ممتازه و بعض الناس الشينه الي ينعدون على الاصابع


عرفت من خلالها خبرات وايد ناس غيري


اهتمامات ناس


استفدت من كتب


من قصص


من مشاكل مواقف


استمتعت وايد


اعترف اني ادمنت البلوج


من الناس الي حبيتهم وايد و كان اهني المدخل الي ان يكون عندي ربع


الاخت استكانه


تذكرين استكانه لما كنت امدح زعفرانج الي بالشاي


ههههههههههه


كنت وايد احب ناس و ما زلت احبهم



فعلا احبكم


صدقوني


احب كل شخص يخليني ادخل عالمه البسيط اقرا و استمتع


احب كل بنت و احس في دمعتها


احس في آهات بنات و هموم بنات مثلي


احب كل شخص احترمني او حتى ما احترمني



يكفي انه تقبلني


احب كل شخص نصحني


و نكر افكاري السوده


و وسوسه شيطاني


احب كل واحد ووحده انتقدني


تدرون ليش لانها ضيعت من وقتها و عطتني اياه


انا ما اهتم حق شنو يقولون عني وايد,,,,,, كثر ما اقدر انهم عطوني من وقتهم



احب كل شخص تابعني و ما علق


احب كل شخص يرسلي ايميل يعلق فيه


احب كل وحده وواحد صريح و بطها في ويهي


و قالي فطيم برستيجنا ما يسمح انعلق في

مدونتج خصوصا في مواضيعج الجريئه


و من الناس الي كنت ادخل و ما زلت اتابعهم و لكن الي صج اثرو فيني الاخت برووك


برووك انسانه تتقلب معاي في كل مود


على الرغم من ان سطورها قليله


و ما تحب الاضواء


و لكن سطورها تخليني ابكي مرات


وايد ناس تعرفت عليهم ...عن طريق تعليقهم في بوستي



اشكرهم .....فعلا اشكركم كلكم


ترا وايد احبكم والله العظيم


مرت سنه الحين

فيها احداث بحياتي كبيره

افراح و احزان


مدري ليش ماني ذاكره الفرح الحين


لكن دمعت عيوني على الاحزان


وفاه بابا جابر الله يرحمه


هز كياني هز


هذا الانسان الي عمري في حياتي ماراح انسااااااه لو شنو


بظل طول عمري احبه و لا راح اكف عن الدعاء له بصلاتي


احبك بابا جابر انت احبك و يمكن ااكثرهم



فراقك صعب


مو مسأله حاكم و شعب


بس فراقك ضييييعه والله ضييعه


سببت لنا فرييييييييه كبيره


محد قادر يسد مكانك و لا يمليه


تشتتنا من بعدك شتاات الايتام


انا ما اعرف في عالم الاموات وايد


بس اكيد انت حاس فينا

يالله يا رب اذا الاموات يحسون فينا يا ربي لا تخلي بابا جابر يشوف حالنا

و ضياعنا من

بعده


خله يا ربي مرتاح في مماته


شقيناااااااه طول عمرنا في حياته


يا ربي ريحه في مماته


بابا جابر احتاجك


و احبك اكثر مما احتاجك....


هذا غير اكثر من حاله وفاه قريبه لي في العايله


خلتني احس انه عام حزن و لكن الله كريم الف حمد و شكر....



خلوني اروح اشرب ماي و ارتاح لاني احتاج اخذ راحه


عرفتو ليش الحين ما طلعت اليوم لان ادري بطول وايد في هالبوست



بااااااااااااك


عوده لكم اخواني و خواتي


رحت تعشيت و رجعت


اكمل لكم هذي ذكرياتي هالسنه


اجمل ما في ذكرياتي انها مسطره يوم بيوم


حبي

جنوني

ضحكي

مودي التعبان

كله مسجل و موجود

غضبي

حنيني

ولهي

هم موجود

قصائدي

مشاعري تجاه من احب


هذا سجل واحد في الدنيا


الله يعينه على الاخره


اخواني و خواتي


اسفه طولت عليكم وايد وايد


لكن كل الي بوصله لكم


حبي لكم


سعادتي في وجودكم


و معاكم


ترا انا بالذات السعاده عندي لها معنى اخر


شغلات بسيطه تخليني اضحك لساعات


مسج ممتعه من وحده اتضحكني


سعادتي تكون في مع لمه حلوه في مكان سكه مثل المباركيه


او شي بسيط


كل شي بسيييييييط يسعدني و يمتعني


تمشي في السياره


و حركاتي الي اسويها حق راعي الباص لما

اطلع نص جسمي من الدريشه و انا اصرخ عليه و


ريما تسحبني مفتشله ادخلني تخليني اضحك وايد


و تغير يوومي


ريوقي يوم الخميس مع ريما في بيتنا على فول كناري و بصل


يخلي ويك اندي ممتع جدا


هوشه في الكومنت مع مشاري


تضحكني و تسببلي سعاده


شغلات وايد مالها اول و تالي



مثل تأجيل مباراه كره اليد بسبب عطل المكيف


خلاني اموت من الضحك


و خلاني افتشل و اضحك طول اليوم


تناقض كلام عصام الدبوس و ربكته امام خالد الفضاله


شغلات وايد تضحكني


احبها

تسعدني

و هذي سبب محبتي لكم


في النهايه قبل لا اشكركم


اعتذر حق كل شخص سببت له ضيق او كدر من غير قصد


او على غشمره


اعتذر لكم


اشكركم لوجودكم في حياتي


في عالمي


في هلوستي و بين سطوري.....


نهايه...


و لكن بالنسبه لريما


ما حبيت يكون شكري لج مع كل ربعي


انتي لج شكر ثاني من نوع اخر شكر خاص


اشكرج اولا على انج عرفيتيني في نفسج


اشكرج على انج دخلتيني عالمج


اشكرج يا ريما على كل شي سويتيه


على كل طلعه حلوه


مسج حلو


تمشينا بالسياره

مغامراتنا

ضحكنا و مشاويرنا

حتى الجمعيه وياج غير


لحد يعتقد فيكم ان انا و ريما 24 ساعه متجابلين و ضحك


اصلا انا كلا متعسره و لي مزاج خاص


اول ساعه ساكته


ثاني ساعه سرحانه


ثالث ساعه انا في البيت


شفتو اشكثر متحملتني هالبنت

؟؟؟


احبج و هذي اول مرا اقولها لج


صح؟؟

احب عيالج

و بنتج



احب كل الناس الي عرفيتي عليهم و اشكرج عليهم


ريما اعتذر لاي شي صدر مني


ضايقج بسبب او بغير سبب


اي لا تستغربون انا وايد اضايقها


لاني كلا مفشلتها


في السوق و جدام الناس


عادي اكاسر في الجمعيه


عادي و اهي تقيس البدله في غرفه التبديل انا اكون متهاوشه ويا الي تبيع و اخرب عليها


عادي ....


اشكرج على كل شي


و اكثررررررررررررررررررر شي في هالدنيا اشكرج عليه اهو اختي الحبيبه الي اموت

عليها



ناديه انزاحاا


ريما يالله باي خلصت قلتلج وايد كلام حلو


الحين بستلم ناديا


حياااااااااااااااااااتي ندويا


انتي عاد عالم الفكاهه الي انا مصدعه راسج


احبج وايد و ماراح اشكرج على الخساير الي خسرتيها في دفع فواتير الموبايل


الي نقعد نسولف بالساعات ويا بعض


هاهاهاهااها


مسكينه ايا ناديا متحملتني كل يوم انصااص الليل اهذر على راسج بالساعات


والله انتي حنوووووووووووونه

و مظلووووومه وايد


للاسف يا ناديا وايد ناس ما اعرفو قدرج تدرين ليش لانج دره و محد


يستاهل رفجتج


الا الي صج يحبج من قلب


قصتي مع ناديا فلم مصري


ادق عليها كل يوم الساعه 12 بالليل اصك راسها لين تصدع و تروح تنام


شوفو انا ما استحي انزين !!


عقب ما اهذر و اخلص



اقولها ندويا

ترا مو حلوه باجر واحد يبي يخطبني يدق على

الوطنيه يشوف عندي مكالمات نص اليل يقولون له


اي ........!!!!!!!!!!!!!!

تصرخ علي من قمه راسها

والله محد طقج على ايدج و قالج دقي علي!

هاهاهاهاهاهاهاههاا

حيااااااااااااااتي هالبنت

مشكووووووووووووووووره عمري

اثبتيلي وايد ان معدنج ذهب

اصيييييييييييييييله

و اشكركم ربعي كلكم


و احبكم

ملاحظه :
بوستي طويل يحتاج 3 ايام تقرونه

يومين تستوعبونه

لاني دشيت في مليون سالفه

41 comments:

Яeema said...

كلمة صدق و من داخل قلبي بقولها

تحسفت علي كل سنة مرت بدونج

و حبيت البلوغ لأن الله رزقني إبإخت إللي ربج ما رزقني فيها

كل الأشياء إللي تطلع منج حلوة و عسل علي قلبي
لما تسرحين أتحلي عليج

لما تتهاوشين
لما تتحلطمين

حتي لما زعلتي عليي
كنت أتحلا عليج و أفرح إني مهمة في حياتج

دمعت عيوني
ما أقدر أكتب إزيادة
الكلمات و التعبير ماراح توفيج حقج يالغالية

الله يباركلج بحياتج يا رب و يوفقج

بعد عمري والله إنتي

nice said...

مقالج طويل لكن الله يهينكم لبعض انتي وباقي المجموعة كلامج كله وفاء لهم

Mohammad Al-Yousifi said...

كل عام و انتي بخير

أولا سوق المباركية مو سكة

ثانيا شدعوة ماكو كلمة شكر او اعجاب او تقدير أو حتى تسفل فيني؟؟

ليش؟؟

Unknown said...

كل عام وبلوقك وانتي بخير

NewMe said...

عقبااااااااااااااال العمر كله
البلوغ فعلاً عالم غريب ورائع
والأجمل لما يتحول إلى واقع تعيشينه ويعيشك
جميلة صداقاتك
والأجمل إعترافك بدورهم في حياتك
الله لا يحرمكم من بعض

ودامك اتعرفين ناديا انزحا
احب ارسل لها تحية
وأقول وحشتينا
مكانج خالي

مع أطيب التمنيات

PearL said...

لوير:

ماتدرين شنو احساسي وانا اقرا هالبوست
حسيت اني مريت بالمراحل اللي انتي مريتي فيها
يمكن خيالي راح بعيد وايد
لاني يديدة على هالعالم
وماعرف شنو يعني بلوغ يتسمر معاج فترة طويلة

كل عام وانتي بخير
وكل عام ومدونتج بخير

مواضيعج جدا رائعة
ومدونتج عندي من افضل المدونات
واجمل ما قرأت فيها
خليج دايما جذي
والله يخليج حق ريم ونادية والباجي

Si7LeYa said...

صج ان مدونتج طويله بس استانست وانا اقراها حسيت بشفافيتج وشلون انج على نياتج وعلى طبيعتج وهذا احلى شي بالنسبه لي ان الانسان يكون على طبيعته

الله لا يحرمج من رفيجاتج ان شاء الله ويخليكم على طول لبعض

وكل عام وبلوقج بخير

;)

.. تحياتي ..

lulu said...
This comment has been removed by a blog administrator.
lulu said...

كل عاام وانتى ابخير وعقبال 100 انشالله
تاثرت وااايد فطوم صج كتابتج حلوه احس انى قاعده اقراه حق نفسى
ما ادرى انا كل اقولج فى وايد شغلات نتشابه فيها
عسى الله يوفقح انشالله بكل خطوه تخطينها :)))

3ateeja said...

سعيده لسعادتج
بس شالسالفه
ما يعلقون على مواضيعج الجريئه مادري شنهو
؟؟ا؟؟؟؟؟؟؟
استغربت
داشين بلوق ولا صالة قمار
والصراحه سالفة شلون تعرفتي على ريما اعتقد اهي احلى حدث صارلج بلبلوق
لأن اذكر السالفه زين
وظحكتني وااايد وااايد
وحتى ذاك اليوم طرت على بالي ,,وهم ظحكت على التعليقات اللي يتكم :)
بس ترى مو الكل يصير مثل ريما حقج
والله سأليني انا
حافظي عليها وترى تستاهل كل خير دامج حبيتها هالكثر
اما ناديه فقيره مسكينه
لاتعلييييييييييق يا حلوها بس

R7eeq said...

من فتره طويله وانا اتابعك عن بعد ...

ولكني اليوم مسروره بمصافحتك ..

لك قلب بحجم السماء وروح رائعه ..


كل عام وانتي ومدونتك بخير ..


لا تحرمينا من كلماتك واطلالتك ..

كوني بخير ..

ii said...

فطووووم كلامك مؤثر .. يمكن لانه طالع من القلب للقلب مباشر

كل عام وانت بخير .. الظاهر كلنا مابينا فرق انا بعدك بكم يوم
:)

الحاجب المنصور said...

كل عام وانتي بخير .. والمدونين والمدونات ..

والله يخليكم لبعض مدى الدهر

Q8Lioness said...

كل بلوق وانتي بخير وانا والله استمتع ببلوقج احسج انسانه على نيتج ماتتصنعين
"كلام نابع من القلب والله شاهد"

الله يوفقج

نون النساء said...

امبيه فطوووم


اشوي وابجي انا

كلامج وايد مؤثر

ويدش القلب سراحة



.
.
.

عسى الله لا يخليكم من بعض ان شاء الله


:)

neelaah said...

وايد مؤثر الكلام اللي قلتيه

انا سعيده بوجودج

و لاحظت انج انسانه صادقه
علشان جذي انا و بلا حبيناج


و يا مجرمه
ذكرتي الكل
الا احنا

هذا و احنا قاعد اندور لج على ريل
خلاص محرومه من الريل اللي من صوبنا

اتقشمر معاج
كل عام و انتي بخير
و كل عام و انتي اكثر صدق
و اكثر تحليق
يا عصفورة البلوجات

Diver said...

اولا انا اشكرج على انج خليتينا نتعرف عليج من المدونة هذا كان شرف لي شخصيا
ثانيا اذا كنتي تحبينا فالكل يحبج ايضا و يعز علينا اي شي يضايقج
ثالثا راح نكون موجزدين يمج اذا احتجتينا و السنة الياية اتمنى اني انافس ريما على المركز الاول في الشكر(حرة ريما)
رابعا الله يخليلج ريما و نادية و كل ربعج و الطيب مايعرف الا الطيب لان الطيور على اشكالها تقع
اخيرا و ليس اخرا مشكورة على كل ضحكة او ابتسامة او حتى لحظة حزن يت من قراءة مدونتج و هذا الشكر بس لان الشي حتى لو كان مو حلو مثل الحزن يكون جميل لان ياي من شخص مثلج

bo9ali7 said...

كل عام وانتي بخير..
:)

esTeKaNa said...

اليك:
الى الانسانه الشفافه
العفويه
الراقيه
البسيطة
الحنونه
المزاجيه
العاشقه والرومانسيه
اليك بكل جنونك،ورومانسيتك اللذيذه
كنت اتمنى ان اجد كلمات تصف فعلا احساسي بكلماتك ،تصف مدى تأثري بذكرك لي بين كلماتك العميقه الجميله الصادرة من القلب مباشره الينا

معك انتي بالذات كنت لا اتكلف بالرد،اعبر عن ما يجول في خاطري فعلا
كنت اشعر بانك بالذات تفهمين ما بين السطور:
تفهمين حيره قلبي،لوم نفسي،تقلباتي
التزامي،فتوري،كأبتي،وتفاصيل كثيرة سردتها عن حياتي

كنت وما زلت استمتع ببوح نفسك:
من هذيان الحزن فيك الى جنون فرحتك
من اشواقك الى المك
من ضحكتك الى دمعتك

سنه مرت افتخر فيها باني كنت وما زلت من اكثر الناس حبنا لفضفضاتك
لبلوقك الذي هو مساحة من روحك

تجمعنا الحياه بالكثيرات
ولكن الدرر كن وما زلن نادرات:
لوير،ريما،ناديه وبروك
انا فخورة بمعرفتكم
مع ملاحظة مهمه:
اني اصغركم
:pP~


فطومه:
الله يحفظج ويشرح صدرج ويرزقج خير ما كل ما تتمنين،وعسى الله يسعدج دنيا واخره ولا يحرمنا منج

فارس هوى الكويت said...

كل عام وانتي ب1000 خير اختي

وإنشاءالله تحتفلين باليوبيل الذهبي
وانتوا مع بعض
والله لايفرقكم عن بعض :)

تحياتي وعساج على القوه :)

lawyer said...

واي تعليقاتكم عجيبه اتيين

تعليقاتكم بجججججججججججتني

يا بختي
فييييييييييييييكم


احم احم اجهز العده عشان اتفرغ للرد عليكم واحد واحد

lawyer said...

ريما من البدايه صعبتي على الموضوع كلامج خلو وايد ادمعت عيوني

برووحي ذابحتني الحساسيه و طول اليوم افرك في عيوني
و تحرني

حياتي انتي والله

حياااااااااااااااااااتي

اي لما اتحلطم
تموتيني من الضحك انا اصرخ و انتي تعطيني نظره تبتسمين وتمشين

ههههههههههههههههه
حياتي انتي بعد ماكو يوفيج حقج


بس ببجي شنو هالنكد وراي 22 كومنت تو الناس من الحين اصيح


نايس

اشكرك و اعتذر على طوول بوستي

شسوي فيني هذره و هذا حدث مهم في حياتي
و كل بحاول اوفيه حقه




كلا مطقوق

عاد انت بالذات الي انا لازم اشكرك شكر خاص على كل وقتك معاي في نصايحك لي

انت الوحيد الي تدري شقاعده امر فيهه و محد مخليني اطول بالي الا انت

اشكرك دكتوري النفسي و الاجتماعي


ماعاش من يسفل فيك

اي اموت على المباركيه


عاجل

و انت بصحه و سلامه
شكرا على مرورك
لا تقطع

menew

شكرا لج حياتي اجمعين
اي والله اعترف اني ما اوفيهم حقهم اهم سبب سعادتي

امين يا رب
انشاء الله اوصل سلامج لندويا

lawyer said...

بيرل
الله يسلمج و يخليج
مشكووره على مشاعرج الحلوه الصافيه الي مثل الؤلؤ
اشكرج كلامج يحرجني وايد وايد

انشاء الله بكون دايما طبيعيه لاني ما اعرف اتصنع شي


سحليه

حيا الله من زارنا
مشكوره وايد على كلامج
اخجلتم تواضعنا

اميييييييين يا رب ويخليلج كل عزيز




لولو

حيااااااااااااااتي

عاد انتي ماي سول ميت من كثر ما انا و انتي متجابلين خلاص تفهميني من عيوني

ماله داعي اتكلم

اتحسين فيني بكل شي

اميييييييييين يوفقنا كلنا يا رب




عتيجه

اشكرج على سعادتج حياتي
اي شففففففففتي ما يعلقون مدري
بس يالله كل واحد و ظروفه

اي انا مدري ليش لما اسولف اشتط وياكم جنكم جدامي


و أأشر و انا اسولفو اكتب
ههههههههههههه

اي والله مو الكل مثل ريما و ناديا

حياتي هذولا

lawyer said...

رحيق

حيااااااااااتي
ايدج كلها دفئ و حنان اشكرج وايد

مشكوووووره كلامج يخجل

قاعده اقراه اكثر من مرا
فخووره انا بسطوركم لي
والله هذا رصيد عجيب اغلى من كنوز الدنيا




سعلوه
حياتي نوره ما قصرتي والله اي والله يشهد ربي من القلب

اي كلنا نفس التوقيت




الفلاح
امين يا رب اشكرك وايد


كويت ليونز
حياتي انتي
من طيبج والله

الله يعلم بنيتنا كلنا
كلامج يخجل
شكرا على مرورج و تعليقج

وايد مشكووره





نون النساء
اول شي لا تصلحين الكي بورد لان اينن عليج حرف السين
هههههههههههه
مشكووره انتي قلبج ابييض عشان جذي يدش قلبج كلامي

اصيييييييييله يا سعاد





بلا و نيله

انا اسعد في وجودكم انتو بعد ما تتصورون اشكثر استمتع وعاكم
انتو اسلوبكم غير
كلامكم غير
افكاركم مدري من وين اتيبونها
انااااااااا ادمنتكم خلاص

تحبكم العافيه


والله انا ذكرت ريما و ندويا عشان ربعي في الصج قلت لو بكتب اسماء البلوجر يبيني يومين اكتب ماني قادره اوفيكم حقكم


بس والله اعذرووووووووووووني
مو نسياان
بس مدري

عجبتني عصفووره البلوجات
حبيتهااااااااااااااا

lawyer said...

diver

ما تقوليني من وين اتييب هالحجي المصفف

وايي كلا تحرجني و تخليني اصدق نفسي
ترااااااااااااااا كلامك حلو

و الشاعر يقول الغواني يغرهن الثناء

ترا موديلي اتششششششقق من كلامك شوي شوي علي

والله انا لي الشرف اكثر

ما تتصور اشكثر الواحد لما يكب ناس اخلاق و سنعين مثلك و يكتيب من خبراتهم اشكثر يستفيد

انت امتعني في كل مواقفك معي
نصايحك
تعاملك الراقي
انا الي مشكووره
وايد



ناديا
اشلون ما احبج

اكيد انتي اغلى من هالكلام
ههههههههههههه حياتي انتي انا بعد افصل فصله وياج

انا استحمل مودج لانج مستحمله سرحاني


بسسسسسسسس فشلتيني كلا تتحلطمين علي

انا العيوزه الحين ز الا انت؟؟


حياتي انتي

شقوووووووووووول بس فشلتيني كلامج اليوم صاير حلو مو عادتج
كلا مهاوشتني
ههههههههههههههههه



بوصالح و انت بصحه و سلامه
مشكوووووووووووووووووووور




استكانه
واي واي واي شالحجي هذا كلا لي ؟؟؟
ترا والله شكله بكفيني سنه كامله و انا اضحك من الوناسه
كلماتج راقيه مثلج

يخجلني
يفرحني
و بالحرى طيرني من الفرررررررح

اي والله رفيجاتي درر

كل شي قلتيه حلو يا استكانه
الا شغله وحده اتمنى ما تعيدنها و اتذكريني بانج اصغر مني و انا انا عيووووووووووووووز



لانج راح تخسريني طوول عمري اعااير ندووي و ريما اني صغيره اندر ايج


طلعت يمج عيووز مشكله!!!!




فارس هوى الكويت
حياك الله
انت وينك من زماااااااااااان عنك؟؟
شكرا و انت بصحه و سلامه

امين يا رب و يخليلك كل غالي
تسلم

layal said...

الله يعطيك يا فاطمه علي قد نيتك
عجبني هذا البوست وايد

عندي لج شي في مدونتي -لا ترديني فيه

lawyer said...

lyal
شكرا لج حبيبتي
بوستي الياي انشاء الله عباره عن اسألتج

:)

Unknown said...

يالعيوز سنة بلووووق
ويييييييييييه

سنة وانا متحمل ثقالة دم وملاقة ونجرة وعوار راس وقمت اخذ ابر ضغط بسبتج
عمى حتى عمى بعين العدو
كيفى :P

فطييييم شوفى انتى ما ذكرتينى الا بالهواش بس انا متأكد ان انتى تدرين معزتج كأخت عزيزة وغالية واحترمها على الرغم من اختلافى معاج مرات بس انا مؤمن انا ما محبة الا من بعد عداوة :)
بعدين شوفى لعلمج انا ادرى انتى شلون تفكرين وادرى انتى شنو تبين وشنو اخلاقج شلون محترمة وبنت ناس
الجنون بالكتابة شى والافعال بالواقع مهما الواحد يسوى شى :)
تحياتى وودى اكتبلج ولا اوقف بس مجرد ذكر اسمى بينت مكانتى عندج كصديق واخ يعزج وايد وايد :)
تحياتى المعطرة بكلنكس ديتول معقم

3ateeja said...

عتيجه

اشكرج على سعادتج حياتي
اي شففففففففتي ما يعلقون مدري
بس يالله كل واحد و ظروفه


ههههههههه تدرين شاللي ظحكني
كل واحد وظروفه
طرى علي سمير غانم يوم تقوله شيرين جد حبنا
جان تقوله بس جد حولان
قال لها ظرووووفه بئىىى
هههههههههههههههه

الاء سعود المجيبل said...

كل عام وبلوقج ابخير...^___*

حلوه مشاعرج اللي كتبتيها والله يخليكم لبعض...:)

طائر بلا وطن said...

كل عام و انتي بخير يا لوير
:)

لوير اكشن و اصل فريد من نوعه ماله نسخ :p

لوير قلب طيب جدا جدا جدا جدا

عفوية و صريحة الى آخر حد

فيها فزعة و نزعة كبيرة للخير و اصدقائها

ذكية و لماحة و متربعة في عقل الرجل
:D


و خفة دم ما يختلف عليها اثنين
:)



كل احترام و تقدير و معزة احملها لك في
نفسي و هذا الكلام ابد ابد ابد مو مجاملة

سلام يا لوير
:)

مأمون المغازي said...

كل ألف عام وأنتِ مدوِّنة بين كل من يحبونكِ

كل تدوينة وأنتِ رائعة

كل بوح وأنتِ صادقة

كل زيارة وأنتِ مكرمة

أتمنى أن تكوني دائمًا برقتكِ وحضوركِ الراقي إسعادًا لكل من عرفكِ

دُمتِ بود

تحياتي

lawyer said...

مشاري
ما تتصور سعادتي و انا اقرا انك بديت تاخذ ابره ضغط بسبتي

احسسسسسسسسسسه انجاز لي في حياتي

اني مرضتك
هههههههههههه

احلى شي عمى حتى عمى
هههههههههههه

عجيبه

lawyer said...

عتيجه

ههههههههههههههههه

ظروفي و خلاص ما اتحبكيهااااااش


كويتيا

شكرا لزيارتج

تشرفنا
شكرا حياتي ما قصرتي

امين

lawyer said...

طائر بلا وطن
بصراحه بصراحه سرحت وايد في الكلام الطيب الي قلته

و طرا على بالي شي واحد

الحمدلله على ما تعلمون و الشكر لله على ما لا تعلمون

الله يرضيك و يسعدك يا رب

و الله الواحد يجزل من طيب كلامك

شنو اقدر اقول غير شكرا
والله ما اعرف
انت في الاسلوب وايد غالبني
ما اقايشك كلش

lawyer said...

كيتي

حياااااااااااتي
مشكووره انتي بعد

ابيييييييييه حدي ولهت عليج
مكانج امبين والله

بعد روحي والله انتي يا الغاليه

انشووووووووووووووفج على خير


ترا ببجي بس خلاص


مامون المغازي

حياك الله اخووووووووي
اشكرك جزيل الشكر
على رقه مشاعرك
و انت بالف صصصصصحه
يا رب
يخلييييييييييك
شكرا شكرا

Eb9ara7a and his Wife said...

yayeenech o 7abeen enbarik
o 3asa halMinbar ykoon lelkheer Cause ele naktiba o ngoola o nsaweeh yish-had lina aw 3aleena belAAkhra

emwafiga u o kil ele t7ebeenhom

lawyer said...

شكرا لكم وايد على ييتكم

ما قصرتوا

انشاء الله يا رب
مشكوووووووووووره وايد عمري

Unknown said...

سؤال؟ ليش تحبين تاخذين الكلام الموزين منى مع انى كاتبلج حجى وايد زين ؟
ترى انا خوش ولد بس صيرى انتى حليييوة :P

lawyer said...

شسوي هذي متعتي يا مشاري اني ادااحرك

qalm-jaf said...

كــــــــــــــــــــــــل
عـــــــــــــــــــــــــام
وأنــــــــــــــت
بخيــــــــــر
(:
----------------
يافطووووووووووووووووم
(: