الحب اهو ؟؟

في البوست الي فات و تحديدا تعليق الاخت كويتيه

اسألتني قالتلي لوير ابيج انتي تقولين لي شنو الحب بالضبط؟؟

ما حبيت ارد عليها في التعليق من كثر ما عجبني سؤالها

باختصار انا اشوف الحب في هالصور البسيطه

الحب عندي

الحب اهو الراحه
الحب هو اتفاق العقل مع رغبات القلب
الحب انج تعطين
الحب انح تصبرين
الحب انج تتحملين و انتي مستانسه
الحب انج تتمنين ما يفارقج هذا الانسان
الحب ان اول شخص يطري عليج لما تقومين من النوم
و اخر صوره تروح من بالج قبل لا تاخذج الغفوه
الحب ان عينج على الساعه طول الوقت و تحسبين قومته و قعدته
الحب تبين تكونين وياه وين ما تكونين
الحب انج تمتلكينه
الحب انج تغارين عليه حتى من الجماد
الحب انج توقفين وياه
الحب انج تتعذرين له كل ما خطى في حقج
الحب انج تشوفيه زعلان عليج و تزعلين من نفسج
الحب انج تبجين بين ايده و اول ما يرضى عليج تلمينه
الحب ان تكون بوسته على راسج اثمن تاج الماس تلبسينه
الحب انج تصيرين مينونه لضاق خلقه
الحب انج ودج تمنعين عنه كل شي يكدره
الحب انج تبلعين سم الغيره عشان ما تضيقين خلقه و اهو متسانس يثير غيرتج
الحب انج تكونين عنده كل الدنيا

الحب انج فخوره فيه

الحب انج تتمنيه ابو عيالج

الحب انج تتمنين انه يكون معاج الليل و النهار
الحب عندي ماله تفسير

و لو بكتب من اليوم لي باجر ما اخلص

احبك

احبك

ايه

احبك

ما قلتها

بس تشوفها

احبك

بو براهيم

والله احبك

مو شرط اقولها

بس حسها

يشهد الله احبك

مالي غيرك

و اشلون ما احبك

ما قلتها لك

بس احبك

المدير الملقوف

شنو يعني لما المدير يسأل موظفه ليش ماخذه مرضيه عسى ما شر؟؟

خصوصا اذا المرضيه يوم او يومين و تالي الموظفه اداوم بعدها طبيعي ؟؟

شنو يعني يدق المدير الساعه 8 الصبح على المو بايل يسأل وينج !!

او يخلي السكرتيره تتصل و تطلب السكرتيره تحويل المكالمه له

تبون الصراحه قله ادب

لان طالما الموظفه ما داومت يمكن ظرف

خصوصا اذا متزوجه ..عيب

انا صارلي موقف

عندي مدير وايد قليل ادب و يناشب

دقت زميلتي قالتلي فاطمه بليز قوليله(( حق المدير )) ابي اجازه شهر انا حامل

و منسدحه على ظهري..و اعاني منالنزيف..

دشيت عليه.... بوفلان هذي اجازه فلانه ...تعبانه و حامل..

دش معاي في جدال ان كل حريمنا يحملون ..

قلت له البنت تعاني من نزييييييييييييف

الموقف الثاني

والله اهو وايد يبط جدبي ووقح

و كل بنت تدش عليه ساعه يحقق وياها على الطبيه

قمت انا دشيت عليه

سألني عسى ماشر اشفيج طبيه ..؟؟

انا : مريضه ..

هو : سلامتج .. اشفيج مريضه ..؟؟
انا : ظرووف
هو : شنو ظروفج
بعد ما فار دمي ..رديت عليه .......(( الدوره

من يومها بطل يسأل اي بنت ليش ماخذه مرضيه ...

عندكم مدير قثيث يسأل عن كل شي؟؟

اللهم اني اعوذ بك من زوال نعمتك وتحول عافيتك

وفجأة نقمتك وجميع سخطك

اشكرك

غروب
غيم
وحشه

وحده ...
عزلتني
.خلتني افكر وايد
جابلت الغروب
قعدت معاه بروحي
قعدت معاه و اهو مو موجود
مع طيفه ؟.
او مع كلماته
آآخ يا كلماته
اتحير
مرا اتحسسني اني رسيت
و مرا تحسسني ان احتاج ابدا من يديد معاه
مرا اهرب
و مرا اقرب
كل الي اعرفه الحين اني احتاج احضنه
احتاج اسمع نبضات قلبه
بعد ما غابت الشمس
و اظلم علي المكان
و مازلت انا وحيده
اخذت قلم و كتبت له
هالكلام ..
اتهقون راح يعطيني الي ابيه عقب ما يقرا كلامي
مابي شي كافي علي يلمني

الى الغالي :
اشكرك اشكرك من كل قلبي
الى من رجع لي توازني
الى من رجع لي قلمي
الى من غيرني

اليك

كل شكري

معاك كل شي له طعم ثاني
اشكرك من اعماق قلبي

انا سعيده
سعييييييييييده فيك
سعيده معاك
الله يخليك
لا تخذلني

خلني سعيده بين ذراعك
يكفيني
صدقني
يكفيني
لانك انت تغنيني
عن كل شي

ياااااه
حضن
يريح
جذي

اختلفنا

لوبي

واقفه في الاسنسير مع بنتي
يفتح الباب ...
تزرق مني بنتي بسرعه
تركض ..
ما يوقفها الا انها دعمت بريول واحد
اجندس امسكها و ارفع راسي اشووفه ..
اخترع..
يرقع قلبي ..بسرعه بسرعه
اطلع اتجهه لي باب الفندق
اقول بقلبي
ياكرهج لما تتهيليقين في السفر
واي شافني عقب هالسنين
جذي و انا ويا بنتي ولويه
و انا انطر التاكسي اطالع نفسي في الزجاج
اعدل شعري
الفه عدل
احط حرتي في بنتي ازفها ..
اركب التاكسي و اروح مشاويري
و في رجعتي اتوقع اني يمكن اشوفه
اعدل عمري
ارتب نفسي
اتعطر
احط جلوس
ادخل اللوبي
اتلفت يمين و يسار
ادوره
ما الاقيه !!
اروح الغرفه
و احساس بخيبه امل
اقعد شوي
زوجي يدخل راد من الكورس
اقعد معاه
يطلب مني اتصل في الروم سيرفس لانه ميت يووع
امل: اشرايك ننزل اللوبي نغير جو و تاكل تحت عشان ما تصير ريحه الغرفه اكل ..
فيصل : براحتج بس ما نطلع من الفندق لاني دايخ هلكان ..
امل : اي اكيد تحت ناكل و عشان سارا تاكل ايس كريم بعد
فيصل : ادش اخذ شاور و اطلع ..
اركض اسحب جوتي سارا..و البسها
من ورا الباب اقوله
ترا احنا نزلنا تحت قبلك ناطرينك في اللوبي انت اخذ راحتك
انزل تحت اتمشى
احووس
على امل اني أشوفه
اروح المكتبه .. احوس في الجرايد و المجلات..
اطالع عروض الرحلات
اخذ بروشورات سياحيه و اتلفت ..
من بعيد اشوف ريلي متجه صوبنا
أأشرله
نقعد في المطعم
اخلي زوجي يقعد عند الطوفه
و انا مجابله اللوبي
يمكن يدخل
ريلي يسولف عن الكورس
و انا اول مرا ما اكون وياه
فيصل: اشلاهيه فيه اشسرحانه.. اليوم انتي مو وياي !
انا : لا يتراوالك بس الناس كاشخه و اشكالها غريبه
اتطمش !!
فيصل : عشان جذي ما احب اطلع وياج كله عينج طايره على الناس
امل : كمل كمل انا وياك
يسحب ريلي شيبس و يوكل بنته
تطشر كتشب علي
و تعفس روحها
اسحب منديل و اتحلطم و اعقد النونه عليها و في عز الي انا فيه
اشوفه داش الفندق ويا رفيجه !!
اتعدل
اقط النابكين
اسفهل
ابتسم بغباء حق ريلي
عيني عليه من دش لي راح صوب الرسبشين اخذ اظرف و راح صوب الاسنسيرات ..
ودي لو اروح بس ما اقدر !!
زوجي يخلص الاكل و يقولي يالله قمنا ..
انا : انت بتنام ؟؟
فيصل : اي بنام اريح شوي ساعه بس
انا : بس سارا ماتخليك تنام اكيد تزعجك ؟؟
فيصل : لا عادي ماكو مشكله متعود مو شي يديد..
امل : اذا تبي نقعد انا وياها اهني اشتري مجلات ..و احوس وياها و اصعد فوق بعد ساعه
فيصل :لا امشي ماكو مشكله ...اصلا اذا انتي تحت انا احاتيج و احاتيها ..
يكفي مجابلتها طول اليوم ..يسحب سارا يشيلها ..((اووبااااااا))
اخذ جنطتي و باند سارا و نروح
فوق ..ينام زوجي ..و تنام سارا معاه و انا احوس في الغرفه
ارتب اعدل الملابس..
و يقوم زوجي و نغسل ونبدل و نطلع ...و نرجع و يخلص اليوم و ماشفته !
في اليوم الثاني ..بنتي تقوم قبلي تحوس تزعجني ..اشوف الساعه !
باقي ساعه على وقت الريوق ..اغسل بسرعه بسرعه
و ابدل انا وبنتي ..و نروح ننزل الريوق
كالعاده اهي تركض و انا وراها
في الطاوله يعطوني كرسي للاطفال تقعد سارا فيه
على ما اروح اييب الاكل لي و لها من البوفيه
و انا راده من البوفيه
اشوفه !!
قاعد يتريق هناك !!
مع رفيجه
يرقع قلبي
بنبضات تزيد كل ما قربت عند الطاوله
اوكل بنتي
و افكر
هل ممكن يسلم علي
ابادر اسلم
و الا جني ما شفته؟
مدري
اتخيل نفسي لو سلمت و جعمني
لا لا لا شكوو يجعمني
مدري مدري
اكمل ريوقي انا وبنتي
و انا قاعده اشرب قهوتي
يتجه صوبي
عيني بعينه
ايني !!
لا اكيد مو لي اهو بيطلع
لألألأ يايني ارتبك
امسك الشوكه !
ليش مدري
هو:شلونج اموله
انا بتلعثم !: زينه انت شلونك ..انت شلونك ..؟
هو : انا تمام بخير .. شنو اسم الحلوه الاموره؟؟
انا : ابتسم ..سارا ..
هو : منصدم ! الله يا حلوها سارا تتربى في عزج انشاء الله
على منو سارا؟؟
انا : كان حلمي اسمي بنتي سارا ..تذكر
هو : بس كان اسم امي
انا : بس كان حلمي ..(تغير السالفه) ...ياي شغل؟؟
هو: اي والله ياي مع بومحمد شغل ..حقه اهوو..و انتي ؟؟
انا : اها موفقين ..انا يايه مع زوجي ..اهو عنده كورس و انا مع سارا سياحه و سوق
و بدون مقدمات ..سألته ..تزوجت؟؟
هو: اي تزوجت صارلي سنه و جم شهر
بين علي ان ضاق خلقي !! شكو مدري !! بس ضاق خلقي
انا : عندك بيبي ؟؟
هو : لا والله مرتي حامل .. الحين و انشاءالله قريبا اصير ابو
انا : شعوور يخرع ترا مو سهل .. اول الايام تحس حلم تقوم من النوم ودك تكون بروحك فجأه صووت يااهل يصيح
هو : الله يعينه على تربيتهم... خوش عيل اشوفج انشاء الله وقت ثاني فرصه سعيده ..
انا : انا اسعد سلم على بومحمد .. ااذا تبي اي شي انا موجوده ..
هو : تسلمين .. مع السلامه
انا: الله وياك
يمشي و انا اتحلطم على عمري ليش ذكرته انه بيصر ابووو!! ليشششششش غبائي
تعومس وراح
انا سعيده
شعور اني كلمته
بوسته لبنتي
لعب معاها
شافها
كلمني
يعني ماكو شي بقلبه
اخذ بنتي نغسل و نروح السووق
في هارودز
و بنتي في العربانه
تصرخ مدري اشفيها !!
اهو وراي يايبلي لعبه بنتي !!
انا : مشكوووووور وايد اشووفها تصرخ ماني فاهمه
تااح تااح راح راح !!
هو : عطاني نظره .. لي الحين ما تقدرين تركزين في شغلتين في نفس الوقت
انا: اضحك بصووت عالي اضحك من كل قلبي .. تذكرت السالفه الي صارت و من يومها قالي ما تقدرين تركزين في شغلتين في وقت واحد
هو: اش اش اش فضحتينا..
انا : قاعد تتسوق ..؟
هو : اي والله بشوف لبس المواليد
بييب حق البنوته ملابس ..
انا : اهاااا بنت مااشاء الله ..
اهو : اي بنت و على العيد بكون عمرها خمس او ست شهور فامها ودها النفنوف الابيض الطويل
عرفتيه ؟؟
اانا : اي عرفته بس ترا غالي من هاردز
هو : مو غالي على بنتي ..
انا : بقلبي انا شكو شاللقافه
هو : خلصي حق بنتج ..و انا بكون وياج امسكها .. عشان اتيين وياي تالي نشوف النفنوف
انا : لا لا لا تربط نفسك فيني ما ابي اعطلك ..و بنتي وايد مزعجه انا متعوده عليها
هو : عادي عادي بختبر نفسي ..هل انا طويل بال و الا لألأ ...
انا: براحتك .. و ابتسامه عرييضه على ويهي
يدز عربانه بنتي و انا من داخل في قمه سعادتي .. صج تمتعت في لحظات لو دقيقه واحده ان اهو زوجي و هذي بنتنا..
سعاده ما اقدر اسطرها لكم ..ما اقدر اقولها ..بس متع الصدفه لها طعم ثاني..
شريت اغراض بنتي ..و تعمدت ارووح صوب ملابس السهره ..و بعدها رحت معاه حق بنته..
وريته النفنوف و شراه على طول من غير ما يشوف سعره (( كلش مو مثل ريلي ))
او يمكن لو زوجي لو مسافر بروحه و شاف صاحبته و انبه ضميره ان اهو وياه راح يشتري الي ابيه
اي الرياييل ما يذبحهم الا الضمير اذا اشتغل..
نروح نقعد في شوكلت بار شوي ..يعزمني على القهوه و قعدت سولفت وياه لي اخر النهار
سوالف السنين الي فاتت و زواجي و ربعنا و دوامي و مديري...طلعت الدفاتر القديمه كلها
و اهوو يتابعني ... والله احسن مافيه مهاره الانصات الي لو بلف العالم كله ما الاقي ريال في الدنيا كلها
عنده مهاره الانصات مثله
شفت ساعتي و الا شوي و يرد زوجي
طبعا استأذنت منه .. و ركبني تاكسي ..انا وبنتي و ووصلني الفندق ..و تفاجأت ان دافع الاجره و الخشيش بعد..
ركضت غرفتي و مشاعري فيها دغدغه بنت ال20
بسرعه نومت بنتي...
و دخلت سبحت
و تكشخت لزوجي
سعادتي كلها انعكست على زوجي
رجع فيصل من الكورس ..يفتح الباب...
اركض من السوفا ابووووووس فيه بكل حراره رغبي الي كبتها في شوكلت بار
يستانس زوجي
و يتفاجا للتغيرر..و النفسيه الروعه
اطلع جياس الملابس من الكبت و اوريه الاغراض ..
و يطالع لبس سارا اليديد و يستانس
حياتي زوجي
يطلع بوكه و يدفعلي
في هاللحظات
ما اقدر الا اني الم زووجي بكل قوه
و اسلمه نفسي و اعطيه متعه ماشافها من زمان مني
شلت منه تعب اليوم كله
انا : فيصل ....
هو: عيونه..
انا : انا احبك تدري
هو : اكيد ما يبيله سؤال
اعطيه بوسه و اروح اخذ شاور
ينام فيصل ..
و بعد ما يقوم نبدل و نطلع انا معاه و يا سارا
وفي الصبح قمت اقوم قبل موعدي..
اغسل و ابدل و اكشخ ...و هالمرا قامت تطلع العطور و المكياج
حتى صالون الهوتيل قمت اروح له..
في هذا اليوم كان الجو ممطر وايد
فما قدرت اطلع مع سارا خفت عليها قعدت في اللوبي
اشرب قهوه..
و من الفراغ و الفضاوه حبيت اسوي لقيس مفاجأه
رحت الرسبشن و طلت منهم رقم الغرفه و اتصل عليه
هو: الوو
انا : برد و مطر نزل وياك الرين كوت
هو : ((يضحك بصوت عالي )) يرد علي باستغرراب..كلش ما توقعت انتي ..
انا: يعني اسكره ؟؟
هو: اكون شاكر لج عشان انزل اييكم بعطيج شي..
انا: بسرعه انطرك في اللوبي
هو: بسج لا اتأمرين ..
انا : هاههاهاهها باي
بعد 10 دقايق ينزل
بيده جيس ..ايين جيس كينزو !!
شاري حق بنتي بدله كينزو !!
انا : ابيييييييه وااي شنو هذا حق سارا ..؟؟ اطلع البدله و اقيسها على بنتي من برا
تسحبها بنتي و تصرخ ((حدها تفشل ))
هو: تقطعها بالعافيه ..تستاهل ..امس شريت حق بنتي شي ..قلت اييب حق بنتج
انا : مشكوور مشكوووووور مدري اشلون اشكرك ...بخليها حق العيد..
هو : امشي نروح نقعد في مكان صاد مو في اللوبي..
انا و هو شربنا قهوه ..اكلنا
نامت البنت..و بعد ساعه
صمت..
عيونه تتكلم..
عيوني ترد عليه
كلام العيون متعب
احاول اجذب عيونه
و اغير نظرتي
ارد لعيونه...و اخدر
بلحظه ضعف
يطلع الفلوس من بوكه..
يدفع الحساب
بدون مقدمات
يقوم و يمدلي ايده
هو: امشي وياي الدار
انا : امد ايدي بعد ماخارت قواي امام رغبتي
اسحب عربانه بنتي ..
اصعد وياه غرفته
بدون لا وكلمه
ادخل غرفته
استأذن لدخول الحمام ..لتنظيف نفسي..
اغسل ويهي
في المرايا ....اشوف نفسي..و بسرعه اهرب من عمري
افتح باب الحمام ..
اطلع
الاقيه في نفس مكانه و لا حتى قط كوته..
انا شوي صحيت من السكره بعد ما دخلت الحمام و غسلت ويهي
...
هو :
يمسك ايدي يبوسها ..
يهدني
يدخل الحمام ..
ياخذ شاور
افتح التلفزيون ..قناه الام بي سي
حفله محمد عبده
اغنيه الاماكن !!
ليش الاماكن الحين بالذات..
و صوت المطر برا
و يفصلني عن الفاحشه ثواني
و بنتي النايمه
و زوجي
زوجي
زوجي
بيتي
بنتي
بغيت اسحب عربانه بنتي بسرعه و اطلع بس ما سويتها

طلع من الحمام
لاف نفسه في الفوطه
هو : اموله اقولج شي..
تدرين على كثر ما انا مشتهيج
بس مابي اسوي شي
تدرين ليش
مجرد ما افكر ان انتي متزوجه و لج زوج
و انا متزوج و لي زوجه
و في نهايه اليوم كلنا بنروح لهم
و اهم مضحين وايد عشانه في اشياء و احنا اشكثر انانيين
يخليني صج ما ابي اسوي فيج شي..
سكتنا
هدوء انا ما رديت
قمت
سحبت عربانه بنتي
لمني
لمني حيل
و طلعت
قبل لا اسكر الباب عطيته نظره شكر
ان ماخلاني اسوي شي اندم عليه عمري كله
قعدت ساعات افكر
بروحي في الدار
لين وصل ريلي
غمضت عيني
سويت نفسي نايمه
دش فيصل شوي شوي
بنتي حست فيه
قامت
و مسكها و لا نام
نزل تحت
انا نمت لي الساعه 9 بالليل !!
قمت على حس بنتي
بنتي تمدلي بسكوته توكلي
فيصل: تبين الصج الله يعينج عليها
يعطيج الف عافيه
انتي صج صبوره
انا 3 ساعات ماني متحمل
ابتسم
اخذ فوطتي
و ادش اسبح
و اطلع مع زوجي
هدوء
ماتكلمت
حاول يعرف شنو فيني ماقدر
هذا كان اخر يوم لنا
نرد
نسوي جناطنا
من باجر الظهر نروح المطار
و في الطياره
استرجع الشريط كله
امسك جتف زوجي
المه حيل
خوف
تأنيب ضمير
غلط
اثم
تعب
تعب
كل خطيه يجرها تعب سنين

فشلتني جدام ريلي الله يسامحها..

انا و زوجي نتابع برنامج فوزيه الدريع كل سبت
و بما اني حامل في الشهر الخامس و بما اني ما حملت الا بعد علاج اربع سنوات
فشكلي الله لا يوريكم ..منسدحه على ظهري طول الوقت و لا اقدر اتحرك و لا اقدر اسوي شي
و تتسلط مرات الدكتوره فوزيه و اتييب مواضيع تحرجني ...بس طاف لكن الحلقه الي فاتت تسلطت الله يسامحها ويا ضيفتها عن اللياقه البدنيه في الجنس .. و انا حامل و هذا وضعي ....و مسكين ريلي متحملني لان يدري في معاناتي ... لكن انقص ويهي لما تسولف عن لياقه الحامل الجنسيه !! و البوزشن و الحركات و تفاصيل .. ريلي قام يطالعني .. عطيته ابتسامه صفرا .. ريلي حس اني فعلا اني انحرجت..
ماكان ودي اييبون طاري هالسوالف في وضعي هذا .. انا مفهمه ريلي ان كل الحمل وضعهم مثلي ..
بس الله يهداها فججت عيونه علي.. عطاني نظره ..شافني منحرجه... قرب اكثر مني ... لمني حيل من زمان ما لمني جذي..
قالي كلمه رنت باذني عدل .. اقوول عمري ..هذي يوم انها شاقه الفراش شق علامها هالمتن !! ذبحتنا سعرات حراريه و لياقه و برابيس
اشووفها ... ما عليج منهم ما عليج منهم بس تركيهم عنج خرابيطهم وايد هالحريم !!
بعد عمممممممممممممري ريلي حياتي ..برد على قلبي اي والله صاجه يوم انها شاقه الفراش بالطول و العرض علامها جذي و تفشلني جدامه
والله توني ادري انه يحبني هالكثر...
الله يسامحج دكتوره فوزيه فشلتيني عند ريلي

عندما تكون تهمتنا الاسلام

Naomi Campbell sentenced for attacking maid!!!

قبل قليل صدر الحكم على نعومي كامبل خمسه ايام خدمه المجتمع

لضربها خادمتها بالتلفون على الراس مما تسبب بجرح !!

لا غرامه ماليه و لا سجن ....

ليش !! لانها مو مسلمه !!

و حميدان التركي و زوجته 120 سنه

و الزنكي 5 سنوات بتهمه تعذيب الخدم !!!

؟؟ليش كل هذا الحب من القضاء الامريكي العادل

السبب الرئيسي و الجواب ..ان تهمه شبابنا المحكوم عليهم هي الاسلام .. !!!!

اشكركم مع اعماق قلبي

بصراحه قبل لا ادش في موضوع بوستي
بشكر كل الي عطوني من وقتهم و ارسلولي ايميلات
بصراحه ايميلاتكم وايد روعه ..تشجعني .. تفرحني
ما تتصورون اشكثر تسعدني
لكن اليوم فتحت ايميلي كان واصلني 3 ايميلات من اخواني البلوجر
2 وايد مفرحين و واحد غريب شوي
ايميل مدري من منو (بعدين عرفت عقب ما تحريت) و الي تفاجأت انه يقولي انه يعرفني
و ان اهو قرا بوستي في الصدفه
و تالي مع الوقت عرف منو انا
و من هالحجي
و قالي كذا شغله ابي اربطها ماني قادره
لكن الشي الغريب في الايميل
انك تقولي ..
اهديج اغنيه شبيه الريح !!
و اهداء خاص هذا المقطع
ابي اعرف متى تسكن رياحك و ابي اعرف غرورك متى هو يطلق سراحك
و ابي اعرف متى تعصف و متى تعطف و متى تنزف جراحك !
والله تبي الصج احتريت شككتني في نفسي قمت امشي و اسأل صاحباتي
تحسون اني مغروره !!
كلش اخر انسانه في هالدنيا فيها غرور
عموما ترا انا عرفت انت منو
و لا تسألني اشلون
قدرت اعرف
بس انا الي الحين بهديك اغنيه

اهداء لك

بس حرام عليك ظلمتني

في اغنيه شبيه الريح

الله يرحم ايام زمان

ماكنت دايما تهديني

اسمع صدى صوتك مع ضجه الناس

مرت سنه على ذكراك

الى الاب

الى السمو

الى المرحوم

الى امير القلوب

مرت ذكراك سنه وانت ما زلت في قلوبنا

احبك

يارب اسكنه في عليين

يارب اغفر الله

حبيبي بابا جابر

فوق ما تتصور فاقدينك

فوق ما تخيل كلنا ولهانين عليك

بابا جابر ابشرك صدام اعدموه

ابشرك بردت حرتنا فيه

احبك

و بظل ادعيلك عمري كله

حللناك يوم وفاتك

بس هل انت راضي عنه؟؟

احبك

السالفه يا ان ماكو يهال في هالزمن !! او ما تربيه !! و الا نسينا ان عيالنا امانه؟

في يمعه بنات عائليه
اتيي بنت وحده من صاحباتي تشتكي من امها انها لي الحين ما شيكت على افلام العيد ..
ما فهمت شنو تقصد ..ردت علي الام : انا و ريلي انشوف الافلام اول تالي نعطيهم البنات يشوفونهم ..
و صاحباتي فتحوا موضوع العاب بنات هذا الجيل بصراحه انا اول مرا اسمع عن هالاشياء لان ما عندي خوات
و لا بنات في سن الروضه ..او الابتدائي
العجيب الغريب ان تربيه صديقاتي ماشاء الله عليهم شوي شديده .. مدخلين بناتهم مدارس اجنبيه متحفظه.. على الرغم من انهم خريجات المدارس الامريكيه .. بس جيل السنعات الظاهر خلص ..
الي لاحظته من خلال نقاشهم اني تفاجئت ان اهمال بعض الامهات وصل لدرجه ان ما تدري شنو العاب بنتها..
و لا تدري شنو بنتها تشتري العاب .. و من تطلب البنت لعبه عطتها .. و هذا شي خطير .. على ابو انه بنفتك من حنه البنات
نعطيهم الي اهم يبونه ..
بس في هالزمن الخطر الاقشر الواحد لازم يتابع العاب اعياله ...
يعني انا تفاجئت في مجموعه دمي اسمهم bratz...
شعارهم
the only girls with passion for fashion
و هذي الالعاب عباره عن اربع مدري خمس نات تافهين
حياتهم كلا سيلابرتي و حفلات و وكلا عن الفاشن و الي صدمني

تنط بنت تقولي هذي كلا تحط وايد ميك اب و تقول حطو ميك اب عشان اذا رحتي حفله يشوفج واحد حلو !!
البنات في عمر 6 سنوات و 7 سنوات هذا كلامهم !!
الي عجبني في وحده من صاحباتي ... ان ملزمه بنتها تشتري لعبه اسمها فله لان تبي بنتها تكون فخوره في شي يتعرا صديقاتها منها
و تبي تكون عند بنتها شخصيه مستقله ..
الله يرحم ايام باربي ما عندنا هالسوالف !! يالله انلبس و انفصخ و نتبادل هدوم و بيت و حمام سباحه و كوكش عيالها
و ماكان لها اهداف !!
و لا اغرست فينا اي هدف !!
لكن العاب بنات هالوقت مصيبه !! يغرسون فيهم مبادئ تافهه !!
و ماكو رقابه من الاهل !!
و انا كنت اسولف حق الاخت البندري عن قعدتي مع صاحباتي و ماشاء الله عليهم اشلون يسولفون عن تربيه بناتهم و عن رقابتهم و عن المحافظه على المبادئ الاسلاميه و تعزيزها في نفوس عيالهم ... قالتلي البندري عيل ما شفتي الي هابين فيه هالايام
فيلم او العاب من ديزني اسمهم
high school misical
و الي يشوفونه يهالوو و يغرس في اعيالنا شغلات دخيله

بصراحه انا ارد و اقول ان انا ما عندي خبره في هالامور و لا اعرف في الكارتون و البلاوي
و لا اعرف عن هالشغلات لكن قعدتي مع صاحباتي
استوقفتني لانها ابهرتني !!
و يقولون ليش ماكو يهال ؟؟

في غرفه التبديل

سمعوا الاغنيه لقراءه البوست

سمعوا الاغنيه لقراءه البوست
لانه بوست مسموع هالمرا
في غرفه التبديل مع زوجها

تضحكنا بتصرفاتها قائله

ارمي الفوطه بالسله
اتمايل مع دقات الاغنيه
و اتوجه للمرايا
ماسكه المشط و اغني
ايني يدزني بوسطه (بحركه راقصه منه)
حركه اتطيرني
يزاحمني على المنظراا
انا واقفه جدامه

اغني انا مع شرين و اطالعه و ارقص
اخرك هنا
اخرك انا
اخر ماكنت بتتمنى
قلبي البرئ
حبي الجرئ
شي مستحيل تقدر تنسى
يسحب المشط مني
يقرب عند المنظره
يمشط و يقرب مني يغني باذوني
مع تامر
ليلك انا
سهرك انا
و الهمس و الشوق و الاحساس
شهد الحيا
انا منتهااااه
و انت الي عندي بكل الناس
اهز جتفي مع الكورال
و البس ملابسي
و اعطيه ظهري يسكرلي السحاب
و اغني مع شرين
صوتك انا
حسك انا
حتى لو بتفكر تنساني
تقدر تعيش ما تحبنيش
تقدر تجيب حد مكاني
يرد علي مع تامر
روحي انا
اقدر انا
انسى
الي مخلوق عشاني
ما انا لونسيت
يبقى تناسيت
ما انا مش حعيش بعدك تاني

و انتمايل انا معاه مع دقات الاغنيه و الموسيقى
يسحب ريموت الاستيريو
و يقولي سمعي بس سمعي انا برد عليج

اتخصرله يالله سمعني

اضغط اهني لسماع اهداءه لي

يهز جتفه
و رقبته
و يرفع ايده فوق
ايواا
يناديني بيده و بكتفه
و يغني مع تامر
قرب حبيبي
قرب تعالى
ليه سايبني بنار يا حبيبي

و يهز
و انا ميته من الضحك على شكله
يغني مع تامر
انت الي في قلبي
و و لا غيري في قلبك
يبأ ليه نحتار يا حبيبي
يبقا ليه نحتار
و يهززززززز هزززززز ريلي بطريقه تموت من الضحك
بس مادري ليش يغني و يقول ايواااااااا
و انا اموت على شكله
بوكسر و دلاقات و يرقص
اتجاوب مع كتوفه و اهز ويااااااااااه
يحاوطني بذراعه
و يغني مع تامر
و انا اغني مع الكورال
و يعطيني الظربه القاظيه في خصره
يكسرلي حووضي
ايني بخطوات راقصه و انا مندمجه احط كحل
يطق ريولي من ورا عند الركب
يخلي مكياجي يعتفس و اكسر وقفتي
اصرررررررخ
بسسسسسسسس
يضحك على
يلبس و يطلع
قليل من الضحك
قليل من الاغاني و الهز في الويك اند
يخلي غرفه التبديل مكان يبدي فيه احلى ويك اند

I'm Loving Every Moment With You

Do you realize how long it's been

Where does all my time with you go?

And all the memories

We shared as friendsReflected-in my heart

Is where they show

I'm loving every moment with you

I'm living in a dream that's comin' true

I'm lost in everything you do

I love youI'm saving every moment for you

You're hidden in a place that's safe and true

Lovin' everything we do

With every secondYou hold me near

I'm closer to a place I want to be

To hear you whisperBut no one else can hear

I want your love

To stay forever-inside of me

In our silenceLooking in your eyes

I hear words you don't need to say

Just hold on baby'Cause it's reason-

I'm prayin'

You feel what I feelIn every way

celine dion

my morning mood

غمزه و عظ البرطم ..

غمزه و عظ البرطم

حركه كويتيه جدا راقيه تستخدمها غالبا امهاتنا و يداتنا او الحريم عموما لتنبيهنا !!
و عدم مقاطعه المتكلم او عدم تصحيح المعلومات .. او التنبيه على عدم اللقافه
هذي الحركه ما اواطنها ...
الي خلاني اكتب بوست ... موقفين صارولي امس

الموقف الاول في استقبال حجاج ..

ادخل انا و امي للاستقبال ..بعد شوي تعرفني وحده على صديقه لامي قديمه
الصديقه : يا حلوها منو هذي !؟؟
صاحبه الاستقبال : هذي فطومه بنت بلا بلا بلا بلا ...
الصديقه : بصوت خافت مسموووووووووووووووووووووووووع تسأل رفيجه امي جم عمرها !!؟؟
صاحبه الاستقبال : 25 !!!!!!!!!
اساسر امي : بعد شهر بصير 28 !!
تعلن امي اطلاق صاروخ الغمزه و عظه طرف البرطم !!!

الموقف الثاني امس

انا في الصاله انبه امي بان يطلعون كل اغراض غرفه التبديل عشان بيي الصباغ العصر يشوف الدار و اطلب منها تعامل على كبت كبير لان كبتي بينبط من الخلاجين و كانت موجوده مرت اخوي (جنتنا)

انا : يمااااا طلعو الاغراض و دقي على النجار يسويلي هذا بطن جنه ...
امي : تطلق صاروخ النغزه و عظ البرطم ..
انا : اعفس حواجبي اشفيج ؟؟
امي : اتأشر بوجود مرت اخوي ...
انا : هووووووو اشفيج ..

و لما تروح مرت اخوي تغسل ايدها
امي اتبهني في كلمه بطن جنه !!
اي اشدراني مو انتو تسمون الكبت الكبير بطن جنه !!!! كلمه كويتيه دارجه ما اقصد عنها اقصد عن الكبت !!
و يا كثر ما كانت تستخدم يدتي الله يرحمها
النغزه و هالحركه
و امي بعد ....
شنو مواقف تصيرلكم تخلي امهاتكم تطلق صاروخ الغمزه ؟؟

رجوله فواز و حكمه نور

نور بسرعه السايق بمر ياخذ الجناط و يسوي البوردينج
عشان تالي انا امرج .. بعد خمس دقايق الجنطه مسكره
و ناطره برا .. مابي تأخير ..قلت لج انا .. مو ادق عليه بعد شوي يقولي معطلينه !!
نور : انشاء الله انشاء الله والله الحين اخلي الخدامه تقعد عليها و اسكرها
فواز : شنو!! الخدامه تقعد عليها ! من صجج انتي من بيشيل الجنطه هذي ! انا بحطها على ظهري
قطي نص هدومج ما ابي جنطه اكثر من 20 كيلو انا الي بشيل !! و حطي حساب اني ماراح ادفع وزن في الرده !!
نور: انشاء الله انشاء الله (( ياربي انا شيلي خلاني افج على عمري بيبان مسكره )) .
فواز : يالله خلصي بسرعه و دقي علي بعد شوي اذا وصل و اخذ الاغراض
نور: انشاء الله عمري انت ..مواااااااااااه (صوت بوسه)
تروح نور تحاول بعد جهد جهيد تسكر جنطتها و تعطل السايق برا ربع ساعه و فواز يكسر عليها التلفونات و ماترد
وبعد ساعه و نص يكون فواز عندها
يمرها ..
نور عند اعتبه الباب ..فواز فواز بليز انزل ..
فواز قاعد يم السايق يأشر لها تعالي بسرعه لا تعطلينا
و اهي تصرخ فواز بليز انزل الله يخليك
يفتح الباب و ينزل فواز في قمه التحلطم
اشتبين مو كافي معطلتنا
نور تلم فواز حيل ! وااي حبيبي و اخيرا بنروح شهر العسل
جذي الناس تسافر شهر العسل في سعاده
مو هواش و زف على جناط و ووزن بعد 20 سنه اذا سافرت وياك
اشلون بنكون !!
نروح المطار بكساات !!
فواز يتحلطم والله انتي متفرغه بسرعه
بسرعه
و في الطياره
فواز يشرح حق نور حالته
شوفي نوري ترا انا صج قبل السفر في يومين اتوتر من خوفي من الطياره و طول فتره الطياره اعصابي
تلفانه فبليز تحمليني حياتي اوكيه
ثاني شي تامرين بشي قبل لا يبدي مفعول الحبه !
نور: ((مبققه عيونها )) اي حبه !! فياجرا من وراي يا فواز !
فواز: فياجرا ويهج ...لا حبيبتي هذي حبه منوم اخذها في المطار عشان من اركب الطياره انام
لا تقعديني حق الاكل و لا شي اذا وصلنا قعديني اوكيه
..تمسين على خير !
نور : تعطيه بوسه ..حياتي انتي ما ادري انك تخاف من الطياره ..ماقلتلي من قبل
فواز : انتي وهلتيني ..عرفتج سنه ..احبك ..احبك ..احبك .. قصيتي علي لفيتيني و خذيتيني ..
نور: ترفع الغطا و تغطي ويه فواز ..نام بس نام ..نوم الظالم عباده ..
يوصلون المطار
و تالي الفندق ...
و يبدون شهر العسل ..في ايطاليا ياخذون كروز من روما يلف فيهم ايطاليا في 6 ايام
و في اول يوم شهر عسل رسمي ..
يوصلون السويت .. منبهرين في حلاته و فخامته ..
السويت الملكي ..
عباره عن غرفتين ..صاله حمامين
و خادم معاهم !!
يطلب فواز من الخادم ان ما يدخل عليهم الا و اهو مستأذن
لان احتراما لخصوصيه زوجته و انهم مسلمين
تدخل نور تاخذ شاور ..تلبس قميص نومها .. الراقي
تتعطر ..و تولع الشموع ..استعدادا لاحلى يوم في حياتها
الي احلمت فيه عمرها كله ..
فواز يبدأ في المداعبات
و نور تتجاوب معاه ..بحياء و دلع
وبعد اكثر من عشرين دقيقه تتسائل نور بينها و بين نفسها
ان ما حست في شي من تحت يداعبها .. تتسأل نور .. شنو شكلي مو حلو .. اشفيني ليش ما قام
تلم فواز عشان ما تحسسه انه اكو شي غلط
نور عينها على الساعه .. و تقول بقلبها يمكن تعبان ! من السفر و الرحله الطويله !
فواز يحاول يريح نور .. مرا مرتين .. في اكثر من طريقه ..ترتاح نور
يبوسها فواز ..و يقولها يالله قومي ناخذ شاور !..
خذو شاور بعد ساعتين ..
و تعشوا ..و في العشا ..
نورتتجاهل سالفه ان فواز ما حاول يعاشرها بطريقه ازواج لفض بكارتها ..
اسكتت و استمر الحال لمده 4 ايام ..
يطلعون و يدخلون .. و فواز مازال مجرد مداعبات .. بوس .. رقص . و كل انواع الاثاره
بس مافيه فض للبكاره ! ماحست ابد ان اهو استجاب كرجل لاثارتها !
و على الريوق ..تسأل نور ..: فوازي انا بنت ليش.. ؟؟
ليش مو قاعد تحاول ادخله فيني .. ماحسيت اصلا ان مالك قام ابد ..
فواز : سكري الموضوع !! و يستمرون في شهر العسل ..
مرا وناسه و طلعات و روحه و رده .. و حزت الفراش فواز يحاول كثر ما يقدر ان ما يخلي نور
تحس باي نقص ..لكن مازالت بنت ..
يرجعون من شهر العسل ... يسكنون ويا اهل فواز في البيت ..
يستقبلونهم اهلهم بحفاوه .. الام تساسر بنتها ..ها اشلونه وياج ..
نور : يما سكتي حياتي انتحار فراش حمام.. حمام فراش .. ماطلعنا ما رحنا ذبحني !!
بدتها نور كذبه تريح فيها امها ..
تستانس امها .. و اتحس بفخر ان هذي بنتها الي مثلها .. بنتها الي سعيده مع ريلها
..
و ام فواز تسأل نور من صوب . عسا استانسو .. يالله الفال لما نفرح في ولدكم انشاء الله
انا و امج بنعد من الحين 9 شهور !!
يحس فواز باحراج كبير ..طعن لرجولته !!
حس ان من الحين بدا باب كبير ينفتح عليه
الناس من اول يوم تسأل !! بسم الله هذا احنا في المطار ..
يدخلون فواز و نور الشقه .. ترتب الاغراض .. و تصفهم ..
تفرز الجناط .. و الملابس الوصخه .. و بعد ما خلصت ..تسأل فواز تبي عشا ..
يقولها : لا تعبان بنام دايخ .. اذا انتي تبين اكلي ...امي حاطه في السخان العشا ..
حست نور ان فواز وايد تعبان ... و مضايق من كلام امه و خالته..
تروح تقعد في السوفا يمه ..تلمه حيل .. فوازي تحمل بيينا وايد كلام ..
ما عليك منهم.. انا احبك .. انا اخترتك .. انا مرتك وياك على الحلوه و المرا ..
ما عليك من كلام الناس .. الي بينا في الفراش .. مسكر عليه طوف و باب .. يشهد الله
عمري ما راح ايب طاري لحد .. و لا راح احاول احسس احد في شي .. و احمد ربك احنا في الكويت
يعني اذا تاخر الحمل كلهم بقطون اللوم علي ..و بقولون .. هرمونات .. و صدام قاط شي في الجو يخلي الحريم ما تحمل !
فواز يحب راسها و يقوم ..
بعد اسبوع تتوالى العزايم عليهم ..
خالته ...خاله .. عمه ... و عمها .. يبدى مشوار العزايم و ضغوط المجتمع في كل مرا
يسألونها .. ها اشلون الزواج ..
حتى رفيجاتها و اقرب رفيجه لها تسألها .. هااااا يعور !!
و في كل يوم لازم احد يسألها .. و اهي تنجرح اكثر من اي احد .. اهي محرومه .. اهي بنت .. اهي ملامه و مظلومه
بعد 3 شهور ...يراجع فواز مع نور طبيب خاص
..فحوصات .. تحاليل ... عينيات .. كريمات .. بخاخات .. و في كل مرا يطلعون من الطبيب محاولين
على امل ان الحبوب و الكريمات تفيد .. و لا اكو اي استجابه ..
بعد 7 شهور و مازال العلاج مستمر ..صبر نور بدا يفج .. كلام امه و خواته .. كلام اهلها
البنات ... و حاجاتها اهي .. بدا يبين على ويها .. ضعفت .. تعبت و فواز تعبان اكثر ..
و في يوم طلب فواز من نور انها ما تنام تنطره لين يرد من الدوانيه ..
يرجع فواز ..و يطلب من نور لو انها ..ملت و تعبت فمن حقها ان تروح بيت اهلها ..
لانها ما قصرت وياه ..تحملته .. و تحملت ظيم الحجي .. و اهي مالها ذمب
و ان لو اقعدت راح يحس نفسه اناني لان مخليها تصبر معاه ..
نور: ((مصدومه )) ما هقيتها منك !! تبيني ارد بيت اهلي في اول مشكله تواجهنا !!
عيل انا مافيني خير من اولها اروح بيت اهلي وين الحلوه و المرا الي انا وياك فيها ..
انا مو تعبانه منك . انا تعبانه من نغزات الناس و كلامهم ما يقصدون بس انا اتعب منه ..
في كل مرا انزل الصاله حق امك و تشوفني مو كاشخه تقولي .. لبسي تكشخي .. تسنعي حق ولدي
اقول بقلبي .... انتي ما تدرين اني احاول اكون وايد طبيعيه عشان ما اجرح مشاعر ولدج
كشختي له قامت تجرحه .. و كأني انطر شي او ابي شي .. اتذكره في عجزه ..
انت مو مشكلتي .. مشكلتي كلام الناس ..انا مرتاحه معاك .. انا احبك .. انا وياك العمر كله ..
و من باجر راح نغير الدكتور .. هذا اكل فلوسنا .. معاشك كله طاير على العلاج .. و ماكو فايده ..

انا باخذ موعد مع دكتور ممتاز ...

انت اسمع كلامي مرا في حياتك ,,

و اسأل عنه و انشوف اذا انت ارتحت كملنا وياه اذا ما ارتحت .. طلعنا ..
و فعلا تاخذ نور موعد مع الدكتور عادل بعد 3 ايام ..
نور: فوازي .. اتحبني ..؟
فواز: هذا سؤال تسألينه ...؟؟ انا تسأليني احبج .. انت تدرين ان من اول احبج .. لكن الحين اموت عليج
انتي نوري .. والله يا نور على الي فيني بس اشوف عينج ارتاح
انا عمري ما سويت شي عشان احد و دست على نفسي عشان احد .. انا اول مرا ابجي
في كل مرا احد يقثج و اشوفج تبجين .. ادخل اخذ شاور و انا ابجي عليج والله مو على نفسي ..
و تروح نور مع فواز .. العياده .. و يشرحون له الحاله بالتفصيل .. و يعطونه
كيس متروس من كل انواع العلاجات الي اخذها فواز .. و يطلب الدكتور من نور انها تطلع برا شوي ..
و تطلع نور ..و يقوم الدكتور بحمل بعض الفحوصات .. و يطلب من فواز ان يسوي بعض التمرينات يوميا حتى الموعد الثاني
على ما تطلع النتايج بعد يومين ..
و يروحون بعد يومين ..و يشرح الدكتور .. لفواز ..

الدكتور : حالتك جدا بسيطه .. ارتخاء في عضله .. لا تحتاج لا كريمات .. لا بخاخات لا كل فتره العلاج هذي ..
نور عليج انج تسوين حركه بسيطه اثناء المعاشره الزوجيه .. و انت فواز اخذ هذي الحبه ..تساعد هذي العضله ..
مشكلتك جدا بسيطه .. لا عجز .. لا اي شي ثاني .. بس كان التشخيص الاول غلط ...

يطلعون من العياده ..
و اثنينهم طايرين من الفرحه ..
ياخذ فواز العلاج .. و اهو في قمه الفرحه و الخوف .. امل على انه فعلا كلام الدكتور صح
خوف من ان لو الحبه ما يابت نتيجه ...و المشكله ما كانت عضله و بس
نور في قمه سعادتها ,, كشختها استعدادها ... موسيقى رومانسيه .. عشا ممتع
قبلات و لا شي يرضى غرورها سوا فض بكارتها
و فعلا .. كان التشخيص سليم ..
كانت ليله من ليالي الف ليله و ليله
كان يوم ماراح تنساه ابد
كانت مشاعرهم تتعانق قبل اجسادهم
كان هناك حب
كان هناك عشق
كانت هناك خفقات تتطاير قبل وسائدهما
كانت يده تكتشف جسدها و كانه اول مرا يلسمها
و بعد اقل من عشر شهور .. تلذذت بليله جعلت منها امرأه
و هو رجلها
ارتاحت و ارتاح هو اكثر
استمتعت و اطمأنت على مستقبلها
استقرت
و في يوم احتفالهم بعيد زواجهم الاول
كان هناك جنين يحتفل معهم
نور و فواز
قصه في كل بيت كويتي يواجه اي نوع من انواع المشاكل الزوجيه
لكن قليل من الصبر.. الحكمه .. سد الاذان .. و الكتمان ..يحل المشكله

منتجع بري ..راقي

مخيم

sahara Joy

تحت رعايه شركه الاتصالات المتنقله

جليعه - طريق 240

استمتع بيومك مع عائلتك - الافتتاح بتاريخ 31-12-2006

لمزيد من المعلومات و للحجز و الاستفسار زورو الموقع

www.evento-kw.com/sahrajoy/default.aspx

او

الاتصال على الارقام التاليه

6606797- 2543437

--------------------

مشروووووع جدا ممتاز و اكثر من رائع

يا ربي ملينا من المجمعات و المطاعم

نبي تغيير

نبي شي ممتع

ودي وايد اروح مرات البر بس ما عندي استعدادات

ابي شي سنع على مستوى

راقي

و جاهز

فلما سمعت عن هذا المشروع و سألت رفيجاتي الي زاروه

وايد وايد امدحوه

خلوني اقولكم شغله اعجبتني

انه هذا المنتجع البري

يفتح من الصبح لي الساعه 12

و فيه مطاعم و خيام

و لعب للاطفال

يعني تاخذون عيالكم و تروحون و تحجزون خيمه و تقعدون فيها

و تستمتعون

بصراحه المكان جدا راقي و عائلي فالي وده اعياله يروح مكان سنع

و ما يخاف عليهم

خيزور هذا المنتجع البري

و اتمنى لكم اجازه سعيده