Sunday, January 21, 2007

لوبي


واقفه في الاسنسير مع بنتي
يفتح الباب ...
تزرق مني بنتي بسرعه
تركض ..
ما يوقفها الا انها دعمت بريول واحد
اجندس امسكها و ارفع راسي اشووفه ..
اخترع..
يرقع قلبي ..بسرعه بسرعه
اطلع اتجهه لي باب الفندق
اقول بقلبي
ياكرهج لما تتهيليقين في السفر
واي شافني عقب هالسنين
جذي و انا ويا بنتي ولويه
و انا انطر التاكسي اطالع نفسي في الزجاج
اعدل شعري
الفه عدل
احط حرتي في بنتي ازفها ..
اركب التاكسي و اروح مشاويري
و في رجعتي اتوقع اني يمكن اشوفه
اعدل عمري
ارتب نفسي
اتعطر
احط جلوس
ادخل اللوبي
اتلفت يمين و يسار
ادوره
ما الاقيه !!
اروح الغرفه
و احساس بخيبه امل
اقعد شوي
زوجي يدخل راد من الكورس
اقعد معاه
يطلب مني اتصل في الروم سيرفس لانه ميت يووع
امل: اشرايك ننزل اللوبي نغير جو و تاكل تحت عشان ما تصير ريحه الغرفه اكل ..
فيصل : براحتج بس ما نطلع من الفندق لاني دايخ هلكان ..
امل : اي اكيد تحت ناكل و عشان سارا تاكل ايس كريم بعد
فيصل : ادش اخذ شاور و اطلع ..
اركض اسحب جوتي سارا..و البسها
من ورا الباب اقوله
ترا احنا نزلنا تحت قبلك ناطرينك في اللوبي انت اخذ راحتك
انزل تحت اتمشى
احووس
على امل اني أشوفه
اروح المكتبه .. احوس في الجرايد و المجلات..
اطالع عروض الرحلات
اخذ بروشورات سياحيه و اتلفت ..
من بعيد اشوف ريلي متجه صوبنا
أأشرله
نقعد في المطعم
اخلي زوجي يقعد عند الطوفه
و انا مجابله اللوبي
يمكن يدخل
ريلي يسولف عن الكورس
و انا اول مرا ما اكون وياه
فيصل: اشلاهيه فيه اشسرحانه.. اليوم انتي مو وياي !
انا : لا يتراوالك بس الناس كاشخه و اشكالها غريبه
اتطمش !!
فيصل : عشان جذي ما احب اطلع وياج كله عينج طايره على الناس
امل : كمل كمل انا وياك
يسحب ريلي شيبس و يوكل بنته
تطشر كتشب علي
و تعفس روحها
اسحب منديل و اتحلطم و اعقد النونه عليها و في عز الي انا فيه
اشوفه داش الفندق ويا رفيجه !!
اتعدل
اقط النابكين
اسفهل
ابتسم بغباء حق ريلي
عيني عليه من دش لي راح صوب الرسبشين اخذ اظرف و راح صوب الاسنسيرات ..
ودي لو اروح بس ما اقدر !!
زوجي يخلص الاكل و يقولي يالله قمنا ..
انا : انت بتنام ؟؟
فيصل : اي بنام اريح شوي ساعه بس
انا : بس سارا ماتخليك تنام اكيد تزعجك ؟؟
فيصل : لا عادي ماكو مشكله متعود مو شي يديد..
امل : اذا تبي نقعد انا وياها اهني اشتري مجلات ..و احوس وياها و اصعد فوق بعد ساعه
فيصل :لا امشي ماكو مشكله ...اصلا اذا انتي تحت انا احاتيج و احاتيها ..
يكفي مجابلتها طول اليوم ..يسحب سارا يشيلها ..((اووبااااااا))
اخذ جنطتي و باند سارا و نروح
فوق ..ينام زوجي ..و تنام سارا معاه و انا احوس في الغرفه
ارتب اعدل الملابس..
و يقوم زوجي و نغسل ونبدل و نطلع ...و نرجع و يخلص اليوم و ماشفته !
في اليوم الثاني ..بنتي تقوم قبلي تحوس تزعجني ..اشوف الساعه !
باقي ساعه على وقت الريوق ..اغسل بسرعه بسرعه
و ابدل انا وبنتي ..و نروح ننزل الريوق
كالعاده اهي تركض و انا وراها
في الطاوله يعطوني كرسي للاطفال تقعد سارا فيه
على ما اروح اييب الاكل لي و لها من البوفيه
و انا راده من البوفيه
اشوفه !!
قاعد يتريق هناك !!
مع رفيجه
يرقع قلبي
بنبضات تزيد كل ما قربت عند الطاوله
اوكل بنتي
و افكر
هل ممكن يسلم علي
ابادر اسلم
و الا جني ما شفته؟
مدري
اتخيل نفسي لو سلمت و جعمني
لا لا لا شكوو يجعمني
مدري مدري
اكمل ريوقي انا وبنتي
و انا قاعده اشرب قهوتي
يتجه صوبي
عيني بعينه
ايني !!
لا اكيد مو لي اهو بيطلع
لألألأ يايني ارتبك
امسك الشوكه !
ليش مدري
هو:شلونج اموله
انا بتلعثم !: زينه انت شلونك ..انت شلونك ..؟
هو : انا تمام بخير .. شنو اسم الحلوه الاموره؟؟
انا : ابتسم ..سارا ..
هو : منصدم ! الله يا حلوها سارا تتربى في عزج انشاء الله
على منو سارا؟؟
انا : كان حلمي اسمي بنتي سارا ..تذكر
هو : بس كان اسم امي
انا : بس كان حلمي ..(تغير السالفه) ...ياي شغل؟؟
هو: اي والله ياي مع بومحمد شغل ..حقه اهوو..و انتي ؟؟
انا : اها موفقين ..انا يايه مع زوجي ..اهو عنده كورس و انا مع سارا سياحه و سوق
و بدون مقدمات ..سألته ..تزوجت؟؟
هو: اي تزوجت صارلي سنه و جم شهر
بين علي ان ضاق خلقي !! شكو مدري !! بس ضاق خلقي
انا : عندك بيبي ؟؟
هو : لا والله مرتي حامل .. الحين و انشاءالله قريبا اصير ابو
انا : شعوور يخرع ترا مو سهل .. اول الايام تحس حلم تقوم من النوم ودك تكون بروحك فجأه صووت يااهل يصيح
هو : الله يعينه على تربيتهم... خوش عيل اشوفج انشاء الله وقت ثاني فرصه سعيده ..
انا : انا اسعد سلم على بومحمد .. ااذا تبي اي شي انا موجوده ..
هو : تسلمين .. مع السلامه
انا: الله وياك
يمشي و انا اتحلطم على عمري ليش ذكرته انه بيصر ابووو!! ليشششششش غبائي
تعومس وراح
انا سعيده
شعور اني كلمته
بوسته لبنتي
لعب معاها
شافها
كلمني
يعني ماكو شي بقلبه
اخذ بنتي نغسل و نروح السووق
في هارودز
و بنتي في العربانه
تصرخ مدري اشفيها !!
اهو وراي يايبلي لعبه بنتي !!
انا : مشكوووووور وايد اشووفها تصرخ ماني فاهمه
تااح تااح راح راح !!
هو : عطاني نظره .. لي الحين ما تقدرين تركزين في شغلتين في نفس الوقت
انا: اضحك بصووت عالي اضحك من كل قلبي .. تذكرت السالفه الي صارت و من يومها قالي ما تقدرين تركزين في شغلتين في وقت واحد
هو: اش اش اش فضحتينا..
انا : قاعد تتسوق ..؟
هو : اي والله بشوف لبس المواليد
بييب حق البنوته ملابس ..
انا : اهاااا بنت مااشاء الله ..
اهو : اي بنت و على العيد بكون عمرها خمس او ست شهور فامها ودها النفنوف الابيض الطويل
عرفتيه ؟؟
اانا : اي عرفته بس ترا غالي من هاردز
هو : مو غالي على بنتي ..
انا : بقلبي انا شكو شاللقافه
هو : خلصي حق بنتج ..و انا بكون وياج امسكها .. عشان اتيين وياي تالي نشوف النفنوف
انا : لا لا لا تربط نفسك فيني ما ابي اعطلك ..و بنتي وايد مزعجه انا متعوده عليها
هو : عادي عادي بختبر نفسي ..هل انا طويل بال و الا لألأ ...
انا: براحتك .. و ابتسامه عرييضه على ويهي
يدز عربانه بنتي و انا من داخل في قمه سعادتي .. صج تمتعت في لحظات لو دقيقه واحده ان اهو زوجي و هذي بنتنا..
سعاده ما اقدر اسطرها لكم ..ما اقدر اقولها ..بس متع الصدفه لها طعم ثاني..
شريت اغراض بنتي ..و تعمدت ارووح صوب ملابس السهره ..و بعدها رحت معاه حق بنته..
وريته النفنوف و شراه على طول من غير ما يشوف سعره (( كلش مو مثل ريلي ))
او يمكن لو زوجي لو مسافر بروحه و شاف صاحبته و انبه ضميره ان اهو وياه راح يشتري الي ابيه
اي الرياييل ما يذبحهم الا الضمير اذا اشتغل..
نروح نقعد في شوكلت بار شوي ..يعزمني على القهوه و قعدت سولفت وياه لي اخر النهار
سوالف السنين الي فاتت و زواجي و ربعنا و دوامي و مديري...طلعت الدفاتر القديمه كلها
و اهوو يتابعني ... والله احسن مافيه مهاره الانصات الي لو بلف العالم كله ما الاقي ريال في الدنيا كلها
عنده مهاره الانصات مثله
شفت ساعتي و الا شوي و يرد زوجي
طبعا استأذنت منه .. و ركبني تاكسي ..انا وبنتي و ووصلني الفندق ..و تفاجأت ان دافع الاجره و الخشيش بعد..
ركضت غرفتي و مشاعري فيها دغدغه بنت ال20
بسرعه نومت بنتي...
و دخلت سبحت
و تكشخت لزوجي
سعادتي كلها انعكست على زوجي
رجع فيصل من الكورس ..يفتح الباب...
اركض من السوفا ابووووووس فيه بكل حراره رغبي الي كبتها في شوكلت بار
يستانس زوجي
و يتفاجا للتغيرر..و النفسيه الروعه
اطلع جياس الملابس من الكبت و اوريه الاغراض ..
و يطالع لبس سارا اليديد و يستانس
حياتي زوجي
يطلع بوكه و يدفعلي
في هاللحظات
ما اقدر الا اني الم زووجي بكل قوه
و اسلمه نفسي و اعطيه متعه ماشافها من زمان مني
شلت منه تعب اليوم كله
انا : فيصل ....
هو: عيونه..
انا : انا احبك تدري
هو : اكيد ما يبيله سؤال
اعطيه بوسه و اروح اخذ شاور
ينام فيصل ..
و بعد ما يقوم نبدل و نطلع انا معاه و يا سارا
وفي الصبح قمت اقوم قبل موعدي..
اغسل و ابدل و اكشخ ...و هالمرا قامت تطلع العطور و المكياج
حتى صالون الهوتيل قمت اروح له..
في هذا اليوم كان الجو ممطر وايد
فما قدرت اطلع مع سارا خفت عليها قعدت في اللوبي
اشرب قهوه..
و من الفراغ و الفضاوه حبيت اسوي لقيس مفاجأه
رحت الرسبشن و طلت منهم رقم الغرفه و اتصل عليه
هو: الوو
انا : برد و مطر نزل وياك الرين كوت
هو : ((يضحك بصوت عالي )) يرد علي باستغرراب..كلش ما توقعت انتي ..
انا: يعني اسكره ؟؟
هو: اكون شاكر لج عشان انزل اييكم بعطيج شي..
انا: بسرعه انطرك في اللوبي
هو: بسج لا اتأمرين ..
انا : هاههاهاهها باي
بعد 10 دقايق ينزل
بيده جيس ..ايين جيس كينزو !!
شاري حق بنتي بدله كينزو !!
انا : ابيييييييه وااي شنو هذا حق سارا ..؟؟ اطلع البدله و اقيسها على بنتي من برا
تسحبها بنتي و تصرخ ((حدها تفشل ))
هو: تقطعها بالعافيه ..تستاهل ..امس شريت حق بنتي شي ..قلت اييب حق بنتج
انا : مشكوور مشكوووووور مدري اشلون اشكرك ...بخليها حق العيد..
هو : امشي نروح نقعد في مكان صاد مو في اللوبي..
انا و هو شربنا قهوه ..اكلنا
نامت البنت..و بعد ساعه
صمت..
عيونه تتكلم..
عيوني ترد عليه
كلام العيون متعب
احاول اجذب عيونه
و اغير نظرتي
ارد لعيونه...و اخدر
بلحظه ضعف
يطلع الفلوس من بوكه..
يدفع الحساب
بدون مقدمات
يقوم و يمدلي ايده
هو: امشي وياي الدار
انا : امد ايدي بعد ماخارت قواي امام رغبتي
اسحب عربانه بنتي ..
اصعد وياه غرفته
بدون لا وكلمه
ادخل غرفته
استأذن لدخول الحمام ..لتنظيف نفسي..
اغسل ويهي
في المرايا ....اشوف نفسي..و بسرعه اهرب من عمري
افتح باب الحمام ..
اطلع
الاقيه في نفس مكانه و لا حتى قط كوته..
انا شوي صحيت من السكره بعد ما دخلت الحمام و غسلت ويهي
...
هو :
يمسك ايدي يبوسها ..
يهدني
يدخل الحمام ..
ياخذ شاور
افتح التلفزيون ..قناه الام بي سي
حفله محمد عبده
اغنيه الاماكن !!
ليش الاماكن الحين بالذات..
و صوت المطر برا
و يفصلني عن الفاحشه ثواني
و بنتي النايمه
و زوجي
زوجي
زوجي
بيتي
بنتي
بغيت اسحب عربانه بنتي بسرعه و اطلع بس ما سويتها

طلع من الحمام
لاف نفسه في الفوطه
هو : اموله اقولج شي..
تدرين على كثر ما انا مشتهيج
بس مابي اسوي شي
تدرين ليش
مجرد ما افكر ان انتي متزوجه و لج زوج
و انا متزوج و لي زوجه
و في نهايه اليوم كلنا بنروح لهم
و اهم مضحين وايد عشانه في اشياء و احنا اشكثر انانيين
يخليني صج ما ابي اسوي فيج شي..
سكتنا
هدوء انا ما رديت
قمت
سحبت عربانه بنتي
لمني
لمني حيل
و طلعت
قبل لا اسكر الباب عطيته نظره شكر
ان ماخلاني اسوي شي اندم عليه عمري كله
قعدت ساعات افكر
بروحي في الدار
لين وصل ريلي
غمضت عيني
سويت نفسي نايمه
دش فيصل شوي شوي
بنتي حست فيه
قامت
و مسكها و لا نام
نزل تحت
انا نمت لي الساعه 9 بالليل !!
قمت على حس بنتي
بنتي تمدلي بسكوته توكلي
فيصل: تبين الصج الله يعينج عليها
يعطيج الف عافيه
انتي صج صبوره
انا 3 ساعات ماني متحمل
ابتسم
اخذ فوطتي
و ادش اسبح
و اطلع مع زوجي
هدوء
ماتكلمت
حاول يعرف شنو فيني ماقدر
هذا كان اخر يوم لنا
نرد
نسوي جناطنا
من باجر الظهر نروح المطار
و في الطياره
استرجع الشريط كله
امسك جتف زوجي
المه حيل
خوف
تأنيب ضمير
غلط
اثم
تعب
تعب
كل خطيه يجرها تعب سنين


58 comments:

kila ma6goog said...

من كثر ما البوست قوي ودي اسبج

مادري انتي تتخيلين الواقع , أو تتوقعين الخيال؟

مو قادر أصدق انه في ناس خيالهم جذي

صدمتيني الصراحة

Q8LoVeR said...

صارلي مده ادش اقرا بوستاتج واسكره
هالمره حريتيني صج قصصج تحر بس مادري ليش اقراها
مليقه ترا انتي
وايد مو شوي

Cr8ivia said...

اندمجت لدرجه يوم وصلت دشوا الدار
اقرا كلمة كلمة و اقول يارب حلم يارب حلم! لا لا لاتخون ريلها!
فيصل ما يستاهل!!

تفاصيل تذركها لماضيها و حبها القديم كانت آوج .. تعور
حسيت جنه صج .. أي وحده تقراها تحس ان اوخ انا ..

i guess the whole idea is about perfidiousness amd disloyalty, and how a woman/man should think and consider things before any step he takes on this path ! *thumps up*

Q8LoVeR said...

صارلي مده ادش اقرا بوستاتج واسكره
هالمره حريتيني صج قصصج تحر بس مادري ليش اقراها
مليقه ترا انتي
وايد مو شوي

Cr8ivia said...

yeah i forgot to say that u "sometimes" exaggerate alot :P

PearL said...

انتي تيننين

قصتج قهرتني

من اول ما المرا فز قلبها باللوبي وقامت تكشخ حق واحد مو ريلها
وتقعد مع ريلها واهيه تفكر بغيره

قهرتني
خاينة
حتى لو ببالها خاينة

والمشكلة مودية البنت معاها غرفة الريال


ماشالله عليج
خيالج عجيب

Яeema said...

الخطيئه أجمل من أن تقاوم



أبدعتي بالطرح

تسلم إيدج


;)

charisma said...

3ajeeebaa el qe9aa 3ajeebaaa
mashalah 3lech ro3aa el 9ara7aa

7dy endmjt glbii gam yrgaa3 wlaah
thaaq `7lge 3lehaa

ga3daa agol way lesh troo7 daraah sh`hal `3abaae

aw lesh aw lesh aw sh`hal yara3aa
aw shlon aw ma lon hehehheh

bs ehyaa wayd e`3le6aat wayd , yar3ta 3lehaa wayd wayd

bs wayd 7lwah tslam edch
wage3eyaah wayd el qe9a
:)

albandry said...

ياكرهج يافطيم
وايد اندمجت مع القصة نسيت حتى اليهال مانومتهم
دشيت بالعميق بالقصة وقعدت اتخيلهم ابهاروودز

وكلله شغلج رياييل ايعوروون القلب يعني ماكوش هكا رجال


وعندي اقتراح فكري فيه بعقل
جمعي هالقصص وسوييهم كتاب
صدقيني بيضرب ضرب
فكري جد وانا خويتك

bo9ali7 said...

واااووو
قصة ممتعة..تشد الاعصاب..وايد وايد حلوة
والله مادري شقول
:S
مو هينة انتي

Q80-Chill Girl said...

متابعه للبلوق من شهر و قبلها مريته مره او مرتين من زماااااااان

الحين صرت مدمنه على سوالفج و قصصج

مبدعه و شاده للانتباه، و راح ااذيج لاني اليوم قررت اني اعلق و بشده على المقالات اللي كان عندي شي اظيفه فيها على ماقاله بقية القراء

بالنسبه لهال "لوبي" مجددا تمسكين بمرآة مزخرفه بخيال كويتي بحت بالفاض تجلسنا على كرسي الواقع لنشاهد انفسنا، قد لا نكون المعنيين مباشره ولا الممثلين و لكن قد نكون يوم ما؟ و قد يكون من هو اقرب لنا من انفسنا بمكان احدهم

أهم شي لازم نقر فيه اننا بشر وو محد كامل، عن نفسي وقعت بمواقف كنت اقول امبيه شلون هذي تستخف و تسوي جذيه؟ و كنت اعتبر انه من السذاجه الوقوع ببعض الاخطاء، بس بالنهايه استنتجت اننا بشر و العبره باللي ما يغلط مره ثانيه و يبعد عن الغلط لانه يشوفه مهين له دينيا و انسانيا

مشاعر الزوجة تجاه الذي كان طبيعيه و قد تصيب اي انسان (ذكر او انثى) و لكن يختلف هذا الشعور من شخص لآخر و يختلف الناس بشخصياتهم و ظروفهم، دخولها الى غرفته و مع ابنتها "=واقعها" شيئ قد يعتبره الناس خيانه فادحه ولكنها بلحظة ضعف تهورت! "لا اعتذر ولا اعتبرها لم تكن خائنة ولو للحظة ولا ادافع عنها لاني اشوفها غلطانه بهالحركه بس احاول اكون موضوعية" ولكن اهتمامها بابهار قيس و شد انتباهه ماخلاني استغرب انجرافها، استغربت عقله و خطبته الرزينه و انه اكتفى ب لمّه؟ فاما هو كما تم وصفه بالظبط فكر بعقله و طق روحه طراق واقعي، او انه الذكر اللي يكفيه شد الانتباه، لكن التحليل الاسلم هو السير مع كلمات القصه و مشاعره التي وصفها بان الشريك لا يستحق الخيانة لمجرد وجود شعله قديمة تاججت بغياب الزوج/ الزوجه

استغربت من اغداقها بالسعادة على زوجها، اعتقد اللي يفكر بشخص ثاني مو ممكن يرتاح مع غيره؟ و ان حصل فالموضوع جسدي و ليس عاطفي و هنا العودة لكوننا بشر و هنا كانت اكثر اللحضات ايلاما عندي، كسر خاطري زوجها

نروح لبنيتها اللي فشلت انها ترجعها لارض الواقع و تخليها تطوي صفحة الماضي، هم كسرت خاطري البنت

ضعف شخصيتها و ضعف الوازع الديني و العاطفي عندها سبب انكسارها و حبها لتذوق عبق الماضي ولو بالخشيشي و البووق كسرت خاطري انها ماعرفت شلون تكون انسانه اقوى من شهوتها و انها ماقدرت تخط الخط الا بمساعدة منه

قيس لطيف و له ثلثين الخاطر، حسيت العقلانيه ظهرت بشكل متاخر، ما الومه اهي لفتت انتباهه و دعته لدخول عالمها، كسر خاطري انه لقى العقل بوقت متاخر حتى اللمه ماله حق فيها و ان كانت افضل من عواقب اخرى كانت ممكن تصير بس يبقى بشر و زين انه وقف عند هالحد

السؤال، هل هذي اخر زله؟ ماراح تحاول تروح له او يروح لها بعد مضي العمر و تفاقم مشاكل الحياة بزواج كل منها، و هي الفتره اللي يكون فيها الانسان باضعف لحظاته؟

يبقون مننا و فينا و ما اقسي عليهم ولكني اقول العقل زينه، و خل ايجرب كل زوج/ زوجه انه يحط روحه مكان الشريك و يشوف احساسه قبل لا يسوي اي شي

طولت التعليق بس بخاطري من زمان اعل قلبجبتعليقاتي لان بوستاتج حلوين، الله يعطيج العافيه

ToFFeY said...

قصه ممتعه يعطيج العافيه

Enter-Q8 said...

وبعدين وياك انتي ليش جذي
احلى ما في قصصك الصورة اللي تنرسم بمخيلة القارئ
رد

كله مطقوق

كويت لوفر

Cr8ivia

albandry

و الباقيين اثبتي بقلمك نجاح توصيل القصه و صورتها بمخيلة كل قارئ

تكفين يا معودة احترفي
و فكينا من فجر السعيد على الاقل
و الله تكسبين ثواب فينا

Carrie said...

Oh my god !
at the big. 7asetha siiiiij b3den estw3bt ena la cz 7da qaweya eheh wayed endemajt sara7a plus ths is my 1st time i comment 3endich sra7a ma qedart amr mroor l keram .. thx dear and keep up the good writing ;)

Expatriate said...

قصة رائعة .. رغم اني مدرك بأن قصص حقيقية كثيرة صارت وتصير وبتصير مشابهة لهالقصة وباقي القصص في البلوغ .. فقصصج رغم انها من خيالج الواسع الا انها تعكس واقع لا غبار عليه

المهم
للأسف مثل هالقصص تخليني أكره اعيش في مجتمع تحدث فيه مثل هالقصص .. مثلا
قضية ان الزوجة كانت تشتغل مع هالريال في السابق هي احد الاسباب اني ارفض ان زوجتي تشتغل في مكان مختلط .. وانا نفسي بحاول كثر ما اقدر لما ارجع الديرة اني اتجنب العمل في مكان مختلط
ثاني شي .. الزوجة نفسها خانت زوجها .. سوالف مع الريال غريب عليها لا ومع بنتها وطالعه معاه يشترون ثياب ؟
وبعدين اصلا الريال ما يستحي .. هالاشكال اللي مو متربية ولا تعرف ربها ولا تعلمت السنع اهي اللي قاعد تزيد الخراب
استح على ويهك .. ريال شكبرك متزوج سوالف وغشمرة مع مرأة غريبة

انا بصراحة قهرني وحرني الريال اكثر من المرأة .. هذا ديوث هذا في قمة الدناءة بالنسبة لي وفي وجهة نظري لأنه اهو اللي فتح الباب وسهل حق مرأة غريبة ومتزوجة .. يعني انت متزوج ومرتك حامل ومسافر عنها .. مادري شقول بصراحة .. بس احتريت .. مو من القصة ..لأ
لأني ادري ان مثل هالاحداث تصير بشكل مستمر في المجتمع الكويتي والخليجي بشكل عام ..

اللهم اني اعوذ بك من الخبائث ما ظهر منها وما بطن

شلختينا لوير .. بس الواحد نفسه قامت تنسد ..


بعدين اللي يقول عادي الانسان يخطيء ومحد كامل
مو انا بقوم باخذ لي رشاش وبذبح لي جم واحد من الشباب باطين جبدي واقول عادي الانسان يخطيء ومافيه احد كامل .. خو اقصاها حشيشة وذابح لي اثنين
اكيد المنطق يقول الاخ مظيع
انا اقول نفس الكلام .. الاخطاء اللي ممكن نتجاوز عنها هي اللمم
لكن اخطاء كبيرة مثل القتل والزنا والسرقة هذي حتى لو واحد تاب لازم عقوبة

ولو اني مكان هالزوج ويوصلني خبر ان زوجتي دخلت بنفسها مع بنتها غرفة ريال غريب .. حتى لو ما سوت شي .. كونها صعدت غرفته وخانت ميثاق الزواج هذي ما اثق فيها لو شيصير وخلنا نكون صريحين .. ولو اني مكان زوجة هالحيوان القذر اطلب الطلاق مباشرة

مادري شهالديرة اللي عايشين فيها .. اللي صار فيها الخيانة شي بسيط وآسف وكلمتين حلوين ويالله الريال او البنت غلطوا ونسامحهم

q8y_saint said...

الخيال دائما اجمل من الواقع

مبدعه فطووومه

ننتظر المزيد

Krakatoa said...

المره اللي من هالنوع تنداس بالجوتي وانتو بكرامه وتتفل بخشتها

وفناقر بيت اهلها وارفع عليها قضية حضانه واخليها بيزه ماتسوي

هاذي اصلا مشروع عاهره يبي يكتمل

==
الزوجه المفروض تكون حافظه عرض وشرف ريلها اصلا اهي من فكرت إتلاقط بعيونها حق هالتعبان اللي مايستحي مخرب البيوت في نظري اهي إسقطت بالامتحان
==
الاسف فيه من هالنماين بمجتمعنا
==
كرهتج اليوم على هالبوست :(

فركاش said...

كل شي ينغفر إلا الخيانة

Krakatoa said...

وبعدين في نقطه ثانية هالجمله تثبت ان هالمره وريلها علاقتهم اصلا مبنية على الشك وانه لهم علاقات سابقة

اقتباس
===
(او يمكن لو زوجي لو مسافر بروحه و شاف صاحبته و انبه ضميره ان اهو وياه راح يشتري الي ابيه)
===

الريل الظاهر ردي واهي رديه مثله وقالهاالقرآن الكريم

النور (آية:26): الخبيثات للخبيثين والخبيثون للخبيثات والطيبات للطيبين والطيبون للطيبات اولئك مبرؤون مما يقولون لهم مغفره ورزق كريم

lawyer said...

صباحكم ورد :)


ابيييييييه ماشاء الله تعليقاتكم احلى من بوستي !!

والله كل تعليق اروع من الثاني ...



مطقوق
هههههههههههه تموت تمون ادري انا احر مرات
مشكوور كلامك يشششششششششجع





كويت لوفر
ههههههههههههههههههه
هااو ما يبت شي يديد ادري انا احرك و مليقه ادري
بس عاد انت تحملني شوي





كراتيفيا

بعد روحي
ايييييييييي نفس شعوور وحده من صاحباتي وياي على الخط و تقراها اقولها سكري التلفون تقولي لألأ
يوم وصلت الغرفه تهاوشت وياي
ليشششششششش راحت ليشششششششششش
هاو كملي !!

سفلت و تالي كملت
مشكوووووووووووووووووووووره




بيرل

اي صح محد مثالي
اي مسكينه شفيتها ساحبه العربانه وياها

lawyer said...

ريما

حبيبتي انتي

مشكووووووره كلش ما هقيتج راح تقرينها العصر لانج ما تحبين البوستات الطويله هالحزه :))


كاريزما

بعد روووووووووحي
ههههههههههههههه

اشتطيتي ؟؟
وياهم ؟؟
ههههههههههههههه

احسج جذي قاعده تهاوشين و تصرخين

اي والله واقعيه




البندري
لووووووووول مت ضحك
ههههههههههههههه

اهم شي هارودز هااا

لا في في كل الرياييل خونه و في رياييل ما يشكون و في ريال وايد

انتي لا تعتقدين قيس وايد برفكت بس قيس مسوي جذي..حق وحده كانت بحياته
مدللها من ضيقه الخلق يتمشى بلبدن بروحه
و الريال تدرين شي وايد مهم عنده يكفر عن ذنوبه
يسوي نفسه زين

و يخطط لي جدام لرغباته



البندري انا اتمنى اكتب
لكن اهلي عندي وايد مهمين من انهم يواجهون مجتمع تظهر فيه وحده قصصها اجرئ فيه من ليلى العثمان

طائر بلا وطن said...

شي احسن من شي و مثل ما قلتي ذنب ساعة
يجر وراه تعب سنين دنيا و آخرة لنا بالمرصاد

باب التوبة مفتوح و رحمة الله واسعة
بس في نفس الوقت الله اعدل العادلين و أكبر
غلط تهوين الذنوب أو حصر المشكلة او الذنب
بالزنا و تغافل كل باقي الذنوب و المقدمات

المشكلة إن الباب تبطل بالنسبة للرجل
أو البنت خاصة ان واضح انهم ضعاف و السقطة
منهم متوقعة في اي لحظة

فيصل من أجمل ما يمكن و جذي قاعد يصير
تتوقعين جدام أي مشكلة أو أزمة تصير
بينهم حق منو بتلجأ؟ و ما راح تبرر حق
نفسها ؟

:

أدري قصة
:p

بس تعكس جزء من واقع .. الله يهدي الجميع

قصصج حلوة وايد بس تعور القلب مرات

lawyer said...

بوصالح :)

سوري اني شديت اعصابك بس عسى ارتحت عقب؟



q80 chill

اول شي اشكرج وايد على القراءه

و على انج عطيتيني من وقتج و علقتي

اشكرج وايد على التعليق المبهر

اقولج شي ما تصدقينه

اني قريت تعليقج اكثر من اربع مرات

تالي قلت لنفسي

شيلي جيرل شرد عليج !!
احرجتيني تعليقج احلى من بوستي :)


برد عليج نقطه نقطه



1- لوبي
فعلا اخترت كلمه لوبي
لكل ما يعنيه هذا المكان الصغير من اهميه
تشوفين فيه ناس من سنين ما شفتيهم
تشوفين ناس يدد
هو ملتقى عالم ثاني

لوبي قصه بروحها
تبين الصراحه بحياتي ماا حسيت ان في احد قدر و حس في الي انا فيه
بادق التفاصيل جذي

كان وايد مهم عندي كلمه لوبي

صج وايد مهمه


2-لازم و لازم و لازم نعيش الواقع
و نتذكر ان احنا بشر
كثير ممن يلبسون اقنعه
بس كثير وايد يغلطون ورا الستار

احنا بشر و نظل بشر

3-مشاعر الانسان في فتره الركود
و ايي شخص ممن الماضي
يحرك موج المشاعر
اعتبرها مثل رياح البحر
الي اتيي اتطير الي في القلب و تمشي

4-احساس بتأنيب الضمير راح يعكس على زوجها..ثاني شي لما الوحده تكون وايد سعيده اول من راح يفرق عليه الي وياهاو الي عايش معاها



و اخيرا
البنت الزوج ضعف الوازع الديني
الواقع
الملل
الثقه بان محد راح يدري عنها
وايد وايد اشياء
تخلي الناس تغلط
الشيطان
و ظروف مهيئه

الزوج
الحبيب القديم
الماضي
العقل المتأخر

ترا احتريت منج صج
تعليقج احلى من بوستي :)

ما عليتي قلبي
بالعكسسسسسسسسسسسسسس

امتعتيني


ترا الوحده تتحتاج قرصه عشان تفوق
يمكن الحين اهي اخر را تسوي جذي
لان طراق ياها




توفي
حياج الله
اهلا و سهلا نورتي

الله يسلمج و يعافيج




حاكي عقالي

مشكووووووور
تسلم تسلم
اعتز وايد في شهادتك

لا عاد احتراف ما عندي وقت
بعد اقولك ليش ما عندي وقت
;)

حاليا عرض علي
اني اجمع بلوقاتي و احطهم في كتاب
و يصير مجموعه قصصيه

خايفه من التجربه
خايفه من اني اواجه العالم باسمي الحقيقي من بعد البلوج

ما اقدر اتصور واحد من اخواني
يكون قاعد في مكان و يسأله ريال
اوه هذي شيتصيرلك الي كاتبه قصص
الجنسيه و الزوجيه و قصص الحب !!

ادري بتقولي لازم تكتبين شي جنسي
او عاطفي
ما اقدر هذا تايبي

هذا انا
ما اقدر اكون مبدعه في قصه امراه قاعده على البحر تكلم الطبيعه
اموووووووووووت

Яeema said...

lawyer

أنا ما هقيت إني أقراها

بس قدرتي إنج إتخليني أقرا

معناها

قصه حلوة
قصه مترابطه
قصه فيها تشويق

عبرة

ماشاء الله

يمكن ليش أدرس هالأيام فمخي صاير يستوعب أكثر
هههههههه

خيوط العنكبوت طاحت كلها

:p

لا بس و الله قصتج بدون مجامله إتشد

Mudhaf said...

اكيد ماراح ازيد على اللي قالوه ;)

بس ما زلت على عرضي
و بدون لحد يعرفج :P

سالفة قلب said...

قصة اندمجت فيها
وفيها عبره

المفروض من البدايه انها ماتهتم وصفحة الماضي اتسكرها حتى لو تمثلت لها الذكرى جدام عينها

( ولاتتبعوا خطوات الشيطان)

وانا اقرى قصتج تمثلت لي هذي الايه فعلا الشيطان مايأمرنا بالمعصيه الشيطان يزين لنا المعاصي

Dr. Saleh said...

قصة حلوة ومشوقة واللي يبدأ قراءتها لازم ينهيها

يعطيك العافية كاتبتنا المبدعة

violinist_q8 said...

قصة روعه

اخاف اعيشها

واشوف أمل بحب ذكرياتها تعوض فيه
زوجها

و حاس لابعد لو عرف زوجها شلون بيحكم
عليها

بتقوله صداقه عميقه وكادت
توصل لمرحله عميقه لو لا صحوتهم ؟


لوير

باختصار




روعه

sologa-bologa said...

قايل لج من قبل

كتبي مسلسل
ما طعتيني
!!!!

اذا كان المكتوب حقيقة
فنقلها كان وايد ممتع
واذا كان من الخيال
بصراحة خيال واسع سيناريو متكامل
وحوار واقعي


والمسلسل شنو
عبارة عن ربط مجموعة من المشاهد

أوف
أنا حمقت

Kwaitiyya said...

وااااي لوير
أبدعتي والله العظيم
قلبي قام يعورني

خيالج مو طبيعي مشالله عليج ! هالمره يا لوير كتبي لنا مسلسل برمضان ! نبي قصص يومية برمضان مالنا شغل

جد القصة من الواقع
وتصير وايد

مشالله
عساج على القوة

barrak said...

قرأت قرأت قرأت
اندمجت
استغربت
ضحكت
اخذت القلم كتبت
كتبت
كتبت
نمت
قعدت كتبت كتبت
كم انتي جريئه

DAiSY said...

بصراحه اتوقع كل وحده تقرا هالقصه اتقول اخخخخ !!! هذي جنها انااااا !!!؟
تبين الصج طقيتي عالوتر .. الموقع: لندن) المكان: ( هارودز ) الموقف (صدفه) الموضوع: ( حب قديم ) الواقع: ( بنت أو ,لـــد) .. مني فيننا ماعندها موقف يشبهه او صدفه مثل هذي .. بصراحه ابدعتي ، استمري :)

DAiSY said...

طبعا افترض انج فهمتي قصدي في ان اغلبنا عندنا صدف مشابهه لندن ->لوبي
هارودز ، حب قديم ، ياهلج يفشلج
اكييييييييييد مو اكثر من جذي ، الحمدلله الدين موجود و العقل موجود
بس جد شدتني القصه

shakshaka said...

WOW endemaaajt 7addddy wo kel ma6ara 3laiy shay bagoooolah alga mashalaa elrabi3 katbeena bel comments hehehehe bas tara walla etha kentay mestansa mn shay mako shay malich khilga! 3ayal min ejabil obooh wohwa eshoof lakhbar wo kashretee min hal athoon laih hal athoon? hatha etha kent mestansa:P min 9ijjy shu3ooor widdddy a6eeer;p kho il 6aira 7adha ni9 meter 3an el arth LOL

Q8LoVeR said...

لويرووو حطي القصص بسمي ماعندي مشكله
بس لاتحاتيني
ولي 49% من الارباح

kuwaitia said...

وااااي القصه اتينن صج اندمجت فيها


خاصه لما قلتى دشو الدار بققت عينى ولما

طلع بالفوطا قلت لالالا خلاص صارت بس اشوه

خلاها تروح

ابدعتى

lawyer said...

صباحكم ورد

اسفه على التأخير في الرد

مممممم اخر واحد كان منو ..


كاري
وايد احب اسمج لانج اتذكريني في كاري براد شو مدري ليش..


مشكووره وايد على الكلام المشجع وايد و اشكرج على مرورج و على وجودج

حياج الله






expatriate
الله ياااااااا اناااااااا هذاك اليوم حشيت فيك حشششششش مت حرا

كل اهلي اعرفووني و السبه المنتدي الي تكتب فيه حاط فيه لينك بلووقك و منك الناس عرفتني

و كل وحده اقولها من وين عرفتيني

تقولي من اكسباتريت !!!!!

بالنسبه لتعليقك

انت اكثر واحد تعرف ان الحياه مو مثاليه
ون محد مثالي


اذا بتشوووووف راي الصجي
انا اكره قيس ((حبيبها السابق)) مو زميلها

لان اهو صوره للاستغلال

و انا اهني في وضع ما اقدر انا اقيم شي انا كاتبته لكن والله صدقني
مو قصدني اشلخكم
انا اكتب و اهو اي وياي جذي


ترا القصه من وحي خيااااااال

صغته في وقت بسيط ..
استنيت في كتابه القصه و تالي كوبي بيست

بدون ما احط في بالي ان انصف رجل او مرا

اكسباتريت
قووووووووول امين
الله يثبتك
الله يحفظك
والله والله احب دينك
و اموت على التزامك
ياااااااااارب عيالي مثلك
جذي سنعين يدافعون عن ارائهم

انت مو برفكت في هالزمن الي انعدم فيه وايد شغلان انت بيور






q8y siant
تسلم مشكوور :))


اي والله الخيال امتع




كراكاتو

((قاعده اتحلطم اقول ولين زفنا الحجر زفنا ))

ههههههههههههههههه

الحين اهووووو اشدراه انها سوت جذي


اهو ما يعلم الغيب
اذا بنسوي شي بالخش و الدس

الريال اشعلييه قاعد في الكور مسكين لا له لا عليه



اما بالنسبه للزوجه
اي والله المفروض تكون ستر و غطا
في حديث ماني حافظه نصه

يقول من واجبات الزوجه اذا غاب عنها حفظته



بالنسبه انك كرهتني
اعرف شعورك
بس ادري ما اهون عليك :)




فركاش

الله اش هالصوره

طبعا كل شي ينغفر الا الخيانه




كاراكوتا
لا ريلها زييييييين

بس اهي تفترض انه يمكن يسوي جذي
يعني بتبرر حق عمرها

لانها منكر حسنه
جليله حياااااااا





طائر بلا وطن
مشكوووور وايد على ثنائك الطيب
فعلا واقع

و اتصدق انا لما اكتب قصه و اتخلص ما يطلع فيني السيناريو برا

بس هذي خليتوني اكمل فيها
و اقعد اصدق و اتخيلهم

:))



ريما

واااااااااااي
واااااااااااي

يلوموني ليش اموت عليج
ياختي انتي غير اتعرفين تقدريني
:***


مضف
مشكوووور
ما زلت على عرضك ؟؟
مممممممممم

انا موافقه جد
يالله GOOoO 4 it



ياناس شهدتووا على مضف !!



سالفه قلب

حياج الله عمري نورتي
وااااااي استوقفتيني وايد في الايه
مشكووووووووره
سالفه
صصصصصج صصصصصصج صصصصصصج
مشكوووووره

احتاجها انا مو القصه



د.صالح
مشكوووووور
ابداع حسك اهو الي قدر كتاباتي

اشكرك :))

نون النساء said...

عاد سميتي هاذي
:P

فطووووم
حسبي الله على ابليسج
تدرين انه استمتع وايد اني اقرا قصصج القصيرة..

مرات احس انج تسولفين عن احد اتعرفينه
من كثر وصفج حتى للأفكار اللي تدور بداخل الشخصيات..

وتعليقاً على القصة..
امل اغلطت من اللحظة اللي اضعفت وراحت فيها غرفة قيس..
حتى لو ما سوو شي
روحتها هناك دليل على ضعفها
وان العلاقة اللي تربطها بينها وبين زوجها ضعيفة وممكن تنهدم بأي لحظة


استمرررررررررررري

Purplecious said...

صباح الفل

تدرين أمس بالليل دريت انج منزله قصه

سألتني رفلكشن قريتي قصه لوير؟

أقولها لا أنا اليوم(أمس) بالدوام داشه بلوقها مافي شي جديد

وااااااااااي يحرررر كمبيوتر الدوام


المهم


اسلوبج واااااااايد حلو مشاءالله و مشوق

بس مادري ليش حسيت بمشهد الغرفه هي وياه فوق جني قام أطالع فيلم أجنبي

;p

بس شاكوووووووو ماخذه بنتها وياها!!!!!!!!!؟؟

حسافه لوير لو مخليه البنت تتكلم و تفضح أمها جلييييييييييلة الحيااااااا

ايييييي بعد

كان ودي تحطين شنو كان يجول بخاطر قيس لما كان ياخذ الشاور و هي بالدار... و ما عرفنا بعد لما شافها أول مره هل حس مثل ما حست وقام يتعمد يروح اللوبي عشان يشوفها صدفه و يتكشخ و يتعطر مثلها؟


يعطيج العافيه

و الى الامام دائما

Purplecious said...

اييي بعد نسيت اقول شغله

مشكوووووووووووووره
مشكوووووووووووووره

انج خليتيها جزء واحد

انا لما وصلت الماستر سيين (مشهد الغرفه)قلت لاااااااااااا الحين راح يخلص الجزء الاول

بس زيييين سويتي الله يعافيج ما نبي اجزاء

كلو على بعضو كده تماااااام

2 u ALL said...

وايد حلوه .. القصه ... !!! وأنتي -ماشاء الله عليك - فعلاً مبدعه في كتابتها و سردها وصياغتها

جمالها وحلاوتها .. في "رأيي المتواضع الشخصي" .. أنها تلامس الواقع في كثير من جوانبها ومعانيها وأحداثها

وأنها تصور بوضوح .. وتشرح بدقه كيفية تعامل وتصرف "النفس البشريه" من خلال ظروف و مواقف وأحداث "مفترضه" منك في هذ القصه .. و كيفية تفاعلها وتعاملها مع هذه المعطيات والظروف

لكن المهم .. أن هذه القصه تعطي مثالاً وتشرح صنفاً من أصناف "الأهواء" الكثيره والعديده الموجوده في داخل نفسنا البشريه .. وكيفية تأثير هذه "الأهواء"على تصرفاتنا الشخصيه وعلى أختيارتنا وأفعالنا .. وأهنيك على أظهارك -في هذه القصه- الخيار الجرئ
والقوي لأي "هي" أو "هو" يمرون في ظروف مماثله

الاراء المختلفه والتعليقات الكثيره المكتوبه عندك على القصه ..هي دليل على أختيار كلاً منا ما يناسب "هوى نفسه" ..!! .. أو أن يظهر شئ أخر غير "هوى نفسه" ليرضي هوى نفسه

النهايه .. الأنسان يواجه معطيات وظروف وأحداث في حياته ... تؤثر بها لدرجه كبيره "أهواء نفسه" وتؤثر على أختياراته وتصرفاته وأفعاله .. ويحد هذه "النفس" ويسيطر عليها ويروضها معايير منها ... التربيه ,الأخلاق,الثقافه, العقل,ثوابت المجتمع ,والتمسك بالدين ...ألخ

فكل الخيارات أي(الأهواء) موجوده في النفس البشريه ... وعلى ضوء قرب أو بعد أي "نفس أنسانيه" من هذه المعايير يكون أختياره وتصرفه وفعله

وأسف للأطاله ... بس هذا تعليقي على القصه "البديعه" التي كتبتها أيدي مبدعه

Enter-Q8 said...

اقول لووير
ترى انتي مو قاعده تيبيين شي من الخيال ترى هالسوالف موجوده بالواقع
و كتاباتك اقسم بالله اهون من اللي قاعد يصير بأروقة المحاكم
حلوة اروقة المحاكم
وبعدين لو خادشه للحياء ما راح يخلونك وليد الطبطبائي و اي عضو ما يشتهي وزير الاعلام

Alather said...

يا قوة
;P

بس عجبني السرد
:)

ينطيييج العاافياا

nachla said...

speachlesssss

nachla said...

وصلت للغرفة
واثنين والشيطان ثالثهم
يطلع بروب الحمام

وما صار شي

الخيانة خيانة حتى لو كانت بالفكر
اشرف لها تتطلق وتحب على انها تكون مزدوجة القلب

loved it

فركاش said...

بيرل
هذي صورة شاعر الحرية أحمد مطر

lawyer said...

صباحكم ورد لليوم الثالث


لاني ما ابي ابخش في حق اي تعليق طيرني من الفرحه

و خلاني اقرا مرا و مرتين و ثلاث

سووري وايد اني تأخرت على الرد بس والله لظروف عملي



و لاني ما ابي ارد اي ارد

ابي افصفص

((هذره بنتنا شنسوي ))




فيوولينست

انشاء الله تعيش قصه حب روعه
و تنحب و لانك انسان حريص على الاخلاص فالله راح يرزقك وحده بس تطالع عيونك و اذا انت راضي او لألأ

قووووووول امين

اشكرك على المديح





سلوجا
شسوي يا سلوجااااااا

شسسسسسسسسسسسوي


لا ترا والله كلها خيال في خيال


خياااال ما سمعت عنه بعد
يعني تبي اقولك سر بس بليز لا تقول حق احد
انا كتبت القصه شوي منها
و خليته تالي يوم اليمعه

العصر مع مطاره الشاي و حاطه السماعات
باذني و ابوي يطالع مبارات ..

رحت استنييييييت في الكتابه
كنت اسمع
اغنيه البرواز
الاماكن
كلك نظر

و هذا الي طلع وياااي

واي سلوجا يا كرهك خليتني اقولك اسراري

الابداع مو مني من مطاره الشاي
:)))





كويتيه

حياااااااتي انتي بعد روحي
انشاء الله في مشروع
بسييييط

بس مدري شنو بسوي وياي مضف

الحين انا بخليكم ويا مضف الي كل يوم مواعدني في شي بخصوص الكتابه


يعني اذا شفتو مسلسل رمضان بأسمي
يكووووون مضف اوفى بوعده

:)))




براااااااااااك

رووووووووووووعه

ضحكتني

نمت ليشششششش؟؟

سرحت وين؟؟

لندن
مصر
باريس؟؟

وين سافرت ويا القصه يا براك
:))



ديزي
حياج الله
نورتي

اهلا اهلا :))

اييييييييي
لاحظتي

اماكن الكل له ذكرى فيها

طبعا طبعا فهمت قصدج
افا علييييييييج يا الغاليه

لا تخافيييييييين
حياتي انتي لا تحتاتين

والله كلامج عدل





شكشكه
هههههههههههههه
ترا انتي تخرعيني في تعليقاتج
مرات اشك انج وياااااي في الصاله
ههههههههههههههه

و انا قاعده اكتب القصه و يمي ابووووي
يحاجيني و انا مو يمه





كويت لوفر
ههههههههههههههههههه


مالك امل من صصصصصجك انت
هههههههههههه تعبانه فيهم شقا عمري




كويتيه
تدرين ليش
لان الفكره الاساسيه الي عندي في هالقصه
ان الريال
و المرا المتزوجين
يردهم مرات شي واحد
الطرف الاخر الي قاعد ينطر

و اذا يعزززززج صج

ما يبيج تغلطين

فاكيد يعزها

lawyer said...

نون النساء
نون حياتي

منو منا ماله ضعف

منو منا ما يغلط

لكن فعلا

تدرين لما قريت القصه كقارئه احتريت

هههههههههههههه
اتهقين من شنو؟؟؟

ان تتكشششخ و راحت سنعت بعمرها


طبعا انا اقرا حالي حالكم بس عقب ما اكتبها في يومين

و هم تبط جبدي مرات كتاباتي

هههههههههههههههه

راح استمر انشاء الله





بربل
اييييييييييييييي
حسيتي فيني لما قلت لج عن اجهزه الدوام
من الويندوز او شي
يييييييحر

لازم نمشي ونسوي ريفرش!!

هههههههههههههه

اما عن بنتها
ههههههههههه

مدري يمكن ما بغت تحط بيبي ستر
وياها بنتها شتسوي فيهااا بعد
هههههههههههههه

اي اي
بسسسسسسس ما احب اجزااااااء

لاني ارتبط
:))

lawyer said...

2 u all


اشكرك اخوي على تعليقك الي اروع من اني اثني عليه

اشكرك جدا
و حياك الله
نورت بلوجي


كل الناس علقت من زاويتها
و انا كتبت من واقع الخيال

و من ثم علقت من وجهه نظري

اشكر تحليلك الرائع

عن هوى النفس
و سيطرتها

خلني اقولك شغله
بعد ما قريت القصه

كقارئه
سألت رفيجتي هل تقدرين
تروحين الدار ويا واحد
و بعدين يقولج
سوري وراج ريل ما اقدر اسوي فيج شي

شنو شعورج؟؟

اهي احترت

انا من وجهه نظري
اهانه لانوثتي

الحين احنا ما نتكلم عن الحلال و الحرام
البنت مبيته النيه
تتكشخ
و رايحه
وواصله لي الفراش
منو ردها ؟؟

الريال
خاف عليها

رجولته ما اسمحت

شنو وضع المرا ؟؟

اندقرت

ترا مرا تقعد على فراش ريال بعدين يقولها قومي

هذا مو طرااااق
مو اهانه

هذا كسرررررره


ليش الله حرم هالاشياء؟؟

اهي لو صاينه كرامتها
و زوجها

ما صار فيها الي صار

ترا ربي سبحانه ما يسوي الا الززين

يحرمنا عشان نفسنا

العبره مو الحرمان و بس
العبره
في الحفاظ على كرامه هذي المرا

عرفت ليش انا استمتعت في تحليلك

:))




انتر كويت
يعني اتهقى
انزل روايه
؟؟
و تكون ممنوعه
و تنباع معرض الكتاب و يستجوبووووون وزير العلام
و يقدم استقالته
عشاني
ممممممممممم
مممممممممممممم
مممممممممممممم

لا من جد بسويها
اعجبتني

سأأأأأأأأأأنتقم شر انتقام





الاثير
ههههههههههه

الله يعافيييييج عيني





نجله
حياااااااااااااااتي
انتي عمممممممممممري


ترا لي قعده او ايميل وياج خاص

انتي غيرتي حياتي و انتي ما تدرين

ما اقدر اقووووووول
الا شي واحد


الله يسخر ناس عشان ناس

بدون ما تدرين
الله سخرج و غيرتي حياتي


اعطيج التفاصصيل تالي :))

barrak said...

باريس وماادراك ماباريس

lawyer said...

براك

شفت اشلون انا فاهمه و قلبي حاس

;)

2 u ALL said...

أنتي مبدعه .. !! حتى بالرد
بس فتحتي موضوع أكبر بردك ..!! ودي أرد عليه بأختصار شديد .. ولو أنه يبيله" كتب"ومقالات

خو "الأهواء النفسيه" شرحتها ووضحتها بأختصار في ردي السابق

وحتى "الاختيارات" المتاحه للأنسان و"النفس" عرجت عليها .. ولو بعجاله شويه

بس في هذا الرد راح أشرح "ربي سبحانه مايسوى ألا الزين .. يحرمها علشان يصون كرامتها " وفهمت كل ردك .. بس ودي أقول شئ مهم في هذا الموضوع وهو

النفس "البشريه" هي نفس" حيوانيه غريزيه" كرمها الله عز وجل" بالعقل" فهي فى ظل غياب العقل تعود الى الطبيعه الأولى لها أي "الحيوانيه".. ولذلك تخطئ وتذنب هذه "النفس" أذا ذهب العقل عنها .. مثال بسيط على ذلك ذهاب "العقل" في لحظه الغضب أو الشهوه أو النشوه...ألخ

الله عز وجل .. لم يحرم هذه "النفس " من المتع والشهوات والملذات ... بل على العكس سمح لها بالتمتع فيها كلها- بدون أستثناء- ولكنه قيدها ووضع لها شروط وقواعد ... حتى لا تتخطاها هذه "النفس" ... وذلك لمصلحه هذه "النفس" أولا ًوأخيراً .. ولأنه الأعلم على الأنسان من "نفسه" وعلى مصلحتها .. لأنه خالقها وصانعها .. وقد حدد لها هذه الحدود "الحرام والحلال" حتى يحفظ لهذه "النفس" كرامتها وعدم أمتهانها .. وحتى تستمر الحياة .. وحتى تتحقق مشيئة الله سبحانه وتعالى

فاالأكل حلال .. ولكن الزياده فيه مكروهه لأنها مضره ... وهكذا ... والشهوه مسموحه بالزواج .. ومحرمه بالطرق الاخرى صيانة للمرأه .. وحفظاً للنسل وهكذا

أسف للأطاله .. ولكن هذا ما يؤكد كلامك

BlogLess said...

والله ما ادري شقول

كل هالشباب والبنات اللي فوقي

ما خلو شي

لا اله الا الله

قمة الإبداع
وأكثر من الإبداع

أنا أقترح على فجر السعيد اتسكر مكتبها أو تتنازل عن مكانها لج

لكن ودي أقول شي

و أتمنى ما تزعلين

القصة تضمنت مشاهد واقعية وصور حية
لابد أنج عشتيها
أو هي تجربة شخصية بحته

تحياتي يا تاج راس المدونات

Mitsuki said...

i loved it walla :)

GWannabe said...

athnainhom qaleeeleeen adab o ma3indihom laa deen wala thameeer! yarabby la tableeena eb naas chithy :(

Ali said...

man i really couldnt stop till i finished the whole story ... very well written
and the only thing i can say ...
MEMORIES

lawyer said...

2u all

blogless

mistuki

gawannabi

ali

thanks
ashkorkom mn kil gaaaaaaalby
:)))

مدري حتى اشلون اشكركم

الوفـا طبعي said...

بكل صراحه صار لي مدة أمر على بلوقج
وأستمتع بقراءةقصصج وسوالفج الحلوة
وعجبني طرحج لمواضيعج ودقة التفاصيل اللي تسردينها ..بس هالمرة بوستج عجيب خلاني أبقق عيوني أكثر
وأقول لا لا لا مومعقول مستحيل تخون زوجها اللي تموت فيه
وأطالع وأكمل وأقرا وحقدت عليج لما صعدت معاه غرفته ياااي قلت لأ ..بس خليتينا نعيش خيالج بواقعيهأكثر ونميز
إن كل شي عادي وممكن ويصير إلا
الخــيــــانـــــة

أحييج على خيالج الوااااسع
سلااااام