Friday, January 12, 2007

السالفه يا ان ماكو يهال في هالزمن !! او ما تربيه !! و الا نسينا ان عيالنا امانه؟


في يمعه بنات عائليه
اتيي بنت وحده من صاحباتي تشتكي من امها انها لي الحين ما شيكت على افلام العيد ..
ما فهمت شنو تقصد ..ردت علي الام : انا و ريلي انشوف الافلام اول تالي نعطيهم البنات يشوفونهم ..
و صاحباتي فتحوا موضوع العاب بنات هذا الجيل بصراحه انا اول مرا اسمع عن هالاشياء لان ما عندي خوات
و لا بنات في سن الروضه ..او الابتدائي
العجيب الغريب ان تربيه صديقاتي ماشاء الله عليهم شوي شديده .. مدخلين بناتهم مدارس اجنبيه متحفظه.. على الرغم من انهم خريجات المدارس الامريكيه .. بس جيل السنعات الظاهر خلص ..
الي لاحظته من خلال نقاشهم اني تفاجئت ان اهمال بعض الامهات وصل لدرجه ان ما تدري شنو العاب بنتها..
و لا تدري شنو بنتها تشتري العاب .. و من تطلب البنت لعبه عطتها .. و هذا شي خطير .. على ابو انه بنفتك من حنه البنات
نعطيهم الي اهم يبونه ..
بس في هالزمن الخطر الاقشر الواحد لازم يتابع العاب اعياله ...
يعني انا تفاجئت في مجموعه دمي اسمهم bratz...
شعارهم
the only girls with passion for fashion
و هذي الالعاب عباره عن اربع مدري خمس نات تافهين
حياتهم كلا سيلابرتي و حفلات و وكلا عن الفاشن و الي صدمني

تنط بنت تقولي هذي كلا تحط وايد ميك اب و تقول حطو ميك اب عشان اذا رحتي حفله يشوفج واحد حلو !!
البنات في عمر 6 سنوات و 7 سنوات هذا كلامهم !!
الي عجبني في وحده من صاحباتي ... ان ملزمه بنتها تشتري لعبه اسمها فله لان تبي بنتها تكون فخوره في شي يتعرا صديقاتها منها
و تبي تكون عند بنتها شخصيه مستقله ..
الله يرحم ايام باربي ما عندنا هالسوالف !! يالله انلبس و انفصخ و نتبادل هدوم و بيت و حمام سباحه و كوكش عيالها
و ماكان لها اهداف !!
و لا اغرست فينا اي هدف !!
لكن العاب بنات هالوقت مصيبه !! يغرسون فيهم مبادئ تافهه !!
و ماكو رقابه من الاهل !!
و انا كنت اسولف حق الاخت البندري عن قعدتي مع صاحباتي و ماشاء الله عليهم اشلون يسولفون عن تربيه بناتهم و عن رقابتهم و عن المحافظه على المبادئ الاسلاميه و تعزيزها في نفوس عيالهم ... قالتلي البندري عيل ما شفتي الي هابين فيه هالايام
فيلم او العاب من ديزني اسمهم
high school misical
و الي يشوفونه يهالوو و يغرس في اعيالنا شغلات دخيله

بصراحه انا ارد و اقول ان انا ما عندي خبره في هالامور و لا اعرف في الكارتون و البلاوي
و لا اعرف عن هالشغلات لكن قعدتي مع صاحباتي
استوقفتني لانها ابهرتني !!
و يقولون ليش ماكو يهال ؟؟

27 comments:

bo9ali7 said...

فعلا
حتى العاب البلاي ستيشن بعضها الله لا يراويج..انحلال..ووزراة الاعلام شاطرين يمنعون الكتب..حطو حيلكم على هالسيديات المنحلة

Ali said...

yeah i totally noticed these kind of toys which i personally felt soooo sick of ... people have to watch what there children are interacting with ... very important

————
you gotta check our new podcast episode this week about staring and cutting line in Kuwait at:
www.deerachat.wordpress.com

charisma said...

توى بقول عن البلاى ستيشن
لقيت الاخ بوصالح متكلم عنها

ماكو طفوله لوير انقتلت الطفوله
خلينا من الالعاب

انا ادش صالون القا ياهل مطرس
عمرها 8 سنين تصبغ شعرها واتخصله !!!!!!!!!!

لييييييييييش
هذى اذا 8 سنين متفتحا عيونها على صبغ الشعر والصالونات
اذا اكبرت وصارت تين ايج شبتسوىىى

متى يعيشون طفولتهم بالله ؟؟

واى الله يرحم ايام التعجف وفرق النص
والعناقيص والشرايط الخضر

الى من نرد البيت نفتحهم قمتنا اتعورنا هههههه من الفرق
احح والله ان يعور الفرق من كثر ما امى تسمته لنا
لوووووووووووووول
والله يا حلونا عشنى طفوله
وعطينا كل مرحله حقها
ولا سبقنا سنا
الحمدالله
:))

PearL said...

الله يعينني على بنتي

التربية صج صعبة

وماعندي فكرة عن الموضوع كلش

بس اللي اعرفه ان في البلايستيشن فيه بلاوي
وعيالنا طايحين فيه لعب

Krakatoa said...

اي والله العيال امانه

عيال هالوقت يخرعون

تخيلي موقف صارلي

مره كنت في وكيل كمبيوتر وقاعد انطر جهازي

ولا ابو وعياله اكبر واحد يمكن عمره 10 سنوات

الابو من سؤاله حق البايع شكله طنبور طين بالكمبيوترات مع انه صغير بالسن

المهم منو قضب الاسئلة وشلخ البايع

الولد ابو عشر سنوات

هذا جم جيجا وهذا جم رام وفيه مش عارف ايش واقدر اسويله ابقريد..ويستحمل حق وندوز فيستا..الخ

انا بطلت حلجي..

انا يوم عمري عشر سنوات لاهي بالقاري بالجمعية

وهذا يسأله عن هالسوالف..يالله اخذي

===
بخصوص براتز

عندي صديق عزيز وعنده 3 بنات وهابين هبه بهالبراتز..انا واهو بالنسبة لنا عادي..يعني دولز ماكو مشكله بس انتي نبهتيني على سالفة مهمه فيهم الا وهي الاهتمام بالامور التافهه

خل اقوله

mosan mosan said...

My god the the doll fula is very sad

Diver said...

المشكلة اذا نصحتيهم قالو كل الناس تسوي جذيه
يعني كل الناس بناتهم زبالة نخلي بناتنا معاهم و حشر مع الناس عيد

الله يستر علينا و الله المستعان

Desert Fragrance said...

هذا سبب من الاسباب اللي يخليني يوم اتزوج ما اييب عيال الا يوم بكون متفرغة تماما علشان اجابلهم واربيهم احسن تربية ان شاء الله من الالف للياء

التربية مسؤولية واذا الاهل بييبوون عيال يدرسونهم ويصرفون عليهم وبس وقالوا ربينا..انا هاي ما اسميها تربية

التربية اكثر من جذيه..المجتمع وخاصتن الاهالي بحاجة لوعي علشان الجيل مايتأثر بالغزو الفكري اللي يهاجمنا من كل حدب وصوب

lawyer said...

بوصالح
المشكله ان اشلون ما في رقايه

بيني و بينك انا كلا احسب ان بلاي ستيشن بس دوري ياباني و دوري مدري شنو

كلا مبارات في مبارات



علي
اي والله صاج
مدري اشلون !!!






كارزما
!!
هاااااااي لايت
و يهال
يا حسرتي

اي والله يا كاريزما

انا اقرا تعليقج قمت احك راسي من عوار الفرق

انا امي كانت تسويلي عجفتين صغار من جدام و عجفه كبيره من ورا

يعني 4 فرووق في راسي

شعري كان يحتاج مهندس مدني يخطط الشوارع فيه !!!

albandry said...

شوفي الواحد ماياخذ زمانه وزمان غيره
احنا عشنا طفولة رائعة واكثر من رائعة طفولتي استمرت الى 14سنة ومستمتعة عالاخر وسعيدة
الالعاب مو شرط يديدة كنا نرضى بالقليل والابداع متفتح
ونلعب برووي


ولكن الحين الواحد في تربيته مجاهد
هل راح امنع التلفزيون؟
هل امنعها من ربعها؟
هل امنعها من المدرسة؟
هل امنعها من الذهاب لمحلات الالعاب؟


ولكن الواحد يبذل اقصى جهده في البيت في التوصية والنصيحة والاقوى انن نون مثل اعلى
يعني ما اقول لا تلبسين جذي والام مرتزة لابسة جذي

اواني اغصبها على فلة مو معقول باربي امحجبة وعباة والواقع يقول غير جذي
الوسط حلو
انا شخصيا ما احب براتز بس اذا منعت بناتي عنهم ابتحلى بعينهم ولكن اعطيهم من اقل القليل مع توجيهاتي المركزة
لانها فترة وبتروح
واحاول اني اركز على شخصيات تناسب عمرهم واكثر براءة
يعني احفزها عندهم بطريقة غير مباشرة دامهم يهال ملتفرق وياهم
بنه وقت الشراء اذا حسيت وحدة منهم تبي البراتز اقول حق الثانية اذا شريتي دورا اشترليلج 3 فوقها دورا براتز انا اشتري شي واحد منها
مثلا السبب انها غالية او اي شي ثاني
لا شعوريا الياهل يبي ال4 العاب بدال1
اهوا صج مكلف لكن اخليها اهيا لها القرار
انا لعلمج اطلبلهم شخصيات من الانترنت لانهم بالكويت مو موجودين
الاشياء الموجودة اللي اهيا المنحطة والجييب
وبالنسبة فطووم عن هاي سكول ميوزيكال انهبال مو طبيعي عليهم وبناتي ايحنون من طلع نبي الدي في دي قلتلهم طلبته بالانترت وما وصل اسبوعين يحنون ونسوه الحين بس حاولت اشغلهم ابغيره
لكن الجهاد انك تسيطرين عاللي موجود بالمدرسة شلوون لانه في اهالي امهيته عيالها ايشوفون اللي يبونه ويسولفون حق الباجي هم مابي عيالي يحسون انهم غير او محرومين احنا اذكى منهم وراح نلقالهم طريقة بدون خداع واضح او عدم اهتمام بالتحصيل الحاصل


انا طولت عليكم ولكن ان شالله تستفيدون من كلامي
التربية عبء كبير يا ناس ويبيلها تفكير وتخطيط مو خبط لزق

lawyer said...

بيرل

اي والله و لا انا كان عندي فكره

يارب يعيننا كلنا على تربيه اعيالنا

انا اخوي يقولي انتي ناظره !!

الله يعين عيالج

بس يمكن هذا شي بكون لصالحهم اذا الله رزقنا عيال




كراكاتو

انا حدي انبهرت ماشاء الله من هالياهل!!

متاكد عشرررر سنوات
لا لا لا

ياحسره قلبي

اليهال يتطورون اسرع من التكنلوجيا!!


الله يحفظهم

بيني و بينك انا وايد غشيمه بس ما اسوي نفسي غشيمه و ادش بالخسم
عشان ما اطيح من عين هاليهال

تعال شوفني في فيرجن يوم الخميس ويا عيال خالي !!!!!!!!

يكون فاهمه

اي نبه رفيجك




موسان
شفت هذوووووول ينقال عنهم اطفال!!


والله اححنا اليهال طلعنا الي اهم قلصين علينا



دايفر
سالفه كل الناس تسوي جذي

انا اعاني منها يوميا البيت شايل صراخي والسبه اخوي
عمره 16 سنه يبي يسوق السياره و انا مانعته

يقوووول كل ربعي يسوقووووون

اقوله ربعك عيال ناس
مالي شغل فيهم

انت ولدي انا




ديسرت

اهلا اهلا
نورتي البلوج


فعلا كلامج عين العقب

اي والله التربيه وايد اكثر من جذي

DanDash said...

موضوع مهم الله يرحم أيامنا
عيل شقوللج يا لوير انا مدرسة روضة اوكي تخيلي ياهل عمرها 4 سنين تحط حمرة و بلشر!!!

و يومتون على الجلووس ذاك اليوم متعبثين بجنطتي و مطلعين الجلوس ابلة نبييي @@

الاولاد عندي اهم شي عندهم البيبليد
بس الي يخوفني انهم وايد يقلدون سوبر مان

Cr8ivia said...

الله يستر
الوحده تشتغل
و الا تربي عيالها
و الا تدرسهم
و الا تجابل الريل
و الا تجابل البيت
و الا توجب الاوادم
و الا تشريلهم
و الا بتجابل العابهم !!
الداد الداد حقها

امن انا لا لعب بباربي و لا صور و لا ريل باربي و لا بيوت و غيره اييبون هالاعاب و الهدايا و تتم بقواطيها حتى مافجها :D

بنت الشامية said...

انا ما عندي خبره بتربية البنات بس اشوف خواتي وهم حايسين مع بناتهم ........خبرتي في تربية الاولاد

تعبنا انا ويه ابوهم في تربيتهم وزرعنا عندهم حب الرياضة وساعدتنا طبعا المدرسة وايد شركناهم بكل انواع الرياضة من كرة السلة الي كرة الطائرة الي كرة القدم اصلا ما يفكرون وين بيروحون وإلا وين ايون

بس في اخر الاسبوع يشوفون التلفزيون او نروح وياهم الشالية وهناك ابوهم مرتب المباريات ويه عيال ربعه ويصير الدوري

طبعا يلعبون بلايستيشن ويشوفون التلفزيون بس مو حالة ادمان

صدقوني الرياضة احفظت عيالي وايد

Hopeless Poet said...

I remember my grandmother allah yer7amha making some cotton dolls for the girls in the family and they were all happy :D
And we grew up playing Atari and there was nothing bad about it except some violence that didn't hurt anyone back then!
Now they have all those toys and games that we don't understand not to mention the cartoons they watch on space toon.. I don't wanna have kids :(

Mamloo7a Q8ia said...

واله يا لوير اليهال يعرفون اشياء اكثر منا وانا دايما اقول هالجيل محروم من براءة الطفوله
ولاهم مستمتعين بطفولتهم مثل ما تمتعنا احنا فيها

فركاش said...

مو بس الألعاب تغيرت..الناس تغيروا التربية تغيرت الحين ماحد له خلق يجابل عياله مثل أول

الله أيام خماسي و جريندايزر لا و لابغينا نغير كابتن حميدو..

lawyer said...

قبل لا ارد عليكم


تذكرون قبل الانظباط الي في بيوتنا على التلفزيون

تذكرون اشكثر اهلنا طقونا طق

!!

ياويلنا نفكر نجابل باباي العصر الا مخلصين واجباتنا و مسوين الجدول بعد


الله يرحم ايام زمان

lawyer said...

البندري


كلامج وايد وايد ممتع

استفدت انا منه صراحه وايد

لاني كنت غافله عن تريك في تربيه البنات
وبعدين اكيد انتي ابخص لاني المثل يقول اسأل مجرب


اكيد الكل بتوقف وايد عند تعليقج

مشكوره :))



دندش
هههههههههههههه

صج صج صج الله يعينج
رووووووووووووووووووضه
يحطون جلوس
!!!!
لاااااااا جان اموت





كراتيفيا
والله تعلقج يبرد الحره

اي والله صاجه

الكويتيه سوووبر ماذر

lawyer said...

بنت الشاميه

الله يرزقج البنت انشاء الله

فعلا الرياضه تحميهم وايد

خصوصا اذا تولعوا في الكره و اليد

انا اخواني الحمدلله كلهم متولعين في كره القدم حتى الحين سفرهم

يا بيروحون يحضرون مباراه و الا بيروحون نادي معين


الله يحفظ عيالج و عيالنا و ذرار المسلمين يارب


hopeless poet


Long Time:))
حياك الله و نورت

واااااي الله ذكرتني في العرايس الي كلا نسويهم

نحط عصايتين
و نلبسها نفنوف
تالي نحشيها قطن
و خيوط صوف نسوي عجفه

كانت هواااايتي اسوي حق بنات خالي العرايس

والله ما ضرنا مستمتعين





مملوحه
اهلا اهلا نورتي
اييييي والله انج صاجه سسسسسسكتي يصدعوون الراس
ماتلحقين وياهم




فركاش
تعليقك هذا اهوو الي خلاني اتذكر واجبات الظهر
و اشلوون نرد نسوي الواجبات عشان العصر نجابل التلفزيون

و مو على كفينا

Яeema said...

high school misical


habba feeh

لوعت جبدي فيه

بس المشكله المدرسه كلها جذي!!؛


المصيبه إن ديزني أرده أفلام و مسلسلات

حتي شفت لقطة من فلم ش-رييك

الجزء الثاني

و تطلع لقطة و بسينما الكويت إن بنوكيو لابيس سوووري يعني بانتي أحمر

و مو أي بانتي

ما أقدر أقوله

هذا من تشجيع و تقبل الجنس الثالث؟؟؟







البلاي ستيشن

ممنوعه منعا باتا عندي

حق تسبل لعيون
و من يسكر اللعبه كل طاقته الكامنه تنقلب شطانه

3ateeja said...

الله يستر علينا وعلى عييلنا ...الله يذكر الجنود الزيتيين ...والحيله والصبه ...

Kwaitiyya said...

وانا أقرا البوست وتعليقاتكم إنصدمت !!

أحس إني عيوزه على هالسوالف
أنا وقفت الألعاب من سونيك
وبعدها مادري شصار
ونص الألعاب اللي تتكلمون عنها ماعرفها

الله يعيينا ياربي
صج التربية صعبه

shakshaka said...

allaaah yer7am ayam el 80's ashtereee el doleya 3ugob sa3tain mat3arfoon shakelhaaa msawyatlaha new loook gaa9a sha3arha wasashwera loool makint a7eb el barbies zood wo 3ugob tewala3t bel lego

Q8LoVeR said...

انا ماعشت طفولتي كنت رايح الجهاد فمالحقت على هالطفوله
;p

نون النساء said...

فطووووم

جنج تدرين

فعلاً يهال اليوم مو يهال
يعرفون اشياء ويتكلمون فيها
وتنصدمين من طريقة كلامهم واهم واثقين

ومقارنة فينا يوم كنا بأعمارهم
ما انعرف غير الحيلة
وحيّ الميت..

(Talking about me )
:P

مثال:

بنت أحدى الصديقات
عمرها خمس سنوات

تسألني انتي متى تتزوجين؟؟
ماصارت ؟؟

بطلت اعيووني @@ جدامها
يه
انتييييي شكوووووووو

ههههههههههههههههههههههههه

Miss Writer said...

صاجه... الله يرحم باربي والحمام السباحة مالها والباص الأصفر وخماتشييرها

والله لها وحشة.. كانت مجرد لعبة ما غرست فينا أي أفكار صاجه