مرات تكون اجمل النهايات ...فراق

- يقول تعالى ((وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ)) البقرة 216

وعن أبي بن كعب رضي الله عنه قال: ما من عبد ترك شيئاً لله إلا أبدله الله به ما هو خير منه من حيث لا يحتسب

مرات تكون اجمل النهايات

الفراق

شكرا لكم

الحياة الاخرى او الشخصيه المزدوجه

ما بني على باطل فهو باطل..
استوقفني عدد المشاركين في لعبه سكند لايف ..
هي لعبه في الانترنت ..يختار الانسان الحياه الي يبي يعيشها و الشخصيه الي يبيها..
و يتعايش وياها

اانا انصدمت اشلون اكو ناس تقدر تلعب هذي اللعبه مو عشان شي بس عشان اشلون يكون لهم دبل لايف..
فاكتشفت ان عدد الي يلعبون السكند لايف في الصج اكبر من المشاركين..

جم واحد يدش المسنجر باسم مستعار ؟ بشخصيه مستعاره و يعيش داخلها و بعدين يوصل لحد ما يقدر يخرج من هذي الشخصيه و يصير التصادم!!
جم رجل مل الحياه الزوجيه؟ ولا يريد طلاق زوجته ولكن اراد فقط التجديد ..فدخل عالم المدونات بشخصيه الرجل العزوبي
الرجل الي يبحث عن الحب ولا يريد التقيد ..ويبدأ التعارف و اللعب في مشاعره اهو اولا و من ثم مشاعر البنت..ناسي حديث الرسول عليه الصلاه و السلام
"عفوا تعف نسائكم "

كم بنت ملت من روتين الحياه الزوجيه فاختارت لها شخصيه في الفيس بوك البنت الدلوعه الهوائيه ولعبت في مشاعر الرجال؟
كم بنت تلخبطت عندها الهرمونات في فتره النفاس و دخلت في مود الاموشن و العواطف و دخلت قصه حب مفعمه بالوله و العشق و الهيام ..ناسيه بذلك النعمه الي اودعها الله بين ايدها وهو الطفل الجديد ..وناسيه الرجل الي يبات في فراشها ..ينطر انتهاء فتره النفاس..حتى تعود زوجته و نعمه.. خانت نفسها اولا ..و ربها في طفلتها ...وخانت زوجهاا.. ودخلت تبحث عن اللعب والعذر فقط انها تعاني من فتره لخبطه هرمونات!!

كم انسان فاشل دراسيا دخل عالم المدونات بشخصيه الدكتور الناجح و عاش حياه السيرج و يعطي النصايح و يساعد الناس..لانه اختار ان تكون له حياه اخرى ..بعيده عن تلك الحقيقه..

كم بنت في عالم المدونات شاذه جنسيا و تمنعها العادات و التقاليد من البوح بشذوذهاا.. فاختارت شخصيه الرجل الفحل في عالم التدوين ودخلت بيننا هنا على اساس انها رجل و الكل يتعامل معها على انها رجل؟؟

كم رجل شاذ ((جاي)) ماقدر يعبر عن البنت المسجونه في جسده فاختار ان يكون له سكند لايف في الانترنت يظهر فيها دور البنت الي تتغنج و تتدلع.. و لكن محافظه جدا ماتقدر تقابله ..ولا تبي تقابله..

كم شخص منكم دخل علاقه في الانترنت او تعرف على انسان بالانترنت و حس انه غريب و يخفي وراه سر؟؟

هل فكر احد فيكم واهو يختار ان يكون عنده سكند لايف ان يلجأ الى معالج نفسي يشرح له الي فيه ويطلب الاستشاره؟؟

غريبه هي الحياه لما تكشف لنا ناس يعيشون بحياه اخرى وتصدمنا الدنيا بعدها بان معظم البشر الي حوالينا يعانون اما من انفصام في الشخصيه
او سايكوباثي...

عالجوا انفسكم ,,وتقبلوا الواقع
لان حبل الجذب قصير..

ضاعت الحسبه

ما بني على باطل فهو باطل

*

*

*

*

*

*

*

*

صح؟؟

ودعوتك بشجن

سمعت اذان الفجر الاول..ينادي ..

اتقلب في سريري
شي ما يجرني نحو السرير و يشدني تحت الوساده
ودعوه حائره من نفس ضاقت ذرعا من الذنوب تدعوني لصلاه ركعتين قبل الفجر ..

اتذكر همي و اتقلب و احاول ان اعود الى النوم ..
هي دائما هكذا نفسي .. تتحرش بي وتختبرني ..تذكرني بالصواب و يجرني الشيطان نحو الخطايا..
نفضت عني الشياطين التي باتت بسريري ..

وقمت

صوت المطر
خشوع الشجر
وانين قلبي ..

افتح الشتر و الشباك.. وادعوا الهواء لمشاركتي صلاتي..
افكر في هذه الاوقات و في يوم عرفه ..الا يجب ان اتجهز لربي ؟
الا يجب ان اعمل لاستقبال ملائكه الرحمن ..
هل لهم قبل ان يمرو على حجاج بيت الله في هذه الساعات ان يمروا من امام شباكي ليلتقطوا دعائي الخالص ..

رتبت غرفتي فعندي ضيوف..
وبخرتها !

هل جننت لا اعلم !
ومن المؤكد اني مجنونه !
هل هناك انسانه تبخر غرفتها الساعه الخامسه فجرا !
تنتظر نزول الله و ملائكته في هذا اليوم..

ربي اتعلم اني احبك ؟
كل يوم اقول لك اني احبك..
قل لي لما انا بعيده عنك هذه الايام؟ هل طردتني ذنوبي..
ذو الجلال و الاكرام.. يا رب اني انتظر رحمتك الي وسعت كل شي ..
واني ادعوك جهرا و علانيه و اني اخاف عقابك
ولكني ارجوا رحمتك اكثر..
يارب اني اسمع خيرك النازل وغيثك الممطر ..لاغسل نفسي به ..

افتح غرفتي واخرج ابحث عن المفاتيح و اتذمر على والدتي التي قفلت كل الابواب
واخرج .. لعلي اذا خرجت كنت قريبه و تحت المطر يصل دعائي
او اغتسل ..لا اعلم
كل ما اعرفه الان ان في هذا اليوم لا اريد ان تفوتني فرصه
توبه
وانابه
وعوده
لك يااااااا الله ...

المطر يختلط بدموعي و اشهج له بالبكاء
وان لم ابكي عندك.. فمن ابكي عنده ؟؟
وادعوك
يا سميع
يا مجيب
يا قريب
ياقابل التوب ..
يا غافر الذمب
يا غفار
اتعلق بباب رحمتك و جودك
فلا تحرمني
ولا تقطعني
و اصلني بك
فاني استعزيت بك
وتوصلت بك
و سألتك انت
يارب ارحم ضعفي
وقني شر نفسي
ولا تكلني الى نفسي طرفه عين
فاهلك
فاهلك يارب..

المطر يزداد هطولا
و استبشر بغيث الله ..
احبك يالله احبك
اتعلم اني احبك يا الله ..

واني اعلم انك دوما تغثني و ترحمني ليس لخير اعمله و لكن فقط لعشقي لك..
فانا اخافك دون الخلق ..وهذه الوحدانيه يارب فاني لم اشرك بك شيئا ..
سجودي
وصلاتي
وعبادتي
و تقربي
اليوم لك
كله لك
يارب كل الازمان
وياربي
اسألك بنورك الذي ملئ اركان عرشك ان تغثني
يا غياث المستغثين يارب العالمين
اغثنا يا رب اغثنا ..
ويزداد المطر و اتذكر انه حتى يستجيب ربي دعائي علي بالدعاء للضغفاء مثلي
فادعوا و ابتهل
و استغثته بانين الخاشعين

يا غياث المستغيثين يا آمان الخائفين
يا جابر المنكسرين يا واصل المنقطعين
يا مجيب المضطرين يا سامعا لكل شكوى
يا كاشفا لكل بلوى يا من ينزل الى سماءه الدنيا ليغفر لعباده
ليجيب دعائهم ليسمع مسألتهم
اسألك بكل خير سأله نبيك محمد صل الله عليه وسلم ..

واتذكره
اتذكره
نعم حبيب الله ..كيف لي ان اسجد لربي وانسااه و هو من علمني كيف ادعوا الله
وابحث عن دعاء له في قلبي حفظته دوما عن ظهر قلب ..
يوم كان ضعيفا..
وانا باضعف حالتي الان ..لا اريد االا ان اعتزم امري بربي ..متبعه نهج رسولي..

اللهم إني أشكو إليك ضعف قوتي ، وقلة حيلتي ، وهواني على الناس أنت رب المستضعفين وأنت ربي ، إلى من تكلني ؟ إلى بعيد يتجهمني ، أو إلى عدو ملكته أمري ؟ إن لم يكن بك غضب علي فلا أبالي ، غير أن عافيتك هي أوسع لي . أعوذ بنور وجهك الذي أشرقت له الظلمات وصلح عليه أمر الدنيا والآخرة أن يحل علي غضبك ، أو ينزل بي سخطك . لك العتبى حتى ترضى . ولا حول ولا قوة إلا بك

و اخذ نفسا عميقا
استنشق الهواء.. ممنيه نفسي بانه يوم خير..ارجوا من ربي مغفره
ورحمه
و اغاثه ..

و استجابه لدعائي

و استجابه لقلبي الذي تكسر و ثقل بالهموم

و ادعوه في كل لحظه ان يغسل قلبي ..من خطايا عبيده به

واردد سرا و جهرا
اللهم انك عفوا كريم تحب العفو فاعفوا عنا
اللهم اتنا في الدنيا حسنه و في الاخره حسنه و قنا عذاب النار

.....
اعود الى غرفتي..
كل شي بها بارد
نتيجه الشبابيك المفتوحه الا قلبي المنفطر..
واتذكر ان مواسم الاعياد لا تأتي الا بعد مواسم العبادات ..
فاني ان كنت قصرت فاتمنى اني عملت شي قليل ..يبشرني بعيد من الله
ولكن عيد لقلبي..
وملامح وجهي التي تغيرت من الحزن

واردد اللهم اني استغفرك و اتوب اليك..
اللهم مازويت عني شي مما أحب فاجعله فراغاً لي فيما تحب

تقبل الله طاعتكم و كل عام و انتم بخير

مرني مرة فرح

لقراءة البوست يرجى سماع الاغنيه

في عالم الاحياء ام الاموات هي .. لاتعلم .. كل ماتعرفه انها كانت تغط في نوم عميق
تتوسد الاحلام .. تفرش من الهموم سرير لها .. تدثرت بالغصات
و نامت اخيرا بعد ان احتست كأس دموعها ..




واذ بها يده


..احسته
لمس اطراف اناملها



ايقظها ..


"قومي حبيبتي ابيج "



هي لم تسمع همسه






...
نائمه ..




فتحت عيناها



.. تأملته




اخذت تسترجع ذاكرتها

اين هي
اين هو
هي اين؟


يبتسم
نزل لها على هيئه رجل...." كالـــملااك" مبتسم



وضعها على كتفه
رفعها

ثبتها


عانقت رقبته ....


تدثرت جسده حتى لا يذهب


و تسأله وهي على كتفه

"تطير لدنـياه "

وين بتوديني؟


امشاي معاي فوق ...

هي : وين فوق؟؟


تعلقت به و هي تعتصره بكاءا


"فلان .. انت عايش؟؟"


فلان انت حي ؟


فلان انا مليت الانتظار ...


تدري من يوم رحت و الدنيا مالها طعم


مالها لون




فلان .. الدنيا بعدك خانتني
بالحيل تعبتني..



تذكر يوم قلت لي .. لي غبت بترتاحين



اشلون اهون عليك خليتني بروحي



تشتكي له حالها
و قلبها يعتصر الالم
الحزن
و كل عضلات وجنتيها ترتجف بكاءا




تختنق
تنكسر




ويرفعها ...


فلان ؟ وين وصلنا؟


هذي السماا السابعه الي يقولون عنها؟؟

هو : لأ هذي الغيوم ....




لمته حيل بكل "ألم الاشتياق " الي نام معاها ...كل ليله بدونه ..
وهي تردد ببكاء .. وتهمس له .. سألت الغيوم باي الدروب القاك يوم؟


اخذها..

اجلسها على غيمه
بارده


هي : أح فلان اهني موت برد اشلون عايش؟


هو : انا مو اهني عايش ..انا مكاني بعيد .. بس التقيتج اهني!

هي : باستغراب .. التقينا هني ؟ اشلون ؟؟


هو : انتي بحياتي مثل الغيمه ..استغثت الرحمن ..


و اغاثني فيج ..




جلست بحظن الغيوم
وبحظنه


شكت له ايامها ..
حزنها
دموعها
ألمها ...
الفراق .. والدنيا





هي : فلان تحبني؟؟
تذكرني و انت بعيد هناك؟
اطري عليك ؟ اتشوفني ؟
والا الي عندك خلوك تنساني؟



هو: انا لو انسى عمري ما انساج ..


هي : تشوفني وانت فوق ؟ تسمعني اذا بكيتك ؟ اتحسني ؟
اتشوف حياتي بدونك؟

هو : احس في كل شي في كل شي .. بكل لحظه احس فيج ..

بس مو بيدي .. ناطر اتيني هناك.... قلت لج تعالي .. قلتاي ..ما اقدر ...امي و ابوي ما اقدر اخليهم ....





غيوم
و دنيا لا احد سواهم بها...
تقفل السماء ابوابها ليلا عليهم
دنيا من الاحلام ....لهم هم فقط ...يلتقون في سماء الدنيا
او اي سماء اخرى ..فهم لا يكترثون ...
همهم هو اللقيا



هي : اهني راحه .. عالمك راحه .. مافيه الا انا وانت ..عالمك مافيه الا "الحب"
هو : وانتي ...


هي : مرني مره فرح ...غير حياتي ... اخذني بعيد في كل مره اتحس ان الدنيا قفلت بابها في ويهي .....الدنيا يا فلان كارهتني ...مع اني ما سويت لها شي ابد...ولا شي بالدنيا ابيه راضيه تعطيني اياه...تخيل اني اشحت الفرح منها


..ولا ترضى تعطيني اياه





فلان ...



احبك...



و خايفه..







هو: ابشرج بس اول الايام تعب..بعدين تتعودين .. وترتاحين..






اشرايج اخذج لمكان فوق بالسما.. اوريج دنيا ماشفتيها ..وماراح تشوفينها الا معاي....مكان ماراح تعرفين الي فيه بس راح اعرفج عليهم...




وياخذها ..
الى دنياه
يرفعها بالسما
بين الغيوم
بين النجوم
تمسك لها نجمه


و تقوله



انت الشمس و كل شي يدور حوالينك...


يبوسها ويقولها القمر يدور حوالين الشمس ...



انا الشمس وانتي القمر..



هو يطير و هي تعلقت بكتفه حتى يرتفع بها ..

حبيتها منك .."اني قمر"


هو : آآآآآآآآآه قوليلي بس وين اروح من كلامج



انا




ما




اقدر





عليج





هي : وانا ما اقدر على قلبي الي يبيك..





هو: ترا خلاص الحين لازم تردين..

هي : اروح ؟ اهون عليك تخليني ؟


وتوديني بايدك ..قلت لك الدنيا متعبتني..

وخانتني ..

لا ترجعني ...

خلني معاك ..حتى لو كنا ..امواااا(ت)


تدري يوم بغت اتصالحني اشسوتلي.؟؟


اقول ؟
والا انت تدري؟

صح؟
فليش اقول





و رفعها على كتفه مره اخرى ووعدها بياخذها السما السابعه...

ولكن

نزل

فيها..

وحست هي بالهبوط

وقالت له






ادري
قاعد تردني تحت..

ادري خايف علي ...


وينزلها لفراشها ..
ينومها...بسريرها




و يروح ...

يأكدلها ..
لا تخافين ..بتم معاج
وبحبج ...


تتحسسه بفراشها
تدور ايده


تدوره


ماتلقاه
ماتدري اللي صار صج او حلم؟؟
بس تدري ..انه خذاها له
وخذاها ل(بــــــــعـــــــــــــــــــــــــــيد) حيل

يسعد صباحك ...ياحبيبي

يسعد صباحك .. يا حبيبي

حالي طيب

كل شي مثل اللي كان

المدامع .. والمواجع ..

والأمان اللي اختفى لحظة غيابك

والليالي اللي مضت

.. مثل الليالي اللي مضت

الهم عازف ..

والدمع نازف ..

والعمر في غيبتك حاير وخايف

حتى جراحك وسط قلبي مثل ماهي

وفي شفاهي باقيٍ نفس الكلام اللي بقى ..

آخر لقا

مثل منتَ يا حبيب الروح شايف

كل شي مثل اللي كان

وحالي طيب

يسعد صباحك .. يا حبيبي

هذا انت كل ما ضاقتبي الدنيا تغيب ...

وكل ما ضاقتبك الدنيا تجيني

هذا انت

ان كساك الهم صرت أوفى حبيب

وان نساك الهم تتباهى بـ أنيني

مثل منت .. دايم تجي فـ وقتك حبيبي

بعد ما وقتك يروح

يا آخر دموعي وشجوني

.. وأول إحساسي جروح

ما بقالي من عذابي يا حبيبي .. الا انت

وهذا انت يا حبيب الروح شايف ..

كل شي مثل اللي كان

وحالي طيب يسعد صباحك ..

يا حبيبي هذا ضي الصبح ..

او هو بعض نورك ؟!

هذا همس الورد ..

او دافي شعورك ؟!

منهو مثلك في غرورك ؟!

جيت متأكد بسامح .. راسم الطيبة ملامح

ماهو بدري !!

.. انت تدري ما قتلني غيابك اكثر من حضورك

ايه كان العمر داكن ..

ايه كان الهم ساكن ..وقتي بعدك

بس أنا يا ضيّ عمري ..

كنت عودت الأماكن تألف بعادك وصدك

ياللي ما يرضين ضعفك ..

ما ادري انثر فوق كتفك أغلى دمعي .. او أردك

يـــــــــــســــــعـــد صبـــــــــاحـك

واي بموت من الفشله !!

واي واي واي بموت من الفشله

تخيلااو مابحياتي كلها في حياتي الوظيفيه تهزأت

مثل التهزأ الي صارلي اليوم
بسسسسسسس قلعتي استاهل

اول مره بحياتي ريال يكلمني وانا منقص ويهي و ما اقدر ارفع حتى راسي
و من داخلي احس اكو نعال قاعده تطقني تقولي قلعتج قلعتج !!

ياني السكرتير ناداني قالي المدير يبيج
كالعاده احم احم رتبت عمري .. عدلت شكلي .. وبقلبي اقول ياحسرتي
جك جك جك جك جك -صوت الكعب الفتاك -

طقيت الباب
سطرت و قعدت و شاقه الابتسامه !!
المدير قال حق السكرتير سكر الباب !!

بغيييييييييييييييت اصيح
بغييييييييت اقوله اقول اقول والله اقول
والله اتووووووووووووب بس لا اطقني !

تخيلاو الموقف
المدير منفجر من الاعصاب وانا قباله بابتسامه شقاقيه
فاشلون اهو راح يبدا الموضوع !!
الزبده سفل في امن يابتني ساعتين على استخدام النت
ومطلع برنت في الدقايق و المواقع و متى و الساعه جم و اشلون و ما الووووووون

الله يااااااااااااااااااااا انا افتششششششششششلت
الله يا انا انقص ويهي

اول مره بحياتي كلها ايني شعور ان الريال الي جدامي بيفصخ العقال يكوفني !!
سممممممممممممممممعت كلام يفشل يفشل
و يقولي 3000 دقيقه بالشهر انترنت ! من صجج انتي !! شتسوين !
وشالمواقع !!
عايز عليج انترنت حطيلج ايجو ب 15 دينار اخذيه وياج وين ما تروحين !!
تخيلااااااااااااو يقولي حطاي ايجو

بغيت اقوله والله عندي ايجو ووطنيه و واي فاي في البيت و بي بي و اي فون !

بس مالي ويه اتحجاا !!
والمشكله انا وايد جد و سيريس في الشغل و عمره محد قالي شي

فمابالكم لما مدير و مو يقول و بس لألأ يفششششششششل
طبعا ما قدرت اقول حق المدير اني مسبله اليوزر نيم مالي و 4 اجهزه تستخدم يوزري غيري انا ..

يعني الكل يستخدم ماي يوزر .. على ابونا عادي و ابي في قسمي ان البنات و الشباب يتسلون فيه وقت الفراغ مافيها شي

!
بس ما هقيييييييييييييييت ان راح انجك او اذا انجكيت اصلا راح اسأل عن هالشي !
الله يا الفششششششششششله

اول مره بحياتي احس اني ابي احط روحي على الانفزبل !واختفي

المهم انا طول ما اهو يكلمني وانا ما اقدر ارفع عيني
طول الوقت
ان شاء الله
صح كلامك
اي فعلا
لا ما يصير
انا الغلطانه
معاك حق

وخزياه وخزياه من الريال شقول عني ميته على النت في الدوام
مشفوحه !!
مايدري ان مو بس انا الي استخدمه
المهم وعدته ان هالشي ما يتكرر و استأذنت

وان اذا سحب تقرير عن استخدام النت الشهر الياي ما راح يشوف شي من الي شافه

وذلفت مكتبي و انا مييييييييييييييييييييييييييييييييييييييييته فشله فيني بجوه
الطامه الكبرى ان 2 من الي يستخدمون اسمي.... شباب فهذولا اصلا انا مدري شنو يفتحون !! بس اهما جدامي ما يشوفون الا ايميلز و يوتيوب و منتدى انساب و قبائل و جذي بس
وباجي البنات انا اعرفهم و اظمنهم بس البلوه ان اهو منصعق في الدقايق !!
عباله كلهم انا
و لو شنو مستحيل اقوله والله انا مسؤله اؤؤمن في التطور و الاداره الحديثه و بلا بلا بلا
بلعت لساني و انطمييييييييييييييت و اعتذرت و طلعت !!!

اول مره احس في احساس امي لما تقولي ابوج معصب و يقول بنتج و بنتج وانا مفتشله ما عرفت شرد عليه !!

انا حسييييييييييت جذي !

لحظه اسجل التاريخ اليوم
انه في يوم 18-11-2009 تهزأت وقلعتي !
ومفتشله من هالمدير الي عباله منقوزه ساكنه في النت و 24 ساعه مخليه الشغل و مجابله الفيس بوك !

مالي ويهه اطالعه مدري شنو المواقع الي اهو شايفها ! وخزياه

وعلى هم الهوى نكبر

وعـــدتيـــــــــــــــــــني

انا و انت و العود ...

و همسك باذني ..

تغني ..

وعدتيــني

إذا دار الزمن فينا

وإذا درب الهوى تعثر

وعدتينـــــــي

إذا أمست أمانينا بعيده

والبخت قصر

تشيليــــــــــني

على جناح الأمل ذكرى

وعلى هم الهوى نكبر

تذكر شنو رديت عليك وقتها؟

قلت لك اذا ما وعدتك انا

من يـــوعـــدك ...

جريده السياسه !!! ويعه تويعكم !!

قــــــــــــــــله ادب جريده السياسه امس شي مو صج !!



حمدلله و الشكر



مدري غلط الجريده والا غلط المحرر فهاد !!



اولا شكو خبر مثل هذا و اهو خبر زواج مثلي الجنس ينحط في البنط العريض و خبر الصفحه الاولى !!






ثـــــــــــــــــــــــــــــاني شي و اهو الصدمه شكو تنحط هالصوره !!!



صوره عرس بنت كويتيه عاديه طبيعيه مع زوجهاا !!



اشماله يركبون خبر على صوره غلط !!





هذا الغبـاااااااء و الفضيحه الي صارت لصالح منو







جريده السياسه مو بس لازم تحاسب

ولكن يجب اتخاذ الاجراءات القانونيه على مثل هذي الفعله !!!!





انااااا مصدومه !!!



لينك الخبر

للصالح العام

موضوع السلطات في البلد موضوع عجيب غريب
فجأه الشعب الكويتي يثور على الحكومه وكأنه نوابنا ملائكه و شعبنا شريف!
و المجلس بكبره مافيه سنعين الا ينعدون على الاصابع

انا ما استغرب من الناس الي بسرعه تنسى لان الناس عاطفين جدا

بس استغرب من النواب الي كل يوم صارخين على شماعه ناصر المحمد واهم اول الناس الي راحوا باركوله و اعادوا الثقه فيه وحبو خشمه !

واليوم اهم الناس الي مسويلنا مشكله

انا لست ضد او مع ناصر المحمد او حكومته ..

انا مع المنطق الي يقول ان اذا في مشكله و مشكله بلد ماتنحل بهذي الصوره
انا ضد تماما ان بلد تدار بحملات شبابيه عاطفيه و يطالبون بتغيير سياسه بلد في هذي الصوره
انا كمواطنه كويتيه بسيطه ما ارضى ولا اقبل ان يتكودون علي طائفه
اسلاميه او قبليه او ايا كانت و تظهر عدم احترامها لرمز من رموز بلدي و بعفسون الكويت عشان والله الحكومه مو ناجحه

طيب انتو يا نواب اشسويتااو غير التأزيم و التعطيل ؟

نائب يصرخ على حجاب

والثاني على شيك

والثالث على العادات

وكلهم في النهايه اردى من بعض

ليش انتو مصدقين ان نوابنا شرفاء جدا لدرجه انهم يكشفون الحق ؟؟
لأ طبعا نوابنا ممثلين في مسرحيه مخرجينها شيوخ
لما المسلم يرفع كرت الشيكات فجأه
مدري اهو اصلا جم اندفعله عشان يثير بلبله بلد كامله
ليش تصدقون ان الناس وايد شريفه
احنا صج ديره كلها حراميه
بس مو معناته ان فجأه الشعب يستشرف
وتنقط الكره بلمعب الحكومه

في صح وفي الاصح
وفي شي اسمه الاصلح
هل من مصلحه شعب الكويت ان يصير فيه الي قاعد يصير؟
لما تطالبون في الديمقراطيه ليش ماتكملونها؟؟

بصراحه كلش مالنا خلق لويه
الديره معفوسه و الناس ثايره
والحكومه لازم تتخذ موقف
والشعب بيرد يختار ناس سيئين

ولازم تعترفون ان تقسيمه الكويت الحين لايمكن يطلع منها ناس سنعه بالمجلس
من فجيت الجرايد اليوم و شفت المسلم يلعلع قلت ولييييييييين اكيد فهد العكسر مسافر
وهذي حالتنا بيرجع عقب جم يوووووم ويسفل تسفل انه توه مسافر و المسلم رده من السفر

حسبوها صح قبل لا تركضون ورا مشاعركم
منو الاهم
الكويت ؟
والا نواب مجلس الخمه؟

انا اقول الكويت ولا يقصون عليكم المضللين

في حضره ال Oud Wood

تدخل بترقب
لا تسمع الا صوت البيانو
واناس يتحادثون
هنا اجتماع
وهناك عشاء عمل
و هذا يحضر اطباقه
و اصوات اقدام تذهب و اخرى تصل
هو يطلبها الجلوس

تجلس
تناظر الساعه
ترتبك
تقف
تبحث عن دوره المياه
تتبع الاشارات
تنظر لنفسها بالمرآه
ابهرها شكلها
بسيطه جدا
فتسان اسود
بحزام يتوسطه زهره حمراء
معطف اسود
تكسر عتمه الاسود باحمر شفاه يملئ شفتيها
رتبت شعرها
عطرها توم فورد (اود وود)و قليل من دهن العود
تصلح اخر خصله
تحررها
وتعود ماشيه
واثقه الخطى

تجده اختار طاوله اخرى غير تلك التي اختارتها
تصافحه
يقبل يدها
تضمه
وتهمس له
اشتقت اليك
يرد عليها : انت حقا لا تعرفين معنى الاشتياق
يتغامزان
يأخذ معطفها
ويجلسان
?عشاء صفاء
ام عشاء عتاب؟
ام هو وحده الاشتياق الذي يقودهم الى قارعه الطريق
و يبدأون من حيث انتهوا
وكأنه بالامس كان معها
تحب هي هدوئه
وصمته
ويجب هو حيويتها

هي تعرف مواطن الضعف و القوة
و هو يعرف انها تعرف الكثير
ولكن ما يحبه هو دائما دور الرجل
هو رجل شرقي لايرضي بان يشاركه العشاء طيف رجل اخر
او حتى اختلاسها للنظر
وهي تتعمد استفزاز رجولته

عشاء
حنين
قلوب عطشى
عيون
همس
ايادي تشابكت طوال الليل
وتنظره

هو: ماذا تنظرين
هي:لاشي
هو:لا احب ان ينظر الى شخص بهذا التركيز
هي: اتركني فانا اريد الارتواء من عينك لاني اعلم انك ستذهب ولن اراك الا بعد اكثر من سنه او اكثر

صوت البيانو يشاركهم
تطلب اغنيه لنورا جونس
يبتسم هو
لانه يعلم تماما ماذا تعني هذه الاغنيه
ينتهي العشاء
تستأذنه
يسألها توصيلها
هي:بشرط ان نمشي..

ياخذ بيدها
يتمشى الليل معها
هي وهو
برد
غيوم
زخات مطر
وبعض اوراق الشجر تعاكس الطريق
و تعلن وصول فصل الخريف

هو: لماذا احن دائما لك؟
هي: اسأل قلبك
فلا يعلم مافي قلب الرجل الا الرجل نفسه

بديت اصير مينونه الا ربع

يقولون بره مطر و الجو حلو صح؟؟

قولوا لأ عشان ما تحروني

سؤال وجيه ابي الكل يجابوني عليه ؟

شنو علاقه الحب المستميت مابين المرض والليل؟؟

و شنو علاااقه العشق مابين المرض و النوم

اذا المرض سمع ان الواحد بنام و بيرتاح فجأه يتسلط عليه!!

بسسسسسس على ميييييييييييين يا بابا .... دااا انا بطه و الاجر على الله

قبل امس ماقدرت انام من صدري و من شده الكحه فمن انسدح

اختنق و اقوم ..

وظليت سهرانه للصبح ...

اما امسسسسس لألأ تحايلت على النوم

ترست الكوشيااااااااات على ظهري و نمت و انا قاعده

شعوووووووووري وانا نايمه 10 ساعات و انا قاعده شعوووووووور مواطنه كويتيه راكبه رحله كويت نيويووووورك

صح صح ؟؟

اي اي قولو اي شجعوني !!

يالله ما بقى شي هانت باجر اتخلص العده

و من اقوم الصبح بفج ويهي على البحر ....

خلوني اقولكم اليوم شنو سويت ...

مليت من الفراش

و الدار

جان اقولهم ترا عندي هدوووووووووم وايد وايد ووصخين فلازم اروح دار الغسيل اغسل هدومي

تعقمت دار الغسيل عشان انا بدشها .. و قعدت بروحي غسسسسلت هدومي

طبعا انا بس ابي اطلع من الدار مو سالفه الهدوم

و الا انااااااااااااااااااااا طلعت خواره !و خرابيييييييط

انا ادري و اعرف السنع

ان الهدوم البيض بروح و الالوان بروح ..

بس من له خلق !!!!

هذولا الاوامر ينعطون حق الخدم و بس

اما عساااااااااااااني انا بفلي هدومي و بفرزهم!!

وصخهم كلا نفس الشي فايرسسسسسس

حذفتهم بالغساله مره وحده

حطيت صابون

و ارجخت الغساله بودقيقتين جان اطلعهم

بسسسسسسسسسسسس بعد شنو

حلااااااااااو

ماي و صابون و تسبع وخلصناااااا

لا وبعد ما نشفتهم و لا شريتهم تعبت...

رديت الدار و المحكر و دزيت مسج حق رفيجتي

ابي اساااااااافر

ترا جد احتاج اغير جو عقب هالحكره نفسيتي يا ناس تعبت...

ردت علي رفيجتي السؤال المعتاد... من وينلج فلوس و انتي توج راده من السفر..

عقبها دقت علي.. وهزأتنييي تهزأ :/

ان انتي بروووووووووووووك و حافيه و توج راده من السفر و اذا تبين تذكره تدفعين فلووووووس

مو شعيييييييييير و قمح و سيييدز المزرعه

الله!!!!!

فقعدت اتخييييييييل ان الدنيا وايد سهله مثل المزرعه

بقعد ادور الحين سايت اون لاين احجز فيه حق باريس

بس ادفع شعير و بقر و عندي جممممممممم شيره زيتون عندي خييييييييييير

بس حلااااااااالي كلا اصوووووووووووول ماعندي كاششششششش شسوي

لوووووووووووووووووووووول

جد جد جد جد يالربع

قررت اني ان شاء الله بعطله العيد بسافر مكان قريب اني سجستينج؟؟

لا تقولون لي مكان ريلاكس و هدووووووووووووء

مابي مت من الهدووء

ابي مكان ميانين

ازعااااااااااااج

لويه

ابي تغيير

من زماان ما سويت شي يونس ... او يسببلي متعه ..:/

فجأه قرر صدري المسكرب يدش عرض بالموضوع !!

صباح الخير

اشلونكم ؟

اشلون الاحد وياكم و بدايه الاسبوع اليديده؟

اولا اشكركم وايد وايد على السؤال !

انا مصدوومه ان خلال اول 12 ساعه من نزلت البوست توصلني هالايميلات !

ابييييييييه ناس ماكنت اعرفها و ناس خبري فيهم من سنين !

لو ادري ان تعبي راح يخليني اتواصل مع الناس جذي جان تعبت من زمان

اشكركم كلكم بدون استثنااء

اشكر كل رفيجاتي و مسجاتهم

و الايميلات و الكومنتااااات و كل شي منكم كان سبوورت لي

اما عن صحتي

فالصراحه صدري وايد متعبني وانا خايفه اروح الطبيب فمريحه نفسي و ما اتكلم

و دقيت على دكتور و وصفلي ادويه و يابوهم لي

بس رووحه اللمستشفى مابي !!

المشكله ان انسانه جدا مزاجيه

يعني وايد وايد يمر علي بحياتي اسبوع او ايام بس اسكر علي باب داري و اجابل موفي و نت و بس

لكن بمزاجي و بكيفي

اما فجأه يالله دشااااااي وقعداي وسكراي عليج الباب !

شي ممل بصراحه وايد ممل

وامي الله يهداها فجأه بدون مقدمات قررت انها اتطلع شخصيه الرجل الانتحاري الي فيها

وكل شوي مشرعه علي الدااااااااار

وتسألني تبين شي

وعيزت افهمهاااا ان ما يصير تدخل و ما يصير تطلب مني اني افج باب داري .. بس هم مو راضيه

امي و ابوي اهم اكثر ناس كاسرين خاطري مع مرضي !

مساكين الام و الابو كل شي على راسهم !

انا ماعندي فكره كلش اشلون بكمل مده الحصر المطلوبه مني !!

ملييييييييييييييييييييييييييييييييييييييت

;(

swine flu !

يوم الاثنين العصر حسيت اني دايخه
بس قاومت و قلت ما ابي امرض
يوم الثلاثاء شلت روحي قصب و رحت الدوام و مت برد هناك من التكييف !
يوم الثلاثاء الظهر نمت لي يوم الخميس من التعب
حراراه
نشله
كحه
بلاعيم
فلونزا كامله بس هالمره الي اختلف علي ان مسرع ما تنك الصدر
و جسمي 4 ايام بلياليها ما نشف
24 ساعه اغير هدوومي من العرق هذا غير النفاضه
طلب مني الدكتور اسوي فحص سواين فلو !
اليوم الضحى سويت
طلعت النتيجه !
والا بوزتف !
يعني فيني فلنزا الخنازير
طبعا عزل تام في داري
تعقم البيت كله تعقيم تااااام
اخواني كلهم بنامووووووون بالشاليه
;(
وابوي طلع وايد يحب عياله !! يقولي لا اتحاجين احد من اخوانج
اذا تبين اي شي ناديني
لا احد يقرب منج!!

و امي طلعت واااااااايد مضحيه مسكينه عفست داري من التعقيم و حطتلي عند الباب جميع انواع مستحضرات الديتول
دشيت بكمامي البيت والا امي تركض تبشرني
فطييييييييييييم وحده امس كبرج توفت من فلونزا الخنازير !!

قلت لها لا عيل ابشرج الدكتور يقولي ان في وحده كبري بالعنايه المركزه داشه بريلها و الحين اهي تعبانه لان فيها ربو
وبما ان انا معاي ربو فالله يعين
رفيجتي تقوووووووووولي ياحسرتنا عليج فطيم
قلت لها لا تخافين ماراح امووووووت ما ابي اموت
عندي ثار في حياتي لازم اخذه
:D
الحين انا نايمه بفراشي من يوم الثلاثاء لي اليمعه 4 ايام ماحسيت
بس من قصبوووووووووووني و صار حجر علي بداري و عزل ضاق خلقي
الشوتايم ظيم
الاوربت تعيس
الله يصبر قلبي ويعدون هالجم يوم على خير
الله يعافي المزرعه في الفيس بوك مقزره علي الوقت

يالله ربعي البلوقر كتبوا مواضيع سنعه لانه المدونات صايره تلوع الجبد
و آزززززززززرووووووووووووني
و جابلوووووووووووووني
اسبوع كامل ماراح اداوم !!
الله يصبر قلبي

البلوه ماكو امكانيات تساعد
العين سكراب ما اقدر اهوس عليها وايد
و الاذون تعورني صمخه ما اقدر اسولف في التلفون و الظهر اخرطي مو زين انسدح وايد
و ما اعبر اتحرك امشي !
لان داري مو من كبرها !

بس انا سألت الدكتور قلت له اشلون اطيب ؟
قالي مالج الا اتهاجرين كنداا :ppPP

برد برد صفري !

احلى جو عندي هو اني افتح الدريشه مع التكييف البارد

هذا الجو يذبحني خصوصا لماا اييك هوا شوي يصير شي مو صج

المهم انا نوعي بالدوام تكييفنا وايد باارد ما اتحمل و كل ادق عليهم طفو او قصروا عليه لان وايد برد

فطبعا محد يسمع

شنو الحل اني افج الدرايش !!

و كل ما مر البيج بيج بيح بوووووس

وقف عند باب مكتبي و قالي

" اقوول خريجه مصر تكفيين سكراي الدريشه خربتاي تكييفناا سوالف درايش و بلكونات و هرنات و سنترال هذا شغل المصاروه انسييه انتي الحين في الكويت "

شسوي بمووووت برد !!

من باجر بداوم في شاااال

و خلاص وداعا الصنادل عزكم الله !

ما اعبر الصقوعه كلها براسي و ريولي

ما احب البرد الزايد و صقوعه الدوامات و المجمعات

خصوصا اذا طلعت من الافنيو .. احس خلاص بس لي البيت ما افج التكيييف و السبه الصقوعه الي بجسمي

على قووله رفيجتي لو يحطون كافييه في الباركينج عادي فطييم انا و انتي ساطرين فيهاا

...!!

عياييز الشكوة لله !

عطووووني حل مابي اسكر الدريشه خل يخترب التكييف كيفه

برد

برد برد مووت !!

عناي جيت لدارك ..جيت اشتكي من نارك !!

الى كل خليجي
عربي
او مواطن مر بالصدفه على بلوقي
او تعمد و دش عشان ينقث..
بس حبيت اقولكم ترا هاالي اتشوفونهم بالتلفزيون و الي يطلعون في برنامج بوعيده مو كويتين
و الي ينزلون اعلانات طراره هم مو كويتين و الي ماعندهم الا التدقدق و التشكي هم موكوتين

مجرد ناس بالصدفه مروا بوانيتاتهم على الكويت
دشو شرو من الحدود ماي و بيبسي و جنسيه
و صارو كويتين !
و في مثل كويتي قديم يقول
ديرتن ماتعرف اهلها ......
فهذولا قاعدين يطبقون هذا المثل !!

للتنويه فقط
ان برنامج بوعيده و خالد العبدالجليل او اي برنامج اطراراه فهو نوع حديث للشحاته و اربحو من ورااااه الناس الاف مألفه
يعني تدق المتصله تطر تتشكى
تقوم احد محسنات الكويت او محسنين الكويت بالاتصال و البحث عنهم و التصدق عليهم ..

فالسالفه كلهاا مجرد طراره و تشويه سمعه البلد
عصابات ماعندهم سلاح لمحاربه البلد فقاموا بتشويها اعلاميا ..

والله انا مااشرهه على هذول الخمه اذا طلعو بالتلفزيون بس اشرهه على حكومتي الي جنستهم...
اذا هذولا مواطنين و شعب .. شنو اترجى من الحكومه في المستقبل !!

والنكته الي حاطينها في جريده القبس اليوم شي مضحك مبكي
يده تروج المخدرات ..تاخذه من ولدها الي يمولها من السجن..و يوزعه الحفيد !!!!
اللهم لا شماته .. انا يوووووووووووووووم قريت الخبر طلعت الصاله احب راس امي و ابوي ..ان هذولا اهلي !
مو فاهمين شسالفه !! بس يوم شفت امي و ابوي قلت ربي لك الف حمد وشكر على نعمه هالام و هالابوو
اذا يده تروج مخدرات
و حريم يدقون يقولون بعنا شرفنا عشان نعيش و شربنا ننسى الهم !!
اعنبوووووووووووووكم انتخو ماخليتو لنا ويه نطالع فيه الناس بره الكويت .. مت و انا اقول هذول مو كويتين هذولا الكويتين اليدد مو كويتين ....

انا ما اقول الا ربي صبرني على الياااي

ربي ارحمنا و احفظناا و استر علينا بسترك

يالله صباح خير

من الساعه 7 و انا اصيح !!

يالله صباح خير !!

قلبي معورني

وانا طالعه للدوام من الزحمه في الدوار لازم نوقف ثواني على ماتمشي السياره

تخيلو والا هذاك الولد في مظلات بيتهم حاط ايده على اذونه و خده و يصيح يقول حق ابوه

حرااااام عليك لا تطقني كلا اطقنا كلا اطقنا !!!

واسمع صراخ الابو بس ما ثبتت شقوووول

ومشت السياااره

انا قلبي ووووووقف

الي بغيت اقول حق السايق ردني ردني !!

بس ما رديت انا شكوووو

هالمنظر خلاني فجأه بس اصييييييح

ولين دشيت الدوام و عيوني بس تدمع و اصيح

الي وياي في الاسنسير اسألتني اشفيج !

قلت لهاا لا ما شر بس شفت منظر ابو يطق ولده و الولد يبجي عورني قلبي !!

اكره الابهاااااات الي يطقوون عيالهم

حرام عليكم من الصبح اليهال بيروحون المدرسه شنو النفسيه الي يداوم الولد فيها و اهو مطقوق

الفراش يابلي قهوتي و انا لي الحين اكتب البوست و ابجي

صوت الولد باذني و اهو يقوول كلا اطقنا كلا اطقنا

حسبي الله و نعم الوكيل

يا عل ايده الكسر ان شاء الله

ترا الزواج ستر....والستر نعمه ...وماهكذا تشكر النعم!

بما ان هاليومين موسم عروس فخلوني اقولكم شغله
انا وحده ما اواطن العروس
اولا لان راسي يصدع
ثانيا لان العروس الكويتيه صايره جدا ممله و تلوع الجبد

ونفس الموديل و الناس و الاستعراض في كل عرس...
طبعا هذا عاشر بوست اتحلطم فيه على العروس بس صج شي يبط الجبد ماتلاحظون

الناس الي مسويه عرس مو عاجبها و لايعه جبدهم و مسوين عرس مقصوبين !
والمعازيم و انا اولهم من يطقونون باب بيتنا و اتينا دعوه ضاق خلقي..

وطبعا اذا امي مسافره ما اروح و لا اقولها ان شفت الدعوه !!

من فتره مدري اذا يبت الطاري او لأ
انعزمت على عرس .. دشيت
سطرت و قعدت
صار الساعه عشر بس يتني النومه ..
دش نبيل شعيل .. يغني ..
فجأه القاعه كلها قامت ترقص !!
و صراااااخ و ظلمه و استنزال مو طبيعي
حسوسني فجأه ان احنا في برايم او ديسكو !!
اطالع
ادقق في النظر و التركيز
ابيه هذي مو فلانه متحجبه !
علامهاا بالحفر طابه ترقص و تهز هز !!
والله العظيم اني ما اجذب عليهم سمع اذني
شتقول اهي و خواتها؟؟
لاااااااا نبيل شعيل عينه نظيفه ما يطالع ولا صوبنا لو رويشد او اصيل جان مافصخنا حجاباتنا وطبينا !!

شنو المنطق الي يقول نبيل شعيل عادي اقط حجابي و اصيل لألأ
شنو المنطق الي يخلي حرمه بعمر الخمسين تقوووووول واي من قال احبه حب نساني شي اسمه راحت البال ! جان انسى عمري

المشكله ان رياييلهم ما يدرون حريمهم شتسوي بالعروس ويطقون علينا الشرف !
يعني نفس العرس هذا و نفس كل العروس الي احضرها و فيها حريم يرقصون جدام راشد و نبيل و القصار و الطرارووه يرقصون واهما شبه عاريات مفاصيييخ
واذا دشو رياييلهم مع المعرس لبست الفرير و الشال !!
يعني جدام ريلج اتعرفين اتغطين و تلبسين
بس اذا دش المطرب بروحه لألأ عادي اتفصخ !!
منطق غريب الصراحه

من فتره بسيطه كنت معزومه على عرس
ويابو راشد الماجد بس انا مارحت لظرف معين
رفيجتي و اهي توصلفي اشصار في العرس جان تقولي
فطيييييييم دش راشد ما عبرت ماعبرت
ابد تقولين نفيش بجدر !!
شي شي ينقزناااااا خلانا نطامر من اول القاعه لي اخرها

قلت لها سحييييييييله !!: قطيتاي حجابج و رقصتاي
ردت علي : اي هاااااااو اشدرااااااااه عساه بثبت من كثرناا

عاد انااا مو نوعي اتحلطم عليها
بس انا شايله بقلبي من زماان
لان في نمونه من الناس ما اتطالع عمرهاا !!
وهذولا الناس ملوعين جبدي انا لو اسافر او اروح الافنيو بروووووحي
شقو الحلج هاااااااااااااااو رايحه بروووووحج هااااااااااو خلوج اهلج هااااااااااااااو
وكلااااااا ينتقدوني و لو انا شسوي كلا انا غلطانه و كلا سواتي محد يسويهاا !!

فاهي من قالتلي رقصت وي مابغت الا عمرها .. قلت لها اولا اولا ياكبرها عند الله
والله لو انا الي يايبه راشد الماجد والا اصيل والا مدخله ريال في عرسي !! جان قطعتوني تقطع
بس بناتكم عادي
وتتفصخون عادي
وتطبون ترقصون عادي
واتحبوبون في هالرياييل و تصورون وياهم عادي !!
جان تسكت
عشان جذي صرت ما احب العروس لان افتقدت البساطه
وافتقدناااا السعاده
الناس يايه منفسه
ومشكله البنت الكويتيه اذا كشخت ما تعرف تصير طبيعيه ترفع خشمها و تتسمت !!
نعممممممم اشتبيين

يازين عروس قبل
ام رعد وولدها رعد
ودواشج بالقاع و الناس بالارض
ونص الناس كراسي
وااي تذكرون قبل طقاقات صنعه و نوره
و يرزون لهم كرووووووز المارلبورو الحمر ههههههههههه

مو الحين الفسق حمدلله و الشكر
على فكره ترا كل ما احد عباله ان بسوي شي

لا صار و لا استوى هم بيي احد يسوي احسن منه
يعني ماله داعي الشي الاوفر
حلات الشي بالذووووووووق

لااا هالايام الي هابين فيه شي ادهى و امر
العروس الكابلز !!
يعني قبل العروس المختلطه في الكويت مقتصره على عوايل معينه و في مابيناتهم
لكن نياااااااااااده و يرزون حريمهم و ساطرين بالعروس شكووووو!!
والله شكوووووو
نياده و عرس كابلز تراااااا عيب عيب وايد عيب

يعني وحده اعرفها ريلها ما يرضى تشترك في جيم بس رايحه وياه عرس مختلط
شالمصااااخه
وبعدين سووووري مع احترامي لكم بنات الكويت
انتو اذا تفصختوا صرتوا اردى من اللبنانيه
ما يترس عينها ريلها !
تتفصخ و اترقص و اتعنفص عند ريل رفيجتها !
اكلي تبن و انثبرااي رقصاي يم طاولتج عند ريلج
او انطماي و لا ترقصين

شي شي شي قاعد بقلبي و مابرد قلبي بس ما اقدر اقوله مراعاه للريال
الي اهم اصلا مو رياييل الي كاشخين في دياثتهم و ساطرين في عروس و حريمهم يشربون فيها و اهم قاعدين !

يدتي الله يرحمها لما كانت تسمع عن هالاشياء كانت تقول يا حسرتنا
بيينا غزو ثاني ربي لا تاثمناا

كلمه اخيره اوجههاا للعروسين

ترا الزواج ستر
والستر نعمه
وماهكذا تشكر النعم

بالانحطاط
والفسق
والابتذال الي يصير
ومجموعه الامراض النفسيه و المنفصمين شخصيا الي تعزمونهم ..

وعسى الله يبارك لكل المتزوجين

لباقتهم .. وحده طبعي !

لباقتهم و حده طباعي !
مرات مدري ليش اتحول الى مخلوق شرس عصبي بطريقه قاتله
وماعندي قدره على التحمل
يمكن الضغوط الزايده و الارهاق و التعب الي تخليني اتحمل وايد و بعدين شي بسيط وسخيف انفجر
مثل ما قالت نوال
قاوم هبوب العاصفه و هدته نسمه ..

من جم يوم حاولت انام و ماقدرت من ازعاج الغرفه الي يمي
و اسمع ترقع بيبان و كلام بازعاج و وصيحه
اتصلت على الرسبشن و قلت لهم الدار الي يمي جدا مزعجين كلموهم و قولولهم يسكتون ..
بعد دقيقه داق علي مدير الفندق يعتذر و يبلغني ان خلال خمس دقايق راح يختفي الصوت و الازعاج و جيرانج راح يسكتون ..
وفعلا بعد خمس دقايق ما كأن شي صار ..
بعدها بشوي طق الباب
فتحت والا مدير الاوتيل بكبره يايني و يعتذر و يقولي ان اهما الحين هدو وانا بنفسي كلمتهم و الي تبينه بنسويه تبين ننقلهم او انتي تنتقلين دور ثاني ؟ و الفندق يعتذر منج مره ثانيه والحين بتوصلج سله فاكهه و شامبين !
قلت له الساعه 10 بالليل مابي لا سله فاكهه ولا شامبين اذا ابي شي ابي باندول نايت عشان انام وكنت اكلمه بنزر و زف !

صار من باجر الصبح والا الازعاج سببه فريق كره القدم اليوناني الومبياكوس الي ياي ساكن يمي وكان الدور كله الفريق و الادارين و جذي و من اركب الاسنسير و الا الكل يعتذرلي
الفشله الكل عرف اني مشتكيه عليهم !
والي يسلم علي بالعربي و الي يقولي عيونج حلوه و الي يقولي شجعينا و المهم ..
صار بالليل و الا ردت العفسه مره ثانيه بس هالمره اسمع اصوات ريايل تونسين يرطنون مع بنات و لويه و عفسه و ياهم هاليونانين

قلت لاااااااا مابدهاشي يا فطيم
و ارفع السماعه واطلب مدير المنتخب او اي اداري او المدرب المهم ابي مسؤل مو من الاوتيل ابي مسؤؤل عن هالخمه الي يلعبون ..
ويعطوني رقم غرفته بعد محاولات مستميته
و ارفع السماعه عليه
ومابحياتي كلها كلمت ريال بهذا الاسلوب
قلت له انتو يايين لندن ليش..؟؟
انت ياي لندن عشان تلعبون؟ صح؟
للاسف انا اسمع في الفريق اليوناني بس عمري ما توقعت الا لاعبينكم عيال شوارع يايبهم يسهرون ويا فرنسيات و مغربيات ليله المبارات !
هذول باجر بيلعبون؟
للاسف من سوء حظك انكم ساكنين يمي و من باجر الصبح شوف الجرايد و الصحف شنو راح تكتب عنكم وراح تطلعون من لندن بفضيحه مو بفوز !! (( طبعا خرطي بس جذي هددته و ألفت على راسه قلت له الاوتيل الي انتو ساكنين فيه موبستوى الناس الي انت يايبهم المفروض تسكنهم في فندق نجمتين او موتيل ))
بعد خمس دقايق من المكالمه
الرسبشن و المدير و الكونسيرج و حتى الهاوس كيبينج
ياييين انا ماسويت شي
الهاوس كيبينج ضفت شغلي
و البيل مان يشيل العلاليق ويااها
و المدير بالكروت و المفاتيح

وغيرت الدور بكبره وودوني دور مافيه احد !

و فريق الومبياكوس اصصر على ان ياخذوني معاهم احضر المباراه و ومدري اشخربط على راسي في اي بي و في اي بي بعدين فهمت انه كان كنوع من الاعتذار عن الي سووه انهم بيعطوني تذكره في اي بي اقعد مع ضيوف الرسمين الي ياين يحضرون بس انا رفضت طبعا
اشرايكم فيني !؟
و كل خمس دقايق ايووني يشوفون اذا مرتاحه او لألأ
الاوتيل ما قصر
و يمكن كان اسلوبي مع الفريق المزعج قاسي شوي بس صج الواحد التعبان اذا ما نام مشكله !!
واكتشفت اكتشاف انا عبالي عيالناااااا مغازلجيه
طلعوو اليونانين اعقد من ربعنااااااا و اكبر مغازلجين

عاد تبون الصج يوم راحو ضاق خلقي تحسسسسسفت كانو اشحلوهم كجمال يعني بس مدري ليش استشريت عليهم

و عقبها يوم طلعت الصبح البيل مان المصري موتني ضحك

يقووولي دوول جاو مبارح خسرانين و مشيوو من الفجر دي الوأتي حتنامي مش حتأومي !!!

قلت بقلبي بل حتى انت دريت اني شااااكيه !!

تصبحين على خير يابلدي

تصبحين على خير يابلدي
تصبحين على خير يا كويت
قبل لا انام حبيت افضفض بشي في خاطري
وبعدها اسكر الابتوب و انام

أول مره بحياتي ايني احساس ان الكويت امرأه عجوز ارمله بها من الهم ما يكفيها و بها من الالم الذي سيحزنها سنين ..

ماتلاحظون ان البركه قلت في الكويت .. وان صرنا ننام و نصحى على فاجعه ..
اولها من شهر مقتل الشاب المرحوم بأذن الله تعالى حازم البريكان
وانفجعنا كلنا عليه بلد كامل باهلها و شعبها ..
واخرتها نظرنا نظره الخزي والعار على من قتلوه و نكسنا رؤسنا وبلعناها ..

و مامدانا ارتحنا الا طلعولنا هالشباب الي بفجرون فينا احنا الابرياء !!
شنو الهدف مدري و لمصلحه منو هم مدري !!

واخرتها امس يهتز سرير تلك العجوز بفاجعه العرس و الحريق ويعلن بالاعلام الخارجي و يقدمون رؤساء الدول خالص العزاء للشعب الكويتي ..

قعدت العجوز من النوم قلت لها قوماي يايينج معزين يالله .. استقبلينهم
تدرون اشردت علي؟
وخزياه فشله شقولهم ياهل ام 23 سنه اعفست الديره واحرقت بيوت
وقهرت امهات و يتمت اسر .. وشردت اطفال ..
فعل فاعل و خطأ امرأه يعاقب عليه بلد كامل ! و تحاسب الحكومه و و الكل يتهم انه مقصر !!
ليش مدري

اول مره بحياتي اكتب بوست ضد شخص وانا متعاطفه وياه و متعاطفه ويا الطرف الاخر .. اتيني حاله بس افكر شنو شعورها الحين يتروالي ودها احد يذبحها و تفتك..
وبنفس اللحظه اتذكر الضحايا يعورني قلبي اكثر و يعتصر قلبي ..

في جلسه قانونيه اليوم تم النقاش بين زملاء لي محامين ..اتصدقون انه بدقيقه اقدروا يفندون القضيه .. و يشيلون انتفاء قصد القتل و الساعه مبكره و الف عذر و عذر و بطلعونها زي الشعره من العجين بس لانها صارت قضيه رأي عام فماراح يدسون اسمائهم فيها!!
عصبت عليهم و قمت و قلت صج محامين !!

نصيحه رحموا البلد من القيل و القال
رحموا البلد من الاشاعات
رحموا البلد من مصالحكم ..
الكل الحين صار يضرب بدفوف المصلحه
بس مدري لين وين بنوصل
تصبحون على خير بروح انام
تصبحين على خير يابلدي .. صج اتمنى اتشوفين الخير لانج من زمان ماشفتيه من هالوييه الودره الي مجابلينج

رساله الى نواب الجهراء .. ما اصدق ان مافيكم واحد ثري او مليونير وبدال ما يبني عمارات و يشفط في هالمناقصات يسويي مستشفى او جناح سنع .. ؟؟

رساله الى المستهترين باحزان الناس و مصابهم و ماعندهم سالفه الا يسوون مسجات نكت و قالبين الفاجعه الى مضحكه .. استحوا على وييهكم ..

رساله الى المعنيين في البلد ..بدال ما تفترون من معرض لي معرض ومن عرس لي عرس .. اصلحوا البلد .. بسكم مجاملات

رساله الى شعب الكويت
فكروا في الديره عدل

تصبحون على خير و رمضان قرب ينعاد عليكم بصحه و سلامه
وعساكم تعودونه كل سنه على الخير ...

مبارك عليكم شهر الرحمه

If I was in darkness you would lead me to the light

اجازه و سأعود قريبا انشاء الله

مجرد راي و اقتراح

انا راي يختلف عن رايكم

مع احترامي لجميع الشباب و الاعضاء

انا ضد ان اي شي يصير في البلد

دل دل دل ويالله تجمع في ساحه الاراده في هالحر و هاللويه

بدون تنظيم بدون تخطيط

و نواب ايون موعارفين شنو يقولون

والضحيه منو؟؟

القضيه المعروضه و الشعب الكويتي

ظلمتوا حسين الفضاله امس بتصرفكم السلبي يا اعضاء مجلس الامه

انا رايي وفكرتي بسيطه

تبون اخذوها

ماتبون هم شي بخاطري وقلته

يتبرع 10 شباب

منهم5 في الافنيو

و 5 في 360 اليديد

ايمعون توقيعات من الشعب الكويتي

بالمجمعات و الجمعيات التعاونيه في الفتره الصباحيه

على اسبوع الا محصليين لهم 300 الف 400 الف توقيع

وياخذون الملف ويطالبون فيه اهم دوليا

بعيدا عن الشوشره و اللويه

لان محد بسويلهم شي

ديرتنا واحنا ابخص فيها

ماراح تدش بلويه ويا ايران

واذا كلمتوا الكبار بقولون لكم حسين الفضاله مو اول ولا اخر واحد

انزين و شنو الحل؟؟

تجميع التوقيعات من الشعب الكويتي

وعرض ملف القضيه

وتوكيل محامي دولي

واعتصام بسيط منظم مرتب امام مقر الامم المتحده

ويوصل صوتكم

والله يرده سالم