Thursday, May 04, 2006

الحياه بحاجه الى رجل بس اكيد مو بوضاري

بعد ما خلصت من صلاه المغرب
انادي على ام الخير اقولها يجهزون عمرهم و السياره عشان نطلع انتمشى شواي و اشتري اغراض باجر اختي و اعيالها و ريلها و اخوي و الاهل كلهم اهني
....
اخذ ولدي من غير الخدامه اخليها اتريح شوي
ننزل انتمشى اشتري بعض القروضات و الحلو ...
الجو عجيب .. يالله يا ريت الجو عندنا في الكويت طول السنه جذي
ام الخير اتناغي فهودي و اتلعبه
انا عيني على برا
اسرح شوي بخيالي
و ارجع اندمج في ام كلثوم
وارد ابتسم ابتسامه بارده لام الخير و فهود
لاني فعلا ما ادري شتقوله
كلش انا مو وياهم
و احنا في الرده
نمر ناخذ كنافه من حبيبه
نرجع الوقت متأخر
حياتي هالياهل نام و قعد عشر مرات
يداد حق هالخدامه مسكينه اشلون اجتوفها ما طاحت انا ساعتين زمان ماني قادره
..........
ارجع اخذ شاور و اسحب كفري و انسدح في الصاله
اتيني الشغاله اتقولي ان فهودي نايم
و تسألني اذا ابي شي او شنو ابي باجر على الريوق عشان اتوصيهم
اقولها مشكوره ام الخير عارفه شنو يبون باجر غدا
بس ريوق ما ابي
انتي روحي نامي مالج شغل فيني
او اذا تبين تطالعين تلفزيون تعالي قعدي
تقولي انها بتدخل تاخذ شاور و بتريح ..لان فهودي يتفزز وايد في الليل
...
اقعد انا اجابل فيلم دعاء الكروان الي شايفته مليون مرا
و كل مرا اشوفه ابجي اكثر
...
انام
اتقعدني ام الخير لصلاه الفير
ارجع انام لي الساعه 10 الصبح
اقعد اسنع و ارتب وياهم اشرب قهوتي
ابخر المكان
و على الساعه 2 الظهر يتحول هذا البيت المهجور و المكان الميت الهادي
الي جنه
اخوي و اعياله
و اختي الحنووونه
و بناتها
زوجها صديق العايله
و الاب الروحي لي
اسلم عليهم بهدوء و ابوس فيهم
بس لما شفت اختي
حضنتها حيل
لميتها و بجييييييييييييت بجي الايام و السنين الي فاتت
ابجي بحرقه و قهررررررررر
ابجي و على لساني كلمه وحده
طلقني
طلقني
طلقني
الغريب الي في الموضوع
ان محد من اهلي يدري ان من اسبوع استلمت ورقه طلاقي
ما بغيت اخرب عليهم عطلتهم ووناستهم
كل من كان عنده امل في العوده
الا قلبي المجروح ماكان يبي الرده
بس لا تسألوني ليش ابجي على طلاقي
تكسر كل شي جدامي
اطيح من طولي
ام الخير و خدامتي و اختي ياخذوني لي غرفتي و على فراشي
اتشربني اختي الماي بيدها
ياسمين اختي: تعوذي من بليس تعوذي من بليس هذا الشيطن يبيج جذي يقص عليج
وين ايمانج وين ثقتج في الله
ربي ما يضيع حق احد
تبجين على هذا ؟؟
الي باعج بيعيه
و ليش زعلانه انتي الي طالبه الطلاق
تعوذي من بليس
اشرب الماي و ابجي
مقهوره
يرن التلفون
ابوي يتطمن على اختي و اعيالها
أأشر لها اني ما اقدر اكلمه قوليله مو يمج
...
و ارتاح مع اختي اشوي
و اعطيها تفاصيل قصه الطلاق الاخيره
و اجرائتها
و اقولها عن كل شي
و اقولها ان الحين اهو اخذ اعياله و سافر فيهم في الصيف بعوض
وبسوي نفسه الاب المثالي فجأه
...
اقعد مع اختي من طول الوقت
لي صار بالليل
ترجتني و لزمت علي نطلع
اعتذرت منها
و بصراحه حبيت اقعد في هدوء شوي
فانتهزت فرصه طلعتهم و قعد ويا ام الخير
نشرب قهوتنا
و نستمتع
انا حاسه ام الخير فيها شي
قلبها مقروص بتموت تعرف تكمله القصه
اصلا انا ادري اهي جهزتلي القهوه و البرنده و الفاكهه
عشان تقعد وياي و تعرف كل شي
..
انا : ها ام الخير مستعده تسمعين الباجي طبعا
ام الخير: اكييد
بدون مقدمات
اكمل لها عن خيانته الثانيه لي بس هالمره في السفر ...سافر على اساس مهمه و عنده سفر و تعرف على وحده هناك للاسف عاش معاها 10 ايام بالحرام
كانه يعرفها من سنين
هذا الوقح الي اهو زوجي
صار عنده الامر جدا سهل
استمرت علاقتهم..لين بعد السفر
كشفت انا الامر
و ناضلت اكثر و اكثر
و اخذته في سفر لمده شهر اناوياه بروحنا ضنا مني ان بينساها
بس صرت انا احس ان نهايتي وياه قربت
او حياتي قام يدخلها عنصر خطير
مافي استقرار ابد
اول ما رجعت الكويت
فاتحت ابوي في الموضوع
شرالي على طول بيت في الروضه
يديد بس اجرته
من غير ما يدري سالم
ابوي يبي ينسيني السالفه و الموضوع
شرالي ابوي سياره يديده
قامت القيامه عند سالم
قلت له ... ابو وبيهدي بنته فيها شي!!!
قالي يا انا يا السياره
شوفي يا ام الخير اذا الريال وصل لي هالمرحله
عرفي انه بايع
و يتلكك
قامت تصير مشاكل بسيطه
لكن المرا الي كانت معاه في السفر
مازالت موجوده
عرفت انا هالشي بعد سنه !!!!
انا اهني عزمت على الطلاق
و الانفصال
لازم يا انا يا اهي
و طبعا ظليت اعايره انها بنت مو زينه
و انها اي شي
و انها دخيله
لانها لو زينه مو معاك بالحرام
بس لانك وصخ و قذر فهذا مستواك انت
قمت اخاف على اعيالي
صار مافي استقرار في البيت
بس لان ادري زوجي ما عنده مكان غير هذا البيت فمستحيل راح يطلع من البيت
تدخل ابوي
قام يقوله اهي شافت حالها
و اهي ما تحترمني و اهي و اهي
حط كل بلاويه و اعيوبه علي انا!!!
ليش بالله انا قلت لك خون او خربط!!
و الا انت الي صرت ما تبي الا الحرام
صرت تتلذذ فيه
الحين اهو درا ان موضوعه صار مكشوف
فقام وتزوج حيزبونه
و لما تزوجها
انا اهني استعجلت في اجراءات الطلاق
و ما بين المحاكم و هالسوالف
اخذ الموضوع شوي وقت
طلعت المؤجرين
سويت بيتي
طلبت منه ان نبيع بيتنا و كل من فينا ياخذ نصيبه
فعلا بعنا البيت
لانه انا كرهت البيت
و اهو ما كان يقدر يشتري نصيبي في البيت
و انا سكنت الحين في البيت اليديد
و لما كان اهو مسافر ويا الاعيال صدر الحكم
و تطلقت بالتوكيل
ماتحملت الوحده
ييت اهني الاردن مع فهد
.......
و هذي زبده الموضوع و القصه باختصار
ما اقدر يا ام الخير ادخل في تفاصيل اكثر
لان راح تنبش جروح وايد
و انا ماسكه نفسي و دموعي و لا ابي اطيح
ابي الله يخليني لاعيالي
ما ابي يرجعون من السفر على بيت كئيب و حزين
و ام تبجي الليل و النهار
عشان جذي خليتهم يسافرون بروحهم
ابيهم يستانسون في الصيف بعد ما عاشو سنه كلها مشاكل و بلاوي
و ايد اثرت على نفسيتهم
انا اهني الحين
عشانهم
ابي انسى الجرح
او اخفف منه
....
استمر على هالحال
اكثر من اسبوعين
مابين ضحك و بجي و في الليل كل الذكريات تطلع
عشان ما انام
الظاهر عيني تعودت
.....
بس مثل ما يقولون
اول الغيث قطره
مفاجأه ما بعدها مفاجأه
ولدي خالد مع ابوي
واااااااااااااااااااي
خالد ولدي في حضني
يا شقوووووووووووووووول ولهت عليك
خنشووف
خالد: كاني هذا انا يعني اكيد خالد بالله منو!!
ابوج بدلني في صعيدي مثلا!!
انا : يا كرهك انت للحين السانك طويل ما تقول ولهان على امي
خالد: طالع على ابوي
انا : المه اكثر اي والله صاج ما جذبت على ابوك
بعد يومين في الاردن اخذ خالد و نروح العمره
انا وياه و ابوي
استمتع في الكعبه يومين مروا
كانهم حلم
في العمره شي مسح على قلبي
شي انغسل
في كل مرا اغسل فيها في ماي زمزم
همومي كلها تطيح
في كل ليله اصلي فيها اطلع من الحرم بعد الشروق و يطلع هم السنين كله مني
يالله ياربي اشلون جذي الواحد
كنت دايما ادعي ربي و انا في صحن الكعبه
يا رب عبيدك في دارك
فقيرك بفنائك
يرجوا رحمتك و يخشى عذابك
كنت لما ادعى اسمع الطيور تسبح فوقي
استبشر خير
و ان الله بعوضني انشاء الله
ارجع من العمره
على الكويت
مع ولدي خالد
بعدها بيوم توصل اختي و معاها ولدي فهد و الخدامه
ولدي ضاري راجع الكويت قبلي بيومين
يومها لما شفت ولدي ضاري
زال همي
و حسيت فعلا
ان معاي رجل للزمن
معاي سند
معاي حبيب
معاي كل سنين عمري و لا ضاعت
يرجعون باجي اعيالي
و بعدها باسبوع
تبدا المدارس
و انشغل وياهم في المدارس و اللويه و الطلبات
و التدريس
و هواش الصبح
و صراخي عليهم الظهر
محد يغير ملابسه قبل الغدا !!
مدري ليش اعيالي انا بس الي يتغدون في هدوم المدرسه و الا الكل جذي!!!
و تمر الساعات و تمر الايام
و يمر الوقت
انا ما نسيت
بس انشغلت
ربي عطاني العيال الي نسوني شوي
مو بيدي ما احزن على نفسي
بس ما عندي وقت احزن على ذاتي
لاني مشغوله فيهم
الحياه مو مثاليه
انا مثل ما انا
و ابو ضاري عايش بحياته و يمكن يكون مستقر
اييهم كل خميس يتغدا معاهم و انا اطلع في هالوقت
لانهم ما يبون مرت ابوهم
و هذا شرطي في انه يشوفهم
يطلعون معاه يوم الجمعه العصر
بس مو كلهم
..
في امور وايد في حياتي و فراغ في حياتي يحتاج الى رجل
بصراحه كل شي في هالدنيا يحتاج الى رجل
غريب امر الحريم الي يقولون ممكن العيش من غير رجل
ابسط شي .. البيت هذا يحتاج رجل يديره و رجل واقف على الخدم و السواق يهابونه
ألسنه الناس تحتاج الى رجل تسكتهم
كل امرأه في هالدنيا محتاجه رجل
بس اكيد مو انت يا ابو ضاري

23 comments:

Dr. Saleh said...

إذا كانت هذه نهايه القصه فهي نهايه جميله تدل على قوة عزيمة وإيمان أم ضاري
وهناك أمثله كثيره في مجتمعنا مماثله لهذه القصه الممتعه
والتي تكون فيها الزوجه ضحية أنانية الرجل
أمتعتينا في الأجزاء الثلاثه
وعساك على القوه
ونتمنى أن نرى المزيد من هذه القصص الواقعيه

Яeema said...

إعجبتني النهاية ، بس لوما الرياييل في حياتها سند جان ما عاشت
أبوها
عيالها
يعني مالنا غنى عنهم بس الزوج مو كل شي

و إذا باعني الله وياه
و مايشوف شر
يا يقعد وياي حافظ كرامتي و فارض إحترامة ووضعه بالمجتمع يا يستاهل اللي يصير فيه

أمتعتينا فعلا بهالقصة والنهاية المقنعة
و المفروض أن يكون

قواج الله

BaLqEeS said...

قصتج وااايد حلوه بس طوييله ..
هاصدقين عااد انا استغرب من الوحدة تكون اهيا تبي الطلاق ...بس اذا صار نتهااار احساس غريب و ان شاء الله ما نشوفه

Lord Bin Sleet said...

غريب أمر ابن آدم
يسعى ورى الشي بدم ضروسه واذا وصله يتحطم ويتمنى انه ماسعى...

قصة مؤثرة
انقلي لأم ضاري تحياتي الشخصية وأنا اعرف اردى من هالقصة بكثير وصدقيني أنها لو تسمعها ان تشكر ربي ليل نهار

تحياتي
لورد بن سيت

a7La eNG said...

الله يمسح على قلبها اكثر واكثر

و يبارك لها بعيالها و يعوضها خير

امرأة قوية ام ضاري .. طاحت واقفه بكل شموخ .. غيرها يرضخ و يذبح نفسه بس عشان يظل الريال حواليها

اهيا لا

الله يسعدها يا رب و تتهنا بعمرها و تشوف بعينها حرة قلبها في من ظلمها يا رب

يعطيج الف عافية احس نهاية سعيدة بمقياس السعادة الواقعية مو أفلام يعني ههههه

خووش دعاية سياحية حق الاردن بس وين نلاقي ام الخير يا حليلها
يسلمووووو

lawyer said...

د.صالح
حياك
شكرا على اطرائك
اي اكيد الحياه مليانه عبر و قصص
الله يعطينا الايمان بقدر البلاء

ريما
هلا عمري
اكيد كل مرا محتاجه رجل في هالدنيا تستمد منا قوتها

الاب غير
و الابن لازم يحس ان البيت في اساس قوي
البيت بحاجه الى زوج
الي رجل
ابوها ريال كبير
و ولدها لي الحين ماحكته الدنيا
اهي قالت الحياه محتاجه لرجل بس مو بوضاري


بلقيس
حبيبتي اشكرج
اكيد المرأه تبجي لان يضيض خلها على نفسها مو على الطلاق
مو على الرجل
على حظها و الي يصير في بيتها
مو شوي ولا سهل

لورد بن سليت
شكرا لك
اي شفت اشلون
هذي حال الدنيا

lawyer said...

اقدعها مهندسه
حياج الله حبيبتي
اتصدقين انا و انت حطينا الكومنت في نفس الوقت

عادي عادي طوفي انا ملاحظتي شوي قويه و تشتغل عندي الحاسه الجنائيه

اي واقعيه
لان الحياه واقعيه
مافيها سعادهه دايما
و لقد خلقنا الانسان في كبد
هذي مو الجنه هذي الدنيا

layal said...

دايم اذكر هذي المقطع لما احد يكلمني عن علاقه فاشله او حتي عن الرجال
no man no cry
تحياتي

lawyer said...

ليال
و انا دايما اقوووووول

This Too shall pass

NaDiA AnZa7a said...

نهاية حلوة وعيني عليج باردة يا لوير
بصراحة انا اشجع ام ضاري على الزواج الحياة ما توقف عند اول رجل
اللي اعرفها وقصتها تشبه قصتج تزوجت وطزت بالامة كلها
الواحد جم مرة بعيش علميني

نون النساء said...

:(

اوكي انا موافقة

بس مو شرط يكون هالريال زوج

ممكن يكون أب
أخو
ولد


بس مو واحد مثل سويلم
والله احسن شي سوته اطلبت الطلاق وتطلقت منه..

تتم مطلقة ولاتقعد عند واحد سرسري
نجاح مرته ولا فلوسها يخليه يسوي جذي

صج مريض

kazmawy said...

الحقيقة القصة شدتنى
العادة لى شفت بوست طويل
خليته وما قريته هالمرة قريته وقريت الى قبله
مااحب القصص الحزينة
لانها تضيق خلقى خاصة اذا كانت واقعية
تسلم ايدج
والله يجنب البنات اشكال هالادمى السيء والدنيء

markbrinick5490601207 said...

Get any Desired College Degree, In less then 2 weeks.

Call this number now 24 hours a day 7 days a week (413) 208-3069

Get these Degrees NOW!!!

"BA", "BSc", "MA", "MSc", "MBA", "PHD",

Get everything within 2 weeks.
100% verifiable, this is a real deal

Act now you owe it to your future.

(413) 208-3069 call now 24 hours a day, 7 days a week.

EsTeKaNa said...

يعطيج العافيه
احلى ما في اسلوبج انه قريب
واقعي
تحسين انها سالفه صجية وشي يصير حواليج
تسلم اليد الي طبعت والعقل اللي فكر
:)
مرات يتعلق الانسان بشئ،او بشخص لدرجه يعتقد انه ماله حياه من غيره
وهذا غلط
التعلق الحقيقي لابد يكون بالرحمن
اللي عارف الضعف والقوة والخير والشر
كلي ثقه انه رب العالمين ما يضيع صبرها ولا ايمانها
وبيعوضها خير من ابو ضاري
:)
بس اهي لا تشرب شيشه
:pP~
ماحب شكل الشيشه على الحرمه
احس يقتل انوثتها ورقتها
:)

3ateeja said...

سرد عجيب لوير :) جني اشوف ام ضاري جدامي

يحليلج يا ام ضاري
واذا الذكور كلهم على شاكلة بو ضاري
:(
يا حلو الحياة بدون بو ضاري

فوضى أفكاري said...

قصه روعه احس جني أعيشها بتفاصيلها
ماشا الله عليج

والدنيا ماتنتهي بسبة ريال زين تسوي طلبت الطلاق عالاقل تعيش بكرامه ولا تعيش مع هالريال
عجبني no man no cry
بس هم اصابع ايدج مو مثل :)
قصه روعه مثل قصصج الي قريتهم قبل
معجبه بطريقتج في الكتابه:*

sugar free.. said...

القصه وايد حلوه ووايد مؤثره .. صراحه مجهود تشكرين عليه ..

السرد جدا ممتع .. عسل يا عسل ;)

lawyer said...

ناديه
اذا اتشجعينها على الزواج يالله شدي حيلج و دوريلها ريل


نون النساء
اموووووووت عليج و انتي مشتطه و مهزأه في الرياااااال

مت من الضحك على سويلم

ههههههههههه


كظماوي

حياك الله
شكرا على كلامك
الحمدلله انك قريتها
الله يسلمك امييييييين



استكانه
ياختج انا اسييييييح على هالكلام الحلو الي تكتبينه
اي واقعي هذي حال الدنيا

الشيشه اذا في البيت و في الحوش و بين المحارم مافيها شي
لا تظنين اني اشرب شيشه
هههههههههههههههه
لاني والله فيني ربو و تنك
انا ما ادافع عنهم بس انا احط مبررات
و حريه شخصيه ان الواحد يشوي اي شي في بيته


عتيجه
الله يخليج و يسلمج حبيبتي

اي على قولتهم راحوا ريايل الدروازه ما بقى الا رياييل المطنزه و العازه



فوضى افكاري
اسمج بروحه يعبر عن شغلات وايد حلوه
حياج الله اختي
اكيييييييد اصابع الايد مو سوى
و اكيد في وايد سنعين

تعجب فيج العافيه


شوجر فري
حيااااااج اختي نورتي
حلت دنياج قلبي
وااي يا بختي انا عسل
اي عيوني انتي سكر توزعين الشيره و العسل و كل هالاشياء ابلاش
صورتج تعجبني
هالقندتين

cosimfree911 said...

ge9aaa wayed 7elwaa

walaa mashat alwagt bel dawaam ;)

ya36eech alff 3afyaa

oo allah ey3ean aljamea3

nOOna said...

ماشالله عليج عيني عليج باردةانا وايد احب اقرالج واستمتع في قصصج الحلوة يمكن هذي اول مرة اعلق فيها عندج بس هالمرة القصة غير شكل بصراحة طريقة سردج للقصة كاني عايشة مع ام ضاري واعيالها كاني فرد من افراد هالاسرة
صحيح المراه مهما كانت قوتها وعزيمتها فهى انسانة حنونه وعطوفة محتاجة حق شخص يحسسها بالحنان والامان يملأ فراغها العاطفى ويكون سند لها بالهدنيا الغشرة
وسلامتج

we love kuwait said...

I absolutely hate this um dhari character, leaving her baby to sleep with the maid, its like she is paying her to be a second mommy! she gives the maid a break but the arab lady stays with the baby instead, its like this baby is not a person its like it’s a puppy or a toy! With no personality no individuality no personal qualities or traits, irs weird how depressed our Kuwaiti children are, and we wonder why we have the highest numbers of autism? She leaves her baby and goes to 3umra? Prioritizes religious practices over "mothering" her infant? I thought religion puts ur children first! God teaches us to be human and take care of our little ones, love them nurse them care for them. As a stay at home breastfeeding mommy IM sickened by this lady! i see this appalling picture of um Dhari everyday, bel jam3eya, eb marina mall, eb ezwara, um refeejti, refeejat khalti, my nieghbour, someone at work : um hadda her 3 months old baby o ray7a marina lay 10 bel lail, um mashya bel jam3eya o walad-ha nayem 3ala chatf el khaddama el maskeena elli tamshee waraha, um ga3da etsarrekh 3ala 3yalha el seb7 gabule l madresa, um doesn’t even cook lunch for her own children, a mother etcha3em 3yalha malha khelg-hum, el khaddama etwadeehum el fer3, el sayeq eyeebhum min el madresa, our children are depressed!!! For not having their mothers around, now its our duty as young mothers to make a new future! To build a new Kuwait and grow a new tree, young mothers should stand for their rights to be there for their children and actually be there lool I know someone who took a maternity leave not to stay with her baby and breastfeed him but to travel o etghayyer jaw leaving the baby at her grandmothers house!!!! Its not only sad, its REVOLTING!!

p.s. I just hate that u called her eldest Dhari menba66aaa chabdi hadee semeeti!!! Ufff ! laken as a writer ma gassartay :P u did a good job making me hate an imaginary character hehe!

arwa said...

لوير..القصة رائعه
أعجبني تعليق: انا طاحت بكل شموخ
بلغي تحياتي لأم ضاري
ولقملك وفكرك الرائع
أروى

we love kuwait said...

I have to add that I find this um Dhari to be very selfish, she only indulges her self eb ashya o mashaghel ma3a 3yalha to forget or help her own wound heal, and even caring for her children she does it chenha ga3da et6alle3 7arrat-ha! Ashoof hal 7areem ey6al3oon 7arrat meshakelhum ma3a reyayeelhum aw el dawam be3yalhum o tadrees-hum, el tarbeya wle ta3leem ma tabdi 7azzat el tadrees.. tabdi min awal yoowm welada, weldech 3umra 3 days yshoofech o yet3allam minch, el omooma ma tet'ajjal lay 3ogob el esteqbal aw 3ogob ma yekbar aw 3ogob ma yseer teenager yefham akthar.. we under estimate our children's intelligence and that’s our problem. When the mother doesn’t practice her motherhood to the fullest and o ma etghathi ghara'ez-ha el ensaneya o omoomat-ha bel shakel el ssa7ee7, tafqed wayed min onoothat-ha as well as insaneyat-ha.. fa tussbe7 ensana naqesa la taqwa 3ala el 7ayat bedoun ssrakh o a3sab , la tassta6ee3 edarat manzel la tassta6ee3 tawjeeh solookeyat la tasta6ee3 tarbeyat el abna' wala tarbeyat nafs-ha, la takoon sa3eeda wala tos3ed min 7awleha! El sa3ada comes from within, from feeding ur instincts, only then u can be successful.. obviously um Dhari didn’t do her internal homework.. as for abu Dhari, i see him as a victim, a victim of society.. p.s. ma khallait a7ad ma dagait 3laih to talk about this um Dhari, rayli khafara o weldi nayem shasawee :/ sorry if u find me a little bit meshta66a o sorry if u don’t find coherence daykha hadee ga3detee min el fayer hehehe