Friday, January 05, 2007

رجوله فواز و حكمه نور


نور بسرعه السايق بمر ياخذ الجناط و يسوي البوردينج
عشان تالي انا امرج .. بعد خمس دقايق الجنطه مسكره
و ناطره برا .. مابي تأخير ..قلت لج انا .. مو ادق عليه بعد شوي يقولي معطلينه !!
نور : انشاء الله انشاء الله والله الحين اخلي الخدامه تقعد عليها و اسكرها
فواز : شنو!! الخدامه تقعد عليها ! من صجج انتي من بيشيل الجنطه هذي ! انا بحطها على ظهري
قطي نص هدومج ما ابي جنطه اكثر من 20 كيلو انا الي بشيل !! و حطي حساب اني ماراح ادفع وزن في الرده !!
نور: انشاء الله انشاء الله (( ياربي انا شيلي خلاني افج على عمري بيبان مسكره )) .
فواز : يالله خلصي بسرعه و دقي علي بعد شوي اذا وصل و اخذ الاغراض
نور: انشاء الله عمري انت ..مواااااااااااه (صوت بوسه)
تروح نور تحاول بعد جهد جهيد تسكر جنطتها و تعطل السايق برا ربع ساعه و فواز يكسر عليها التلفونات و ماترد
وبعد ساعه و نص يكون فواز عندها
يمرها ..
نور عند اعتبه الباب ..فواز فواز بليز انزل ..
فواز قاعد يم السايق يأشر لها تعالي بسرعه لا تعطلينا
و اهي تصرخ فواز بليز انزل الله يخليك
يفتح الباب و ينزل فواز في قمه التحلطم
اشتبين مو كافي معطلتنا
نور تلم فواز حيل ! وااي حبيبي و اخيرا بنروح شهر العسل
جذي الناس تسافر شهر العسل في سعاده
مو هواش و زف على جناط و ووزن بعد 20 سنه اذا سافرت وياك
اشلون بنكون !!
نروح المطار بكساات !!
فواز يتحلطم والله انتي متفرغه بسرعه
بسرعه
و في الطياره
فواز يشرح حق نور حالته
شوفي نوري ترا انا صج قبل السفر في يومين اتوتر من خوفي من الطياره و طول فتره الطياره اعصابي
تلفانه فبليز تحمليني حياتي اوكيه
ثاني شي تامرين بشي قبل لا يبدي مفعول الحبه !
نور: ((مبققه عيونها )) اي حبه !! فياجرا من وراي يا فواز !
فواز: فياجرا ويهج ...لا حبيبتي هذي حبه منوم اخذها في المطار عشان من اركب الطياره انام
لا تقعديني حق الاكل و لا شي اذا وصلنا قعديني اوكيه
..تمسين على خير !
نور : تعطيه بوسه ..حياتي انتي ما ادري انك تخاف من الطياره ..ماقلتلي من قبل
فواز : انتي وهلتيني ..عرفتج سنه ..احبك ..احبك ..احبك .. قصيتي علي لفيتيني و خذيتيني ..
نور: ترفع الغطا و تغطي ويه فواز ..نام بس نام ..نوم الظالم عباده ..
يوصلون المطار
و تالي الفندق ...
و يبدون شهر العسل ..في ايطاليا ياخذون كروز من روما يلف فيهم ايطاليا في 6 ايام
و في اول يوم شهر عسل رسمي ..
يوصلون السويت .. منبهرين في حلاته و فخامته ..
السويت الملكي ..
عباره عن غرفتين ..صاله حمامين
و خادم معاهم !!
يطلب فواز من الخادم ان ما يدخل عليهم الا و اهو مستأذن
لان احتراما لخصوصيه زوجته و انهم مسلمين
تدخل نور تاخذ شاور ..تلبس قميص نومها .. الراقي
تتعطر ..و تولع الشموع ..استعدادا لاحلى يوم في حياتها
الي احلمت فيه عمرها كله ..
فواز يبدأ في المداعبات
و نور تتجاوب معاه ..بحياء و دلع
وبعد اكثر من عشرين دقيقه تتسائل نور بينها و بين نفسها
ان ما حست في شي من تحت يداعبها .. تتسأل نور .. شنو شكلي مو حلو .. اشفيني ليش ما قام
تلم فواز عشان ما تحسسه انه اكو شي غلط
نور عينها على الساعه .. و تقول بقلبها يمكن تعبان ! من السفر و الرحله الطويله !
فواز يحاول يريح نور .. مرا مرتين .. في اكثر من طريقه ..ترتاح نور
يبوسها فواز ..و يقولها يالله قومي ناخذ شاور !..
خذو شاور بعد ساعتين ..
و تعشوا ..و في العشا ..
نورتتجاهل سالفه ان فواز ما حاول يعاشرها بطريقه ازواج لفض بكارتها ..
اسكتت و استمر الحال لمده 4 ايام ..
يطلعون و يدخلون .. و فواز مازال مجرد مداعبات .. بوس .. رقص . و كل انواع الاثاره
بس مافيه فض للبكاره ! ماحست ابد ان اهو استجاب كرجل لاثارتها !
و على الريوق ..تسأل نور ..: فوازي انا بنت ليش.. ؟؟
ليش مو قاعد تحاول ادخله فيني .. ماحسيت اصلا ان مالك قام ابد ..
فواز : سكري الموضوع !! و يستمرون في شهر العسل ..
مرا وناسه و طلعات و روحه و رده .. و حزت الفراش فواز يحاول كثر ما يقدر ان ما يخلي نور
تحس باي نقص ..لكن مازالت بنت ..
يرجعون من شهر العسل ... يسكنون ويا اهل فواز في البيت ..
يستقبلونهم اهلهم بحفاوه .. الام تساسر بنتها ..ها اشلونه وياج ..
نور : يما سكتي حياتي انتحار فراش حمام.. حمام فراش .. ماطلعنا ما رحنا ذبحني !!
بدتها نور كذبه تريح فيها امها ..
تستانس امها .. و اتحس بفخر ان هذي بنتها الي مثلها .. بنتها الي سعيده مع ريلها
..
و ام فواز تسأل نور من صوب . عسا استانسو .. يالله الفال لما نفرح في ولدكم انشاء الله
انا و امج بنعد من الحين 9 شهور !!
يحس فواز باحراج كبير ..طعن لرجولته !!
حس ان من الحين بدا باب كبير ينفتح عليه
الناس من اول يوم تسأل !! بسم الله هذا احنا في المطار ..
يدخلون فواز و نور الشقه .. ترتب الاغراض .. و تصفهم ..
تفرز الجناط .. و الملابس الوصخه .. و بعد ما خلصت ..تسأل فواز تبي عشا ..
يقولها : لا تعبان بنام دايخ .. اذا انتي تبين اكلي ...امي حاطه في السخان العشا ..
حست نور ان فواز وايد تعبان ... و مضايق من كلام امه و خالته..
تروح تقعد في السوفا يمه ..تلمه حيل .. فوازي تحمل بيينا وايد كلام ..
ما عليك منهم.. انا احبك .. انا اخترتك .. انا مرتك وياك على الحلوه و المرا ..
ما عليك من كلام الناس .. الي بينا في الفراش .. مسكر عليه طوف و باب .. يشهد الله
عمري ما راح ايب طاري لحد .. و لا راح احاول احسس احد في شي .. و احمد ربك احنا في الكويت
يعني اذا تاخر الحمل كلهم بقطون اللوم علي ..و بقولون .. هرمونات .. و صدام قاط شي في الجو يخلي الحريم ما تحمل !
فواز يحب راسها و يقوم ..
بعد اسبوع تتوالى العزايم عليهم ..
خالته ...خاله .. عمه ... و عمها .. يبدى مشوار العزايم و ضغوط المجتمع في كل مرا
يسألونها .. ها اشلون الزواج ..
حتى رفيجاتها و اقرب رفيجه لها تسألها .. هااااا يعور !!
و في كل يوم لازم احد يسألها .. و اهي تنجرح اكثر من اي احد .. اهي محرومه .. اهي بنت .. اهي ملامه و مظلومه
بعد 3 شهور ...يراجع فواز مع نور طبيب خاص
..فحوصات .. تحاليل ... عينيات .. كريمات .. بخاخات .. و في كل مرا يطلعون من الطبيب محاولين
على امل ان الحبوب و الكريمات تفيد .. و لا اكو اي استجابه ..
بعد 7 شهور و مازال العلاج مستمر ..صبر نور بدا يفج .. كلام امه و خواته .. كلام اهلها
البنات ... و حاجاتها اهي .. بدا يبين على ويها .. ضعفت .. تعبت و فواز تعبان اكثر ..
و في يوم طلب فواز من نور انها ما تنام تنطره لين يرد من الدوانيه ..
يرجع فواز ..و يطلب من نور لو انها ..ملت و تعبت فمن حقها ان تروح بيت اهلها ..
لانها ما قصرت وياه ..تحملته .. و تحملت ظيم الحجي .. و اهي مالها ذمب
و ان لو اقعدت راح يحس نفسه اناني لان مخليها تصبر معاه ..
نور: ((مصدومه )) ما هقيتها منك !! تبيني ارد بيت اهلي في اول مشكله تواجهنا !!
عيل انا مافيني خير من اولها اروح بيت اهلي وين الحلوه و المرا الي انا وياك فيها ..
انا مو تعبانه منك . انا تعبانه من نغزات الناس و كلامهم ما يقصدون بس انا اتعب منه ..
في كل مرا انزل الصاله حق امك و تشوفني مو كاشخه تقولي .. لبسي تكشخي .. تسنعي حق ولدي
اقول بقلبي .... انتي ما تدرين اني احاول اكون وايد طبيعيه عشان ما اجرح مشاعر ولدج
كشختي له قامت تجرحه .. و كأني انطر شي او ابي شي .. اتذكره في عجزه ..
انت مو مشكلتي .. مشكلتي كلام الناس ..انا مرتاحه معاك .. انا احبك .. انا وياك العمر كله ..
و من باجر راح نغير الدكتور .. هذا اكل فلوسنا .. معاشك كله طاير على العلاج .. و ماكو فايده ..
انا باخذ موعد مع دكتور ممتاز ...
انت اسمع كلامي مرا في حياتك ,,
و اسأل عنه و انشوف اذا انت ارتحت كملنا وياه اذا ما ارتحت .. طلعنا ..
و فعلا تاخذ نور موعد مع الدكتور عادل بعد 3 ايام ..
نور: فوازي .. اتحبني ..؟
فواز: هذا سؤال تسألينه ...؟؟ انا تسأليني احبج .. انت تدرين ان من اول احبج .. لكن الحين اموت عليج
انتي نوري .. والله يا نور على الي فيني بس اشوف عينج ارتاح
انا عمري ما سويت شي عشان احد و دست على نفسي عشان احد .. انا اول مرا ابجي
في كل مرا احد يقثج و اشوفج تبجين .. ادخل اخذ شاور و انا ابجي عليج والله مو على نفسي ..
و تروح نور مع فواز .. العياده .. و يشرحون له الحاله بالتفصيل .. و يعطونه
كيس متروس من كل انواع العلاجات الي اخذها فواز .. و يطلب الدكتور من نور انها تطلع برا شوي ..
و تطلع نور ..و يقوم الدكتور بحمل بعض الفحوصات .. و يطلب من فواز ان يسوي بعض التمرينات يوميا حتى الموعد الثاني
على ما تطلع النتايج بعد يومين ..
و يروحون بعد يومين ..و يشرح الدكتور .. لفواز ..

الدكتور : حالتك جدا بسيطه .. ارتخاء في عضله .. لا تحتاج لا كريمات .. لا بخاخات لا كل فتره العلاج هذي ..
نور عليج انج تسوين حركه بسيطه اثناء المعاشره الزوجيه .. و انت فواز اخذ هذي الحبه ..تساعد هذي العضله ..
مشكلتك جدا بسيطه .. لا عجز .. لا اي شي ثاني .. بس كان التشخيص الاول غلط ...

يطلعون من العياده ..
و اثنينهم طايرين من الفرحه ..
ياخذ فواز العلاج .. و اهو في قمه الفرحه و الخوف .. امل على انه فعلا كلام الدكتور صح
خوف من ان لو الحبه ما يابت نتيجه ...و المشكله ما كانت عضله و بس
نور في قمه سعادتها ,, كشختها استعدادها ... موسيقى رومانسيه .. عشا ممتع
قبلات و لا شي يرضى غرورها سوا فض بكارتها
و فعلا .. كان التشخيص سليم ..
كانت ليله من ليالي الف ليله و ليله
كان يوم ماراح تنساه ابد
كانت مشاعرهم تتعانق قبل اجسادهم
كان هناك حب
كان هناك عشق
كانت هناك خفقات تتطاير قبل وسائدهما
كانت يده تكتشف جسدها و كانه اول مرا يلسمها
و بعد اقل من عشر شهور .. تلذذت بليله جعلت منها امرأه
و هو رجلها
ارتاحت و ارتاح هو اكثر
استمتعت و اطمأنت على مستقبلها
استقرت
و في يوم احتفالهم بعيد زواجهم الاول
كان هناك جنين يحتفل معهم
نور و فواز
قصه في كل بيت كويتي يواجه اي نوع من انواع المشاكل الزوجيه
لكن قليل من الصبر.. الحكمه .. سد الاذان .. و الكتمان ..يحل المشكله


21 comments:

Cr8ivia said...

تفاؤلج حلو هالمره :) من المرات القليله اللي تنعكس صورة متفاؤله في مجتمعنا و عيالنا

نور البيرفكت وايف .. جم نور عندنا؟
و جم فواز عندنا !

صابره و راضيه و متفائله .. و اهوه صابر و مو مقصر و لا معاند و لا مكابر كحال باقي شبابنا

لكن ايضا كان المفروض ان عارف هالشي من قبل الزواج .. و المفروض يصارحها فيه من قبل ..

تساؤل اخر .. لو كان فواز مكان نور .. هي العاجزه او العقيم .. هل راح يصبر و يرضا و يتفاءل مثلها؟ كم فواز ممكن يسوي جذي؟
واحد بين مليون شاب كويتي ..

سالفه حلوة لوير و المعنى احلا و اسلوبج كالعاده واقعي و توب

Cr8ivia said...

and yeah

law Allah eyfokna min 7achi ilnas wil mujtama3 o il ahal o tadkhel il 3es belli maykhes
chan i7na ib 10000000 khair

Mohammad Al-Yousifi said...

موضوع عجيب و قوي و انصحج تحترفين كتابة هالقصص

لكن شوي فيه جرأة و جم بدلية لو تقرين الموضوع مرة اخرة اول ما تنشرينه وايد احسن

:)

Reflections said...

Lawyer...

اولا اهنيج على الموهبة الجميلة و الكبيرة الي عندج

لا أخفيك سرا اني تفاجأت من الجرأة في بعض المفردات، لكنها مشكلة واقعية و مافي مفر منها

ياليت كل البنات بحكمة و عقل نور.. و يـا ليت كل الشباب الي يطبون بهالمشكلة مثل فواز
بدون مكابر و عناد.. و الايمان بالله قبل كل شي

بس عندي تساؤل
في مثل هالمشكلة، مو المفروض الشخص يدري عن نفسه؟


!!!عسى الله يفكنه من كلام الناس و نرتاح

PearL said...

قصة حلوة

صح الصبر وسد الاذن اهم حل حق كل مشكلة بأي بيت كويتي

بس برد اسأل نفس تساؤلات
Cr8ivia

هل لو كان فواز مكان نور راح يصبر مثلها ؟
وهل لو كانت السالفة مثل ما اهيه
بعجز فواز
ما راح يحاول يطلع الف عيب وعيب بزوجته عشان يغطي عن عجزه

وهل بنات هالايام فيهم صبر ؟
ولا دلع وكل اللي تبيه يصير ولا ترد بيت اهلها

بس اهنيج عالقصة
وايد اسلوبج حلو

Mudhaf said...

صباح الخير

اول تعليق لي باليوزر هذا بعد ما صكوا معظم البلوقرز خاصيه الانونيموس :)
هذا ما يمنع اني متابع قديم لمونتج الاكثر من رائعه

القصة مو جريئه واقعيه وايد و تصير و نسمعها وايد في حياتنا الجريء اهوه اختيارك لبعض المفردات و التفاصيل

محاولة فوزار في أول ليله اشباع حاجة نور بطريقة او بأخرى من غير فظ البكاره دليل واضح على انه يدري من زمان بعجزه
لا اعتقد ان العجز الجنسي ينقص من رجولة الرجل .. هذا مرض حالة حال كل الامراض ماله دخل فيه الانسان
اللي نقص من رجولة فواز بنظري جبنه في مواجهة الحقيقه و عدم اخباره لنور بعجزه
الا اذا كنتي تقصدين ما اكتشف هذا الشي الا بعد الزواج؟
و هذا مو معقول
الشي الثاني اللي ينقص من رجوله فواز في نظري لي سمع الحجي اللي يسم بدن زوجته يدش تحت الدوش و يبجي؟ يافرحه امك فيك !
لو رجل امسك امك و قولها رجاءا مرتي مالكم شغل فيها و لاحد يسمعها كلمه مني و مناك العيب فيني مو فيها
شنو ذنب بنت الناس تتحمل الكلام عشانك؟ كافي انها متحملتك انت و عجزك و مرضك بعد الناس؟
و بس
و اذا عندج وحده كويتيه نص نور
لا يبا راضي بربه نور
انا من باجر ببيتهم اخطبها :) و العرس الاسبوع الياي

بوصالح said...

لوير ...

مواضيعك الإجتماعية رائعة و طريقة الطرح حلوة

أتمنى لك التوفيق

KQ8 said...

جرأه في المحتوى

تفاصيل دقيقه لكنها..تحتاج الى صقل وتشذيب

انا من رأي الاخوه والاخوات الذين قالو انه من الواجب المصارحة من اولها..

lawyer said...

صباحكم ورد

صباحكم خير


كراتيفيا
البيوت مليانه اسرار اكيد في وايد مثل نور و اكيد

اكيد يعرف في مشكلته قبل الزواج ..

اكو ريال ما يدري انه عاجز حتى لو ان في بعض الرياييل يبررون عجزهم في انه يفزع من الفير يروح الدوام لي الييل تالي لويه فايي يقط راسه و ينام مو وقت هالسوالف و ما عنده وقت خرابيط!!

عرفتي اشلون يبررون الرييل حق نفسهم

شوفي كراتيفيا باجر بعد الزواج
راح تكتشفين ان الريال
يصبر على زوجته في وايد شغلات

اوعدج اني راح اكتب القصه اليايه عن صبر الازواج



مطقوق
اشكرك على ثنائك بروح اقرا القصه و اشوف الاغلاط المطبعيه
تسلم على الملاحظه



رفلاكشن

حياتي انتي مشكوره وايد

على الكلام الطيب

المفردات حاولت كثر ما اقدر اقلصها
لكن ماراح اخرب القصه عشان جرأتي
بصراحه جرأتي متعتي :)




كيتي
بعد روحي مشكوره

كلكم تسألوني ليش فواز ما عالج ليش فواز ما صارحها المشكله ماعندي اجابه :)
لاني مثلكم اسأل نفس السؤال

يقولون كان فواز زين بس عويييينه صكته على هالعروس
ههههههه

لا لا اتغشمر وياج




بيرل

مشكوره وايد
مثل ما في حريم تصبر في رياييل تصبر

الي يحب يصبر

عاد انتي ادرى في الحب ما انتي الي مأججه مشاعري الرومانسيه في بوستاتج الي تخليني كل صبح اتنهد :)

lawyer said...

مضف
صباحك ورد انا توا يبدا احلى صباح عندي مع قهوتي
و تعليقاتكم الحلوه

اشكر متابعتك و اشكر تعليقك

و برد على جزئيه انتي كتبتها


الشي الثاني اللي ينقص من رجوله فواز في نظري لي سمع الحجي اللي يسم بدن زوجته يدش تحت الدوش و يبجي؟ يافرحه امك فيك !
لو رجل امسك امك و قولها رجاءا مرتي مالكم شغل فيها و لاحد يسمعها كلمه مني و مناك العيب فيني مو فيها
شنو ذنب بنت الناس تتحمل الكلام عشانك؟ كافي انها متحملتك انت و عجزك و مرضك بعد الناس؟

اهو يدش يلاقي مرته تبجي من كلمه قاطتها امه او رفيجتها
او ايا كان
محد يتكلم جدامه عشان يدافع

كان الكلام من وراه
و لكن يدش يلاقيها جذي
يحتر عليها
مو معقوله اذا دش لقاها باجيه على نغزه حمل
او على لقافه رفيجات في قهوه يتكلمون عن حميميه العلاقه مع رياييلهم بيروح و و يسكت الناس

زوجته متحطمه نفسيا عشان جذي على كل شي كانت تنهار و تبجي



في وايد بنات مثل نور
الحمدلله
كل بيت في العالم فيه مشاكل و اكيد وايد حريم صابرات




بوصالح

حياك الله اشكرك وايد
الا اشلون ام صالح و شنو رايها؟




krakatoa
اي بعد ما تعرف لوير لازم جرأه في الطرح
;)

lawyer said...

مطقوق

تم التدقيق وتصحيح الاخطاء المطبعيه

Diver said...

قصة حلوة و مأثرة و لكن كنت افضل عدم استخدام بعض الكلمات
مع احترامي لاختياراتج

{ 13 } said...
This comment has been removed by a blog administrator.
Chai-7aleeb said...

الله عطا الإنسان حلج واحد وأذنين

الشاطر يفهم

nachla said...

اضم صوتي مع مضف
صعبة الوحدة تستحمل ريال مايدري وين الله قاطة
المفروض الموضوع بالنسبة له مهم مو يسكت وينطر شور مرته على دكتور شاطر
واعرف وحدة مرت بنفس الموقف
ما تكلمت عن ولا شي الا بعد ما طلقها زوجها النذل وحط ستين عيب فيها ، اضطرت انها تييب نتيجة الفحص علشان
تثبت ان مافيها اي عيب
والعيب منه
مادري النهاية حلوة والشخصيات متوافقة مع بعض بطريقة مسلسلات

بس ما انكر كنت مشدودة وانا اقرا علشان اعرف النهاية

lawyer said...

دايفر
صباحك ورد
مشكووور وايد

في المرا اليايه راح اخفف من حده المصطلحات
بس ابيك تساعدني

يعني وحده مع زوجها في الفراش شنو يمكن يستخدمون مصطلحات؟

;)

شاي حليب

انا فهمت هههههههههه



كويت دايفر

قصه حلوه
حياك الله

شياب اول غير



نجلا
صاحبه القصه و اهي تقرا تعليقج اكيد وايد راح تستانس

((مادري النهاية حلوة والشخصيات متوافقة مع بعض بطريقة مسلسلات))

بتشقق علينا :))))

neelaah said...

ما زلت مصره انج من احسن الناس اللي تكتب سيناريو بالكويت

:)

albandry said...

اي والله ياحلو فواز احب هالاسم
اشوة بعد اهوا متعاطف وياها خلتحمد ربها في ناس العيب فيهم وييننون حريمهم\


حمدالله جت سليمة


يا انت ياجرئ يالفطم

lawyer said...

البندري

شنووووووووووو متعاطف وياها
اهووووووووووووو راعي المشكله اهي الي متعاطفه وياه عشان تحبه
بنت ايوااد البنت اصيله اوقفت وياه

Q80-ChillGirl said...

فواز ضعيف، ليش ماكان صريح؟ ليش ماوقف اهله عند حدهم؟ ليش الانهزام؟ هالمشكله مالها علاقه بنقص الرجوله مشكله صحيه بحته

اهي طيبه و قوية شخصيه وحده غيرها بتنهار و بتقول اللي صار مثل ما الله خير الحين كل من عرست من ثاني يوم اتقص للكويت اشصار و اشجرى لها! الصمت مفتاح مهم للسعاده الزوجيه و دخول الاخرين حياة الزوجين ضرر بحت

فواز للحينه قاهرني، يقهرني من يستغل وحده بحب او بدونه مهما كان لو لها قدر عنك يا اخي اقل مافيها كون صريح خلها معاك و تاخذ بيدك عن قناعه مو لما تحطها بالامر الواقع و خلاص يلا المطلوب انج تصيرين بطله؟ و غير جذيه ماكان يحط حد للاهل مع انه مثل ماقال احد اللي علقوا "المضف" انه يطلع الاهل من الموضوع و يقولهم هذا شي خاص و مالكم شغل لا فيني ولا بمرتي

الرجوله و الذكوره و الخصوبه مواضيع منفصله لا نخلط الاوراق! الحين كبرنا و تعلمنا و فهمنا و بصراحه بس مليت من هالعقليات مو مطلوب الكمال احنا بشر ، بس الله يقدرنا على الصراحه على الاقل

lawyer said...

كويت شيلي

من الصبح و انا احوس و اقرا باجي تعليقاتج

تراااااااا قاعد اقراهم :)))))