حر ...ملل .. شغل وايد .. او بالاحرى ضغط شغل ..
مود تعبان
نرفزه
على اقل شي اتنرفز
ابي شي يضحكني
اشعلامي مدري !!
هذا اليوم الثالث و انا احاول اعدل مزاجي و ينعفس اكثر
و لا قاعده اجامل
و لا قاعده اغير من طبعي
الي حواليني كلهم يسألون
اشفيج
مدري لحد يسألني
اشفيني بالضبط مدري
يمكن قلق
نرفزه
ناس اتقط كلام ما اتثمنه
ناس تتعامل معاك على اساس الميانه و اهي تجرح
ناس ماخذه عليك
و يعني مسوين نفسهم يمونون وايد
يجرحون وايد
امس و انا طالعه من المستشفى
شفت وحده من صاحباتي
حامل و تنطر الظاهر بولدونها
مت انا عليها من الخوف
شفت غرفه العمليات
انصعقت
شفت وحده ملحفينها
بغيت اموووووت
يا ناس مو ناقصه انا
مووووت
ليش اشوف هالموت جدامي وين ما اروح
ارجع البيت
اخوي متضايق
واحد يعز عليه وايد
توه طالع من دوانيتهم و توه كان شايفه
يطلع من دوانيه ثانيه بلحظه يحترق بحادث سياره و يموت
اخوي متأثر لانه شايف الريال قبل وفاه بساعه
لألألألألألألألألألأ بليز مو وقته طاري الموت
توني انا شايفه شي يصروع
افتح التلفزيون
مناظر ذبح و صراخ في الاخبار
اسكر التلفزيون
اروح فراشي
اغطس في كفري
انخش عن الدنيا كلها الا ربي
ظلام
عتمه
وحده
وحشه
اتخيل نفسي في القبر
لألألألألألأ
فطيم لو ياج ملك الموت الحين مستعده للقبر!!
لا بليز ربي
الله يخليك لا تاخذ امانتي الحين
للحين ما شبعت من الدنيا
اسأل نفسي
ليش فطيم !؟؟
اشتبين من الدنيا
ابي يا ربي اعيال ؟؟
عشان ما اموت وحيده
عشان اكو احد يدعيلي
ارد على نفسي
هذا منطق بالله !!
بالله عشتي مليون سنه و ماعندج اعيال !؟؟
يعني نهايه العالم بتروحين جهنم
لألألألألأ
لان ما عندي علم احد ينتفع فيه
و لا عندي ذريه تدعيلي
يا حسرتي
بمووووت بروحي
و محد يدري عني
ياربي وايد ذنوووب
وايد
وايد فتن وايد
اخطط حق الصيف بس ما اخطط حق القبر
ياربي ارحمني
بس تعبت وايد من التفكير
اتقلب على الويه الثاني
بسم الله
ما بقى ايه ما اعرفها ما اقراها
بس ما يتني النومه
اكيد ما اتييج النومه
من ذنوبج
قومي استغفري
صلي
سوي شي حق قبرج
سوي شي حق عمرج
بس تتحلطمين
ما يدري شيفيدج هالتحلطم
من تصبحين لين تمسين و انتي
ذنوب
تجاملين فلانه
و تقصين على فلانه
و تزعلين فلانه
و كله حش
و قرض
فجأه اتذكر صراخ امي كل صبحيه قبل لا اطلع و اهي تقولي
زاااانيه
زاااااااااانيه
الي تتبخر و تطلع من بيتها
ويشمها ريال
زانيه
اووووووووف
بس نامي فكيني
و انام
اقوم الصبح
متعسره اكثر
افش خلئي في السياااااره
اقص على نفسي
اسمع قران الصبح و انا رايحه
يعني موديلج يا فطيم تقصين على عمرج
متبخره و طالعه و تسمعين قران مدري ليش
بسسسسسسسسسسسسسسسسس تعبت
فكيني اشوي
خفي عني
ادخل الشغل
تعب تعب تعب
اطلع في الزحمه و الحر
45 دقيقه على ما اوصل البيت
ادخل
اشوفه جدامي
قاعد ينطرني
يعصب علي
ليش لما دخلت ما بسته
ابوسه على راسه
يناديني
قطيييوتي
ترا يبتلج المنجا الي قلتي لي عنها
و سوينالج الزبيدي بطريقتج
و يبتلج البرد الي تبينه
و ترا الانانس الي تبينه ماكو
و شريت لج سيريلاك
فشلتيني
اشكبرج
للحين تاكلين سيريلاك!!!
اتغدا
احاول ارتاح اشوي
امي تتصل مليون مرا
تقولي انها صارلها يومين مو نايمه
لانها حاسه
ان فيني شي
و تحن علي اشفيج
مزاجي
متعكر يما
مدري اشفيني
كل شي ابيه
ما احصله
و كل الي عندي ما ابيه
تسكر التلفون في ويهي
و تنزلي تحت
هذا يسمونه بطر
بطر
لان كل شي عندج
تدورين الي ما عندج
اقرر اني راح اسافر
اقدم على بعثه
و على امل تطلعلي
طبعا بدون استشاره احد
لان ادري لو تم الموافقه عليها
راح ارووح
حتى لو الكل معارض
ارجع اقلب المحطه
منطر مووووووت
و قتل
و تشرد
دم
و هذي الدنيا
لما نكون مضايقين
ما نشوف الا الجانب الي موزين
و لما نكون منحاشين من نفسنا
نبي نسوي كل شي عشان ما نواجه عمرنا
نفسي تبي وايد شغلات
بس لو تموت ماراح تحصل عليها
مو عشان ماعندي ثقه بالله
بس عشااااان ماراح اخليها تمشى ورا هالدنيا و تنسى الاخره
هذرت اليوم وادري كلامي كله خرابيط
بس هذي شخابيط زمن فيني لما احس اني بموت بروحي
20 comments:
اختي لوير
احساسج هذا يمكن يساعدج انك تصلحين امور بحياتك
اهم شي يكون الضمير حي
اختي ابدي بأمور تعتبرينها سهله مقدور عليها مثل الصيام /لا تتبخرين /حاولي تتبعين قاعدة /لا اسمع لا اتكلم (لتقليل الحش ) بس اختي حطي ريلك علي اول السلم -واهم شي طلبي من ربك الهدايه-
يقول الحبيب صلى الله عليه و سلم (من أصبح منكم معافى في جسده آمنا في سربه عنده قوت يومه فكأنما حيزت له الدنيا بحذافيرها) صدق المصطفى صلى الله عليه و سلم
الحديث السابق علاج لاغلب مشاكلنا و ضيقت خلقنا هالايام اتمنى من الله سبحانة انه يعينا على تطبيقة
ضيقتي صدري على هالصبح :\
العيال بالدنيا مهب مهمين ..
المهم .. وش اللي بناخذه معنا بالاخر لكن المشكله محد فينا مهتم .. نلهث بهالدينا اعوذ بالله
إنتي مو وحيدة بهذا الشعور
كل انسان إتييله فترة يحس بهالشيء
ويقول نفس الكلام ويراجع نفسه ويأنبها على أشياء يسويها وقد تكون بالنسبه لنا أشياء عادية مثل طلعتنا برة البيت واحنا متعطرين
:)
وللأمانة هالشعور ...انا اعتبره شيء صحي دينياً
وما السِعة إلا بعد ضيق
إن شاء الله تكون هالضيقه اللي فيج
يكون بعدها سعة وانشراح لصدرج
ونفسيتج يارب
باختصار
مثل ما قالت نون:
هالشعور ...انا اعتبره شيء صحي دينياً
يعني قلبج حي
ترى كثير منا يمرون بنفس الحالة
حاولي تسوين اللي تقدرين عليه ... شوي شوي
لا تضغطين على روحج
Life has many seasons .. wait for spring :)
بالعكس يا لوير مو خرابيط
ترى مو الكل يقدر يحاسب نفسه بصدق
و كونك حاسة هذا شي حلو و صحي
و اهم شي الايجابية بالتعامل مع هالاحساس
:)
لك مني ارق تحية
بعد عمري حاسة بكل كلمة من كلامج ووايد تيينا هالحالة بس اللي يغث بالسالفه ان عقب فترة بسيطة وبمجرد ماتروح هالظيجة اترد ريما على عادتها القديمة ://وننسى عمرنا لين ايينا موقف مشابه للي ذكرتيه واندش بنفس الدوامة اقين
ذكري الله وخليها فرصة اتعيدين النظر من خلالها بحياتج
:)) شكرا
تصدقين قريت كلامج وقلت ماني راده
!!
شنو اقولج وانا مادري شنو اقول حق روحي؟
هذا الاحساس ايي حق اصحاب القلوب الحيه
تشغلنا الدنيا ونبتعد ونلهى بس نرجع من اول ويديد حق هالنقطه
يا الغاليه وقفه صادقه وهمة وعزيمه واشيا وايد راح تتغير
ابدي بابسطها
واستشعري كل شي تسوينه
يوم لا تتعطرين فكري يا كبر اجري
يوم اللي تسوين الشي الصح فكري اشكثر انتي قويه
مرات الضيقه تكون من احساسنا بالتقصير وانه ربي مانعنا من اللي نبيه من من ذنوبنا احنا
ما تحسين جذي مرات؟
تنقصنا ثقه رب العالمين
ولا نعرف نتوكل
هذا الواقع المر
:(
نلتزم بكل شي ،بعدين نفتر
وين الصبر وين الثقه رب العالمين؟
ابدي بالاذكار كل يوم
بعدين بالسنن
وحاولي تحرصين ما تنامين ليله الا موكله كل امورج لله
صلي الوتر وناجيه
وراح تحسين بقمة الراحة
أحبج وااااااااايد
وقرقت على راااسج وايد
بس لانه الحال من بعضو
:)
عزيزتي ليال
اشناء الله بحاول
راح ابدى من الصغير لين الاكبر انشاء الله
ربي يعين
اخوي دايفر
اي والله صااج
هذا الحديث اعرفه بس
لازم احطه في الديسك عندي
عشان كل يوم اقراه
و يبرد قلبي
يزاك الله الف خير
سعلوه
المال و البنون زينه الحياه الدنيا
نون النسوه
ايوالله كلنا نحس جذي
بس متى بنغير عادتنا!!
اميييييين يا رب
و يشرح صدرج انتي و جميع المسلمين
بروك
هلا في الغاليه
اي صح راح احاول بشغلات بسيطه يمكن اهي سبب للسعاده
اتمنى حياتي و حياتكم كلها ربيع في ربيع
طائر بلا وطن
اتصدق وايد اثرت فيني كلمه اهم شي الايجابيه في هالاحساس
المفروض فعلا افكر بايجابيه
سولفويس
اي ليش مدري ؟؟
ليش انخطط ان بنكون وايد زينين او بنغير اطباع شينه
و بعدها نرجع للبدايه
الله يسعدج
ونعم بالله
استكانه
حياتي بشريني في امتحاناتج عسى شاده حيلج
؟؟
قلوبنا اذا حيه و بس فهذا مو كافي
لازم قلب صاحي مع عمل
لازم نغير مو بس في الاحساس ولكن بالعمل بعد
اي اكيد من ذنوبنا
انا كل ما انحرم من شي اقول قلعتي اكيد انا مسويه شي مو زين
الحمدلله الواحد عنده ثقه في ربه و يامن في رحمه الله
انشاء الله كل خير
اشكركم وايد على احساسكم الطيب و مشاعركم وياي
اشكركم وايد على نصايحكم
اشكركم اكثر على اخلاصكم لله في كتابتكم
انا عن نفسي راح ادعيلكم ان ربي يشرح قلبكم مثل ما شرحتوا قلبي في كلامكم الطيب
و يسعدكم يا رب
اختكم لوير
قوه فطوم اول شئ اسمله عليج من الموت
هالاحساس الى اتحسينه دايما احس فيه بالعكس الواحد لازم يحاسب نفسه لانه ربنه قاعد يحاسبنه ولازم ذكر ربنه بكل وقت
بس اتمنى ما تكونين زعلانه منى او شايله على لانج ما تدرين انتى شنو بالنسبه لى الله العالم
وتعوذي من ابليس وماكو الا العافيه انشالله وراح تتزوجين انشالله وتشوفين عيال عيالج لانج من المعدن النادر فطووم
واشوفج على خير انشالله واشوفج اسعد انسانه انشالله
ما اضيق العيش لولا فسحة الامل
كل واحد تحوشه فترة يعاني من الاكتئاب عادي
كلها جم يوم صبري وتزول انشالله
عن أنس بن مالك رضي الله عنه قال: سمعت رسول الله - صلى الله عليه وسلم - يقول: قال الله تبارك وتعالى: (يا ابن آدم إنك ما دعوتني ورجوتني غفرت لك على ما كان فيك ولا أبالي، يا ابن آدم لو بلغت ذنوبك عنان السماء ثم استغفرتني غفرت لك ولا أبالي، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة) .
وعن أبي هريرة رضي الله عنه قال: قال رسول الله - صلى الله عليه وسلم - : قال الله عز وجل : ( إذا تحدث عبدي بأن يعمل حسنة فأنا أكتبها له حسنة ما لم يعمل ، فإذا عملها فأنا أكتبها بعشر أمثالها ، وإذا تحدث بأن يعمل سيئة فأنا أغفرها له ما لم يعملها ، فإذا عملها فأنا أكتبها له بمثلها ، وقال رسول الله - صلى الله عليه وسلم - قالت الملائكة : رب ذاك عبدك يريد أن يعمل سيئة وهو أبصر به ، فقال : ارقبوه ، فإن عملها فاكتبوها له بمثلها ، وإن تركها فاكتبوها له حسنة ، إنما تركها من جرَّاي ) .
تحياتي لج اختي لايأس مع الحياة ولا حياة مع اليأس:)
هللووو مودي ..عااااادي لاتضيقيين خلقج .. اللي قامتج طاري الموت وتأثر اخوج برفيجه .. صارلي نفي الموقف مو بس انقمت بجيت وانا ماعرف الصبي ولاقد شفته .. قمتة الموت فجأه .. يالله حسن الخاتمه .. اكو حديث ماعرف النص ماله .. بس ان من كان تواقا للقاء ربه كان الله تواقا للقائه ... عادي انا مقره ان عندي ذنوب بس ساعات اقول شبعت من الدنيا كل شي حصلته بس الحمدالله
ما في أحد مرتاح وهي أغنية ترددها أبنتي ذات الثلاث السنوات وهي لا تعي معناها
فكلنا هموم ومشاكل لكن الإنسان يلجأ إلي ربه بالدعاء والإستغفار وعليك بهذا الدعاء وهو من أجمل الأدعية التي تؤنس العبد مع ربه وتزيل ماألم به من حزن وهم :
اللهم إني عبدك ابن عبدك ابن امتك ناصيتي بيدك ماض في حكمك عدل في قضاؤك اسألك بكل إسم هو لك سميت به نفسك أو أنزلتة في كتابك أو علمته أحد من خلقك أو استأثرت به في علم الغيب عندك أن تجعل القرآن ربيع قلبي ونور صدري وجلاء حزني وذهاب همي
عزيزتي :
وصف الله الإنسان بأنه أكثر شيءٍ جدلاً. وهو كثير الجدال لنفسه لأن الدنيا بعكس ما يريد فإن أرادها فرت أمامه ركضًا تقول : الحق بي أكن لك .
فإن فرَّ منها ركضت وراءه تقول: أنا لك فكن لي .
لن أطلب أن تكوني كالقول الثاني ولن أنصح ولكن تصالحي مع نفسك وكوني جميلة ترين الوجود جميلاً واجعليالله في قلبك يكن لكِ .
هذه أسس مصالحة النفس فكوني وسطية ولا تطلبي من الدنيا تجدينها مهرولة إليك.
تقديري واحترامي
سؤال طرى على بالى وانا اشوف صورة انس الرشيد ؟
هل تعتقدون ان استعيل بالاستقالة؟
لو كان ظال ويكون وسيلة ضغط داخل مجلس الوزراء مو احسن ؟
النفس اللوامه
كل هالافكار الي تييج والي سولفتي عنها هذي النفس اللوامه وهذا دليل انه قلبج حي الحمد لله
هذا شيء وايد زين الحمد لله
المهم انج تردين على هالاسئله وتحطين لج جدول باعمال تسوينها كل يوم وتكون حق اخرتج بس وداومي عليها لو كانت مو وايد مثل الاذكار واقراي ايه الكرسي بعد كل صلاة لانه الي يقراها بعد كل صلاه مايكون بينه وبين الجنه الا الموت اقري لج صفحه من القران كل يوم او الي تقدرين عليه
وصاجه امج لاتتعطرين ولاتبخرين وانتي طالعه احرصي على هالشيء
وابليس الي يقص عليج يقول متعطره وتسمعين قران خليه عنج غواي
تموتين على ذنب واحد انه متعطره بس تسمعين قران احسن من انه تموتين وانتي متعطره وتسمعين اغنيه بعدين القران شفاء ويطمن القلب
تعوذي من ابليس ولي يتج هالافكار توضي وصلي وادعي لانه وقتها نفسج بتكون صادقه حيل وادعيتج بتطلع من القلب وبتحسين براحه باذن الله
انا اهنيج الصراحه هذا دليل ان فيج خير وايد بس انتي مو قاعده تستثمرينه وانه الذنب مايمر عليج بسهوله وضميرج يانبج
الله يرزقنا واياج الهدايه يارب
خلي لسانج دايم ذاكر لله وبكل مكان لانه هذي اسهل طاعه الواحد يسويها واعظم طاعه بعد
كلما ذكرتي الله بلسانج رح يكون معاج والشيطان رح يتركج
الله يوفقج يارب للي فيه خير دنياج واخرتج
ويجمعني واياج في الجنه
نسيت اقول
الله يرزقج طولت العمر يارب ويمد في عمرج ويعينج على طاعته
يعني بروح جهنم بالنهايه:(
وااي اسمله عليج الله يبعدج عنها
والله يطول بعمرج ويعطيج على قدر نيتج
مشكله الدنيا تلهينا بس نظل نتذكر والله يكون في العون
Post a Comment