Monday, May 29, 2006

هلوسه وحده ميته من الحر



بدا الصيف بدا ....
يعني راح يبدا عندي البيات الصيفي
جهزت عدتي
المشاي في الدار ...
طلبت افلام ..
سويت فورمات للاب توب
و بديت في الركود الصيفي
الصحه مازالت في تدهور
ولكن الحمدلله على كل حال
باجر لازم ياخذون مني اربع قراش دم!!!
مدري وين بودونهم يا حسرتي
الله كريم
اذا عندكم اقتراحات للافلام بليز عطوني افلام دراما و رومانسيه لاني من الصيف الي فات ماشفت فيلم سنع
خلاص الحين راح يكون جدولي عباره عن دوام
تسدح
نووم
فيلم
نت
بلعه
نوم
رفيجاتي العزيزات كلش مالي خلق قهاوي و لا طلعه
مالي خلق مجاملات اجتماعيه في الحر
بدأت الاتصالات الهاتفيه بشأن الانتخابات و زياره المقار الانتخابيه
بصراحه لا اسوي نفسي كلش و مهمه
محد عزمني غير مرشحين و كلهم مو في دائرتي
وتبون الصج لما قالتلي رفيجتي يزاها الله خير قلت لها
عسى الخيمه مكيفه
لان ضغطي مرتفع هاليومين و احتاج برد برد مافني حيل اسيح
امس كنت معزومه على العشا
و كانت العزيمه اغلب الي فيها من السلفيات
نطيت انا باستفزاز
هااا ام براك انشاء الله بتعطين السعدون؟؟
تبقق عيونها ام براك !! مخترعه
السعدوووووووووووووون !!
لااااااااا مستحيل اسم الله علي !!
اصلا انا مو على قرطبه مدنيتي على النزهه لي الحين ..
ارد انا اقط روحي على القفنه و بخبث اقول
اهااااااااا النزهه .. عسى احياء التراث طرشولكم مسج قالولكم منو تعطون؟؟
ترد علي ام البراء : و اشفيها اذا اتحدنا احنا يا السلف و اشفيهم احياء التراث!!
ارد عليها انا
لا مافيها شي بس انا ما اعطي عقلي لغيري
ما انطر اوامر عليا من احد
الي مقتنعه فيه اسويه
من الحين اقولكم انا صوتي مقطوع للسعدون
تلطف امي الجو ( مسكينه امي كلا انا مفشلتها عند الحريم ) بس عادي تعودت امي
امي: انا الحمدلله للحين على شويخ يعني بعطي الصقر
بنت خالتي : لااااااا خالتي بيعي الصوت على الصقر ب 6 الاف دينار
امي : هوهوهو هو استغفرالله الصقر يشتري اصوات بعد ؟؟
بنت خالتي : حتى لو ما يشتري انتي بيعي
انا : اي يما تكفين بليز بيعي صوتج و عطيني الفلوس عشان اذا سافرت مو انتي اتحرمين ههههههههه عطيني اياهم انا اخذهم
بدال ما اسكن في فندق 4 نجوم اسكن في 5 نجوم
امي مسكينه كلا تصدق
امي: لا لا لاحراام و الصوت امانه
انا : يما اشفيييييييييييج انتغشمر انتغشمر
امي : منو اتهقون يفوز في النزهه عندكم ..؟؟ هالمرأه الحريم اكيد بغيرون النسبه
ام ناصر : هالمره يقولون حامد الطبطبائي قوي
و الكل يحب عبدالله الفارس له شعبيه قويه
انا : اكيييييييييد عبدالله الفارس منو ما يعرفه مخه نظيف .. فكر .. و ربعه وايد و له قاعده كبيره
و اكييييييييييد اغلب البنات بيعطوونه .... خوووو منو ما يعرفه و تبون الصج ملينا من الي معجعجين في الكرسي و ماسو شي
خلو الشباب .. هالمرا عطوهم فرصه
قطع حديثنا صوت صاحبه العزيمه تنادي على العشا
و كان حديثتنا يدور على الطاوله عن حر الصيف
و الانتخابات
و السفر
و انا في بالي شنو اطلب افلام اشوفها تصبرني على هالحر و تشد من ازري و اقعد في البيت

22 comments:

abderrahman said...

أختي المحامية..
الله يكون في عونك من الحر.. وصعوبته

(*ب*)

أريد أن أعلق على مسألة الانتخابات
إذا كان هناك من يريد الفساد من السياسيين، فالشعوب هي من تحدد قبولها لهذا الفساد أو محاربته، لذا يجب توعية الجماهير بالوقوف في وجه السياسيين الفاسدين ورفض افعالهم .

تحياتي لك.. وبالتوفيق إن شاء الله في مسيرة الديمقراطية .

Mohammad Al-Yousifi said...

موفقه بالصيف

أنا شخصيا أحب الصيف و احب الحر و أحب الكزيت بهالجو

السبب بسيط جدا و هو قلة الزحمة بالشارع

و أسافر انشاءالله بعد الصيف

اذا أكو أفلام زينه قوليلنا

layal said...

اقول
الجو للحين شوي حلو عندنا
شرايج تمرينا ؟؟

أجدع واحد في الشارع said...

الصيف احسن من الشتا برده ولا ايه رايك
وعلى راي فيروز حبيتك بالصيف

arabic man said...

نحنا عنا تصير الحرارة 30 نقول متنا من الحر كيف إنتو
وعلى البحر ورطوبة
لازم تجي تصيفي بسوريا
أهلا بيك ودعوة من القلب والله

Яeema said...

أول شي إنشاء الله مافيج إلا كل خير و ما تستاهلين يالغالية

جدولج مافيه عزايم بالبيت إشدعوة!!؛؛
طردة أشكرة؟؟

بس أنا صاحبة بيت كيفج ما تبيني بروح أقعد تحت ويا أمج و إنتي تعلقي فووق بصالتكم


أقول!؛
ناويه الشر ويا الأفلام

أهم شي إن الأفلام بيطلعون علي إبلاش ، لأني يستلفهم منج
بعدين

هاهاهاها
شغل نيادة

Unknown said...

اول شى مبروك بديت ترتبين البوست لما تكتبين :)
ثانى شى حر والله موووت بس تصدقين عقب صلاة المغرب تلقينا نلعب كرة بملعب النزهة والحر يفح والواحد يصير ضب من الحرورة ولا اكو فايدة
بس القعدة بالبيت حدر التكييف والتلفزيون ما تيب اللى المتن
والخثر
والربادة
والملل
روحى السينما خلج ادمان سينما والله تستانسين حجزى بالنت وسيدى من السيارة لى السينما
واللى يرحم والديج مو قاعد اتهاوش ترى
يعنى حالى حالى غيرى معلق
:P
وعبدالله الفارس لووووووووو يموووت ما يفوز
مشمش وبس :)))

bo9ali7 said...

سلامات انشالله
والله ياحلو الصيف, عيل التطقطق والبرد..شماله!!؟

انصحج بفلم
دافنشي كود,تلقينه بالبسطات اللي جدام الفنار

Diver said...

ليش اتحرشين بخلق الله و ترفعين ضغطهم تحارشين الناس
على جذي الناس مرتاحة منج بالصيف ماكو احد اتعيل فيهم
:)

لمياء الحالمة said...

محاميتنا الأوستازة فاطمة

أول زيارة لي لمدونتج, وإنشاءالله ماراح تكون الأخيرة

بالنسبة للافلام ماقلتي شنهي النوعية إللي تحبينها

عربية أو اجنبية؟

lawyer said...

عبدو باشا
تشرفت في زيارتك لمدونتي
و شكرا لدعائك الطيب لنا و للحريه و الديمقراطيه

كلا مطقوق
اييييييييييي كويتي تموت على الحر و القوايل
اي والله بهذي صدقت ماكو زحمه في الصيف و حزت طلعتنا من الدوام في هالحر الشارع خفيف



ليال
هلا و غلا فيج
نورتي

بعد رووووحي على العزيمه
افا عليج شكلي بشيش ريما و ناديه و انيكم البحرين جم يوم



ابن الشارع
اييييييييي يا عم انت في الصيف يكون عندك الجو 30 درجه احنا ننشوي هنا

حياك الله

ايهم
تسلم و نورت البلوج
شكرا لك على العزيمه اليوم هذي ثاني دعوه اول شي بروح البحرين لاختي ليال و انشاء الله انجيكم على سورياااا
الله يهينكم على الجوووووو

تسلم على دعواتك الله يحفظك يا رب

lawyer said...

من ريما لي الاخت لمياء اتصدقون اني رديت عليكم
لكن صار السرفر داون ماطلع الكومنت

lawyer said...

ريما اعيوني انتي بيتج و مكانج
افا عليج
داله الطريج انتي ما يحتاي


ناديه
شفتي العياب عند الباب
اي الحين شغلي حار بحار مثل الصيف

مشاري

مالي خلق اروح السينما
لاني في البيت اكون وايد كاشخه في الدراعه و الخلاجين و الحب و البسطه
عندي الفيلم في البيت له جو ثاني


بوصالح
البرد اهووون لما تطلع ما يرتفع ضغطك

اي انا ناطره دافتشي
مع اني قريت الروايه


دايفر
هههههههههههههههه
هههههههههههههههه

تموووووووون
هين



لمياء الحالمه
نورتي حبيبتي
لا انا احب الافلام الاجنبيه الرومانسيه و الدراما و السياسيه او التاريخيه

esTeKaNa said...

احم احم
انا هني
:pP~

اول شي اشلونج شخبارج عساج بخير؟
بكل مكان بعالم في بيات شتوي
في الكويت بس في بيات صيفي
:Pp~

انا اقول طلعي من هالجو واوجدي لج حياه يديدة وشي تسوينه تملين فيه فراغ الوقت والروح وانا اخيتج
ولا ترا بتصير النتيجة متن يطير الرشاقه المتعوب عليها طول السنه
:)

انا عندي ملاحظة بسييييييييييييطه
تعودت في كتاباتج غالبا ما تكونين محايده،لما تكلمتي عن السلفيات مثل ما قلتي حسيت في استهزاء شوي ما تعودته منج
!!
بغض النظر عن اي توجه السلفيه منهج اهل السنه والجماعه
وان كان في اي اخطاء فهي تنسب للشخص وليس للمنهج السلفي
فنعت شخص بانه سلفي شي حلو ترا:)

شي ثاني:
الاخوان،السلف،المنبر
اي جماعه من حقها تجتمع وتنزل شخص تثق بفكرة ووتدعمه ليصل للمجلس ويمثلها
هذا حق اختياري وصدقيني يعني فيه دعم بس ما في اجبار :)

وبالنهايه خلينا ندعي عسى الله يوفق الاصلح لديرتنا وهذا اهم شي

NewMe said...

سلامتك يالوير
اربع غراش مرة وحده
انا من غزة ابره ادوخ!!!!
ما تشوفين شر

وفعلا الحر خانق
توني راجعة الديرة
واليوم ما قدرت اطلع من البيت
المفروض أرجع يوم السبت الدوام
الله المستعان
حرااااااااانه

أطيب تحية

أجدع واحد في الشارع said...

ماشى ربنا معاكى

lawyer said...

استكانه
هلااااااااا و غلا هلا بالطششششششش و الرش
اشلوونج انتي بشريني عنج عساج مرتاحه
وااااااي
حدي ولهانه عليج عمرج طويل والله
تونا كنا نسولف عنج

حبيبتي
انا ما اتطنز عن السلف او الفكر السلفي ابدا لانه الدين الحقيقي الاسلامي

بس انا كنت اتناقش وياهم لان هذي المجموعه من الحريم كنت اناضل وياهم في مسأله حقوق المرأه و كانوا ضدي بطريقه عنيفه
كنت اقول لازم يعطونا حقوقنا و كانوا يحرمون حقوق المرأه
و عندهم التصويت و الترشيح و الانتخاب حرام حرام حرام
و كانوا يقولون ان لو المرأه خذت حقها السياسي احنا بنمتنع لان حرام

اشووف الحين ماعندهم حجوه غير الانتخابات
عرفتي انا ليش ضد هذول النساء فقط و لست ضد الفكر
لانهم هذول الجماعه و اهم مجموعه من النساء مخهم شايط و مفور
وين رايحين معاكم
مو عيب ان الانسان يكون له حزب ينتمي له
لكن العيب كل العيب ان يعتقد ان حزبه هو الاصلح و ما يحترم غيره

lawyer said...

me new
الله يعيينك
حمدلله على السلامه
اي والله حررررررر
يسيح مو بس خانق

ابن الشارع
ربنا مع الكل يا اخويا

esTeKaNa said...

واي انتي زوقه
مادري ليش الضحكة من هني لي هني وانا اقرا ردج ...ترا انا صايرة احب الحجي الحلو زيدي منه وانا اخيتج
الطش والرش وهالسوالف تونسني جني ياهل
:pP~
ولهت عليج العافيه وتراها قلوبنا شواهد
:)
يزاج الله خير على التوضيح
الحين فهمتج

بس توضيح ثاني،عاد تحملي اخيتج الدعله
انتي ومنو تسولفون عني؟
:pP~

lawyer said...

استكااااانه

انتي تنطرين من احد يقول لج كلام حلو افا علييييج
انتييييييييييييي الزين كله
افا عليج
كنت اسولف ويا ريما عنج سالفه طويله يا استكانه اقولها لج بعدين

mishal said...

شوفوا وين وصل الطمع في الحريم
يعني الوحده من تطلع وهي على طول هات هات هات هات فلوس
ولما تتزوج مهر وكل شي مجاناً وانا كنت متأكد انكن لما طالبتن بحق التصويت كان قرضكن الفلوووس


لكن منو اللي يشتري الصوت الحين مشاءاالله البنات كثير وهم بعد الشباب لكن الشباب اغلبهم في السلك العسكري ومو مسموحلهم التصويت
في السابق لما كان في الدائره مابين 3000 إلى 6000 صوت كان السوق شغال اما الحين الدوائر صارت مابين الـ 20000 ولـ30000
يعني قولي الحين كانت احلاماً تروادني

***
عاد يالله يوم اخذتوا اللي تبون ورفعتوا شعار المساواه صار لنا الحق في المطالبه بإلغاء المهور والامتيازات
اللي تمنحها لكم الدوله لان اللي اعترضن على القرار كانن على علم بأن لكل شي ثمن ومواجهه

على العموم دخول المرأه كان مطلب امريكي ولم يكن مطلب شعبي

PearL said...

لوير
البيات الصيفي بدا ينتشر

وعن الافلام
انا من متابعينها
فاذا تبين شي ماراح اقصر معاج :)


اما عن الانتخابات
وما ادراك ما الانتخابات

انا معاج ان لازم نعطي الشباب فرصة
وملينا من اللي كل دورة يدخلون وما يسوون شي


بس البوست عجيب
ويعبر عن الواقع بشكل كبير

يعطيج العافية